မြန်မာနှင့် ဆီမီးဖိုင်နယ်ပွဲမှာ ခက်ခဲမည်ဟု ထိုင်းနည်းပြပြော

နိုဝင်ဘာ ၂၈၊ ၂၀၁၆
M-Media

ကိုင်တီယာဆတ်

– မြန်မာအသင်းနှင့် ကစားရမည့် ဆူဇူကီးဖလား ဆီမီးဖိုင်နယ်ပွဲစဉ်မှာ ခက်ခဲမည်ဟု ထိုင်းလက်ရွေးစင်အသင်းနည်းပြ ကိုင်တီယာဆတ်က ပြောကြားလိုက်ပြီး အသင်းသားများကိုလည်း အဆင်သင့်ရှိနေရန် သတိပေးခဲ့သည်။

စနေနေ့က မလေးရှားအသင်းအား ၁ ဂိုး ဂိုးမရှိဖြင့် အနိုင်ရခဲ့ပြီး အုပ်စု (ခ) တွင် အုပ်စုဒုတိယဖြင့် ဆီမီးဖိုင်နယ်တက်သွားသည့် မြန်မာအသင်းမှာ အုပ်စု (က) မှ အုပ်စုဗိုလ် ထိုင်းအသင်းနှင့် တွေ့ဆုံရမည်ဖြစ်သည်။

ဆီးမီးဖိုင်နယ် ပထမအကျော့ကို ဒီဇင်ဘာ ၄ ရက်နေ့တွင် သုဝဏ္ဏအားကစားကွင်းတွင် ကစားမည်ဖြစ်ပြီး ဒုတိယအကျော့ကို ဒီဇင်ဘာ ၈ ရက်နေ့တွင် ဘန်ကောက်မြို့ရှိ ရာမင်္ဂလာ အားကစားကွင်းတွင် ယှဉ်ပြိုင်ရမည်ဖြစ်သည်။

ကိုင်တီယာဆတ်ကမူ မြန်မာအသင်းမှာ တောင့်တင်းသည့်အသင်း ဖြစ်သောကြောင့် ၂ ပွဲစလုံးမှာ ခက်ခဲမည်ဟု ဆိုသည်။

“အဝေးကွင်းပွဲက ခက်ခဲဖို့ ရှိပါတယ်။ မြန်မာအသင်းဟာ အသင်းကောင်းတစ်သင်းဖြစ်ပြီး အတွေ့အကြုံရှိတဲ့ ကစားသမားတွေ၊ မနှစ်က ယူ ၂၀ ကမ္ဘာ့ဖလားမှာ ၀င်ကစားထားတဲ့ လူငယ်အသင်းက ကစားသမားတွေနဲ့ ပေါင်းစပ်ထားတဲ့ အသင်းပါ။ တောင်ပံနှစ်ဖက်ကနေ လျင်လျင်မြန်မြန်နဲ့ ထိုးဖောက်တိုက်စစ်ဆင်နိုင်တယ်။ တိုက်စစ်မှူးအောင်သူဆိုရင် အသက် ၂၀ ပဲ ရှိပါသေးတယ်။ သူ တော်တော်လေး ကောင်းပါတယ်။ ကျွန်တော်တို့ သူတို့ကို လုံးဝလျှော့တွက်လို့မရဘူးဗျ။ ပထမကျော့မှာ ပြည်တွင်းပရိတ်သတ်ရဲ့ တစ်ခဲနက်အားပေးမှုက သူတို့ ထူးထူးခြားခြား တစ်ခုခုလုပ်ဖို့ တွန်းအား ဖြစ်သွားနိုင်ပါတယ်” ဟု ကိုင်တီယာဆတ်က ပြောကြားခဲ့သည်။

ထို့ပြင် ဆီမီးဖိုင်နယ်ကို ကျော်ဖြတ်နိုင်ရန်အတွက် ကြံ့ခိုင်မှုက အဓိက စကားပြောသွားလိမ့်မည်ဟုလည်း ထပ်လောင်း ပြောကြားခဲ့သည်။

Ref : Bangkokpost