အကောင်းဆုံးခြေစွမ်းနဲ့ ဆီမီးဖိုင်နယ်တက်တဲ့ မြန်မာ

နိုဝင်ဘာ ၂၆၊ ၂၀၁၆
M-Media

– ဆူဇူကီးဖလား အုပ်စု ဒုတိယ နောက်ဆုံးပွဲစဉ်အဖြစ် အိမ်ရှင်မြန်မာနဲ့ မလေးရှားတို့ရဲ့ ပွဲမှာတော့ မြန်မာအသင်းက အကောင်းဆုံး ခြေစွမ်းနဲ့ ထိုက်တန်တဲ့အနိုင် ရရှိခဲ့ပါတယ်။

ပွဲအစမှာ နည်းနည်းအထနှေးခဲ့ပေမယ့် ၈ မိနစ်ကျော်လောက်ကတည်းက မြန်မာဟာ မလေးရှားဂိုးပေါက်ကို ခြိမ်းခြောက်နိုင်ခဲ့ပြီး ၉ မိနစ်ကျော်ကျော်မှာပဲ ဂိုးရဖို့အခွင့်အရေး ရရှိခဲ့ပါတယ်။ မလေးဂိုးစီးထိပ်ကရတဲ့ ပြစ်ဒဏ်ဘောကနေ အောင်သူရဲ့ ကန်သွင်းချက်ကို မလေးရှားဂိုးသမား ကာကွယ်နိုင်ခဲ့ပြီး မကြာခင်မှာ မြန်မာတို့ ပင်နယ်တီ ရခဲ့ပေမယ့် အောင်သူရဲ့ကစ်ချက်ကို မလေးဂိုးသမား ကာကွယ်သွားနိုင်ခဲ့ပါတယ်။

နောက်ပိုင်းမှာလည်း မြန်မာကပဲ ဂိုးပေါက်ကို ပိုမိုခြိမ်းခြောက်နိုင်ခဲ့ပြီး တိုက်စစ်မှူးတွေရဲ့ သွင်းဂိုးတွေ ဘားထိထွက်တာ ဂိုးသမား ကာကွယ်သွားနိုင်တာတွေကြောင့် ဂိုးမရခဲ့ပါဘူး။ မလေးရှားကတော့ ၂ ကြိမ်လောက်သာ မြန်မာဂိုးပေါက်ကို ခြိမ်းခြောက်နိုင်ခဲ့ပြီး ဂိုးမသွင်းနိုင်ခဲ့ပါဘူး။

ဒုတိယပိုင်းမှာတော့ မြန်မာအသင်းက တိုက်စစ် ပိုဆင်နိုင်ခဲ့ပြီး ဂိုးပေါက်ခြိမ်းခြောက်မှု တော်တော်များများ လုပ်နိုင်ခဲ့ပေမယ့် ဂိုးကံခေခဲ့ကာ ၈၈ မိနစ်မှာမှ ကွင်းလယ်ကစားသမား ဒေးဗစ်ထန်ရဲ့ တစ်ကိုယ်တော်ခြေစွမ်းနဲ့ လိမ်ခေါက်ကာ အဝေးကန်ချက်နဲ့ သွင်းယူနိုင်ခဲ့တာကြောင့် တစ်လုံးတည်းသော အနိုင်ဂိုးကို ရရှိခဲ့ပါတယ်။

တစ်ဖက်က ဗီယက်နမ်နဲ့ ကမ္ဘောဒီးယားတို့ပွဲမှာ ဗီယက်နမ်က ၂ ဂိုး ၁ ဂိုးနဲ့ အနိုင်ရတာကြောင့် ရမှတ် ၉ မှတ် အုပ်စုပထမနဲ့ နောက်တစ်ဆင့်တက်နိုင်ခဲ့ပြီး၊ မြန်မာကတော့ ရမှတ် ၆ မှတ် ဒုတိယနဲ့ နောက်တစ်ဆင့်တက်နိုင်ခဲ့ပါတယ်။ ဆီးမီးဖိုင်နယ်မှာ မြန်မာက ထိုင်းနဲ့ တွေ့ရမှာဖြစ်ပြီး ဗီယက်နမ်ကတော့ အင်ဒိုနီးရှားနဲ့ ကစားရမှာ ဖြစ်ပါတယ်။