ယနေ့လှုပ်ခတ်သည့် အင်ဒိုနီးရှားငလျင် လူအသေအပျောက် များနိုင်

ဒီဇင်ဘာ ၇၊ ၂၀၁၆
M-Media

– အင်ဒိုနီးရှားနိုင်ငံ ဆူမားတြားကျွန်းရှိ အာချေးပြည်နယ်တွင် အင်အားပြင်းငလျင်တစ်ခု ယနေ့မနက် အစောပိုင်းတွင် လှုပ်ခတ်ခဲ့သောကြောင့် လူသေဆုံးမှုများ ရှိသည်ဟု သိရသည်။

မြေတိမ်ပိုင်းတွင် လှုပ်ခတ်ခဲ့ပြီး ပြင်းအား ၆.၅ မဂ္ဂနီကျုရှိ အဆိုပါငလျင်ကြောင့် သေဆုံးသူဦးရေမှာ လက်ရှိတွင် ၉၂ ဦးအထိ ရှိလာပြီဖြစ်ပြီး အပျက်အဆီးများကြားတွင် ပိတ်မိနေသူများလည်း အများအပြားရှိနေသည်။ အမျိုးသား သဘာဝဘေးအန္တရာယ်ဆိုင်ရာ အေဂျင်စီကမူ ငလျင်ကြောင့် ၇၈ ဦး ဆိုးဆိုးဝါးဝါး ဒဏ်ရာရရှိခဲ့သည်ဟု ပြောကြားခဲ့သည်။

အာချေးပြည်နယ် ပီဒီခရိုင် အကြီးအကဲ အိုက်ယွဘ် အဘတ်စ်ကမူ ၎င်း၏ ဒေသအတွင်း လူရာချီ ဒဏ်ရာရရှိခဲ့ပြီး အဆောက်အဦးများစွာ ပြိုကျ ပျက်ဆီးခဲ့သည်ဟု ဆိုသည်။

လက်ရှိတွင် ဆူနာမီ သတိပေးချက် ထုတ်ပြန်ထားခြင်းမရှိသေးဘဲ၊ ဒေသတွင်း အရေးပေါ် စီမံခန့်ခွဲရေး အေဂျင်စီကမူ ကယ်ဆယ်ရေးလုပ်ငန်းများကို ဆောင်ရွက်နေပြီဟု ပြောကြားခဲ့သည်။ အပျက်အဆီးများကြားတွင် ပိတ်မိနေသူများ ရှိနေ၍ သေဆုံးသူအရေအတွကမှာ မြင့်တက်လာဖွယ် ရှိသည်။

Ref: Aljazeera