ထိုင်းနိုင်ငံမှ ပြန်လာသည့် မြန်မာဒုက္ခသည်များ တန်ဖိုးနည်းအိမ်ယာ ၀ယ်ယူနိုင်မည်

ဒီဇင်ဘာ ၆၊ ၂၀၁၆
M-Media

ထိုင်းနိုင်ငံရောက် မြန်မာဒုက္ခသည်များ

– ထိုင်းနိုင်ငံရှိ ဒုက္ခသည်စခန်းမှ မြန်မာနိုင်ငံသို့ ပြန်လည်ရောက်ရှိလာသူများ ရန်ကုန်ရှိ တန်ဖိုးနည်းအိမ်ယာ ၀ယ်ယူနိုင်ရေး လူမှုဝန်ထမ်းကယ်ဆယ်ရေးနှင့် ပြန်လည်နေရာချထားရေး ၀န်ကြီးဌာနနှင့် ရန်ကုန်တိုင်းဒေသကြီး အစိုးရအဖွဲ့တို့ သဘောတူညီချက် ရရှိခဲ့သည်ဟု သိရသည်။

လက်ရှိတွင် အတည်မပြုရသေးသော အဆိုပါ အဆိုပြုချက်မှာ ဒုက္ခသည်မိသားစုများအနေဖြင့် လှိုင်သာယာမြို့နယ်ရှိ ရွှေလင်ဘန်း အိမ်ယာမှ ကျပ် ၁၀ သိန်းတန် တိုက်ခန်းများ ၀ယ်ယူနိုင်ရေးဖြစ်သည်ဟု ၀န်ကြီးဦးမြင့်အေးက ပြောကြားခဲ့သည်။ ထို့ပြင် ထိုင်းနိုင်ငံမှ ပြန်ရောက်လာသည့် ဒုက္ခသည် ၁၇ ဦးအား ရေရှည်နေထိုင်နိုင်မည့် နေရာထိုင်ခင်မျိုး စီစဉ်ပေးရန် မိမိက ညွှန်ကြားထားသည်ဟု ဆိုသည်။

ထိုင်းနိုင်ငံရှိ ဒုက္ခသည်စခန်းများတွင် နေထိုင်ခဲ့ရသည့် ဒုက္ခသည် ၆၀ မှာ ပြီးခဲ့သည့်လတွင် မြန်မာနိုင်ငံသို့ ပြန်လည်ရောက်ရှိလာခဲ့ကြပြီး နှစ်နိုင်ငံ အစိုးရများမှ စီစဉ်ဆောင်ရွက်ပေးသည့် ပထမဆုံး နေရပ်ပြန်ပို့မှုလည်း ဖြစ်သည်။ အများစုမှာ တိုင်းဒေသကြီးနှင့် ပြည်နယ်အသီးသီးရှိ ၎င်းတို့၏ နေအိမ်များသို့ ပြန်လည်သွားရောက်ခဲ့သော်လည်း အောက်တိုဘာ ၂၇ ရက်နေ့က ရန်ကုန်သို့ ရောက်ရှိလာခဲ့သည့် ဒုက္ခသည် ၁၇ ဦးမှာ နေစရာ နေရာမရှိပေ။

လက်ရှိတွင် ၀န်ကြီးဌာနပိုင်ဆိုင်သော မရမ်းကုန်ရှိနေရာတစ်ခုတွင် ခေတ္တ နေထိုင်ခွင့်ပေးထားပြီး ၎င်းတို့နေစရာရရေး စီစဉ်နေသည့်အချိန်အတွင်း တစ်ယောက်လျှင် ကျပ် ၃၀၀၀ ထောက်ပံ့ကြေးအဖြစ် ပေးခဲ့သည်။

အဆိုပါ ဒုက္ခသည်များ ပြန်လာသည့်အချိန်တွင် ထိုင်းအစိုးရက လူကြီးတစ်ဦးလျှင် ကန်ဒေါ်လာ ၂၄၀ တန်ဖိုးရှိ ထိုင်းဘတ်ငွေ၊ ကလေးတစ်ဦးလျှင် ကန်ဒ်ါလာ ၁၈၂ ဒေါ်လာတန်ဖိုးရှိ ထိုင်းဘတ်ငွေတို့ကို ပေးအပ်ခဲ့ပြီး မြန်မာအစိုးရကလည်း တစ်မိသားစုလျှင် ကျပ် ၃ သိန်း ပေးအပ်ခဲ့သည်။

လူမှုဝန်ထမ်းကယ်ဆယ်ရေး ဦးစီးဌာနမှ ညွှန်ကြားရေးမှူးချုပ်ဖြစ်သူ ဦးကိုကိုနိုင်ကမူ အဆိုပါ ပြန်ရောက်လာသူများအနေဖြင့် ထိုင်းနှင့် မြန်မာအစိုးရတို့မှ ရရှိသည့် ထောက်ပံ့ကြေးများကြောင့် ကျပ် ၁၀ သိန်းတန် တိုက်ခန်းများကို ၀ယ်ယူနိုင်မည်ဟု ပြောကြားခဲ့သည်။

Ref : mmtimes