မလေးရှားမှ တရားမ၀င်ကလေးရာင်းချမှုလုပ်ငန်းအတွက် ဖမ်းဆီးမှု စတင်

ဒီဇင်ဘာ ၂၊ ၂၀၁၆
M-Media

– မလေးရှားတွင် မွေးကင်းစကလေးများ ရောင်းချနေသည့် တရားမ၀င်ဈေးကွက်အကြောင်းကို အလ်ဂျာဇီးရား သတင်းဌာနက ဖော်ထုတ်ခဲ့ပြီးနောက် ထိုလုပ်ငန်းတွင် ပါဝင်သည်ဟု သံသယရှိသူ ၃ ဦးကို မလေးရှား ရဲတပ်ဖွဲ့က ဖမ်းဆီးလိုက်သည်ဟု သိရသည်။

အမျိုးသမီး ၁ ဦးနှင့် အမျိုးသား ၂ ဦးတို့ဖြစ်ကြပြီး ကွာလာလမ်ပူ ဆင်ခြေဖုံးရှိ ဆေးခန်းများ၊ နေအိမ်များကို ဗုဒ္ဓဟူးနေ့က ၀င်ရောက်စီးနင်းခဲ့ပြီးနောက် ဖမ်းဆီးခဲ့ခြင်းဖြစ်သည်။

ဖမ်းဆီးခံရသည့် အမျိုးသမီးမှာ အလ်ဂျာဇီးရား လျှို့ဝှက်သတင်းထောက်များ၏ စုံစမ်းမှုဖြင့် 101 East အစီအစဉ်တွင် ထုတ်လွှင့်ခဲ့သည့် မလေးရှားမှ မှောင်ခိုကလေးဈေးကွက် မှတ်တမ်းတွင် ပါဝင်ခဲ့သူ အမျိုးသမီးလည်းဖြစ်သည်။ အခြား ၂ ဦးမှာ ထိုအမျိုးသမီး၏ သားနှင့် ပုဂ္ဂလိကဆေးခန်းတွင် အလုပ်လုပ်နေသူ ဆေးဘက်ဆိုင်ရာ အကူတစ်ဦး ဖြစ်သည်။

မလေးရှား တော်ဝင် ရာဇ၀တ်မှုစုံစမ်းစစ်ဆေးရေးဌာနမှ တာဝန်ရှိသူ ရိုဟိုင်မီ မိုဟာမက် အီဆာကမူ ၎င်းတို့ ၃ ဦးအား လူကုန်ကူးမှုတိုက်ဖျက်ရေးနှင့် ပြောင်းရွှေ့အခြေသူများအား ကုန်ကူးမှု တိုက်ဖျက်ရေး အက်ဥပဒေများဖြင့် တရားစွဲဆိုရန် စီစဉ်နေသည်ဟု ပြောကြားခဲ့သည်။

“စစ်ဆင်ရေးကို ဆက်လက်လုပ်ဆောင်နေပါတယ်” ဟု ၎င်းကဆိုပြီး မွေးကင်းစကလေးငယ်များအား ရောင်းဝယ်မှုတွင် ပါဝင်သူများကို ထပ်မံဖမ်းဆီးရန်ရှိနေသည်ဟုလည်း ထပ်လောင်း ပြောကြားခဲ့သည်။

အလ်ဂျာဇီးရားမှ ပြီးခဲ့သည့် သီတင်းပတ်တွင် ထုတ်လွှင်ခဲ့သည့် မလေးရှားမှ ကလေးငယ် တရားမ၀င်ဈေးကွက်အကြောင်းတွင် မွေးကင်းစကလေးငယ်တစ်ဦးကို ကန်ဒေါ်လာ ၄၀၀ မှ ၇၅၀၀ အထိ ဈေးပေါက်ပြီး ဆရာဝန်များနှင့် လူကုန်ကူးသူများပေါင်းက ဆောင်ရွက်နေခြင်းဖြစ်သည်ဟု ဖော်ပြခဲ့သည်။

ဗုဒ္ဓဟူးနေ့က ဖမ်းဆီးခဲ့သည့် အမျိုးသမီးကမူ ၎င်းအနေဖြင့် မလေးရှားနိုင်ငံတစ်ဝှမ်းတွင် ကိုယ်ဝန်ဆောင် အင်ဒိုနီးရှားအမျိုးသမီး ၇၈ ဦးကို ထာဝန်ယူထိန်းသိမ်းထားကြောင်း ပြောကြားခဲ့သည်။

ဘွန်ဒါဟုဆိုသည့် ထိုအမျိုသမီးက ၎င်းမှာ ကိုယ်ဝန်ဆောင် အင်ဒိုနီးရှားအမျိုးသမီးများ၏ ဓာတ်ပုံ ကက်တလောက်ကို ၀ယ်ယူမည့်သူများထံသို့ ပေးပို့ကာ ရွေးချယ်စေပြီး ကလေးတစ်ဦးလျှင် ကန်ဒေါ်လာ ၁၅၀၀ ခန့် ဈေးခေါ်သည်ဟု ပြောကြားခဲ့သည်။ ထိုသို့ရောင်းချမှုတွင် မွေးဖွားသည့်မိခင်များအနေဖြင့် ၎င်းတို့၏ကလေးကို နောက်ပိုင်းတွင် ပြန်မရှာဟူသော ကတိ ပေးရသည်ဟုလည်း ဆိုသည်။

ဘွန်ဒါကမူ ၎င်းအနေဖြင့် ထိုအလုပ်အတွက် အင်ဒိုနီးရှားအမျိုးသမီး ၁၀၀၀ ကျော်နှင့် ဆက်သွယ်ဆောင်ရွက်ခဲ့ဖူးပြီး မည်သည့်ပြဿနာမှ မရှိခဲ့ဟု ထည့်သွင်းပြောဆိုခဲ့သည်။

Ref: Aljazeera