အစ္စလာမ်၏ အိနြေ္ဒသိက္ခာရှိမှု စံနှုန်းအပေါ် မွတ်စလင်အမျိုးသမီးတို့၏ အမြင်များ (၄)

ဒီဇင်ဘာ ၉၊ ၂၀၁၆
M-Media

ကျွန်မ လူမည်းတစ်ဦးဖြစ်ကြောင်း ကမ္ဘာကို ဂုဏ်ယူစွာပြသမည်

ဟိဂျာ့ဗ်ဝတ်ဆင်ခြင်းကို ဘာကြောင့် ရပ်တန့် လိုက်ကြောင်း ရှင်းပြနေတဲ့ Jacinda Townsend

-ဂျေဆင်ဒါတောင်းဆန်း က အာဖရိကန်နွယ်ဖွား အမေရိကန် စာရေးဆရာမတစ်ဦးဖြစ်ပြီး သူမက ဒီလိုပြောပြပါတယ်။

ကျွန်မ အသက် ၂၀ အရွယ် ဥပဒေကျောင်းသူဘ၀မှာ ငြိမ်းချမ်းမှုတရားကို ရှာဖွေရင်း အစ္စလာမ်ကို သက်ဝင်လက်ခံခဲ့ပါတယ်။ ငြိမ်းချမ်းမှုတရားကို သာသနာထဲမှာတင်မဟုတ်ဘဲ အစ္စလာမ့်ထုံးဓလေ့တွေမှာလည်း စူးစမ်းပါတယ်။ နေ့စဉ် ငါးကြိမ် ၀တ်ပြုမှုကို ကျွန်မရဲ့ ယုံကြည်ချက်ကို ခိုင်မာစေတယ်၊ ၀ူဿွူ(ကိုယ်လက်သန့်စင်ဆေးကြောခြင်း)က ကျွန်မရဲ့ စိုးရိမ်ကြောင့်ကြမှုကို သန့်စင်စေတယ်၊ ဟိဂျာ့ဗ်က ကျွန်မရဲ့ သြတပ္မတရားကို အများသိလာစေပါတယ်။

ကျွန်မရဲ့ဆံနွယ်ကို သိမ်းပြီး ပုဝါခြုံလိုက်တဲ့ အစဦးပိုင်းမှာ ကျွန်မရဲ့လိင်အာရုံနဲ့ အဆက်ပြတ်သွားတယ်၊ မိန်းမပျိုကို ငေးမော တတ်တဲ့ ယောက်ျားသားတွေရဲ့အကြည့်ကနေ ကင်းလွတ်သွားတယ်လို့ ခံစားရပါတယ်။

ဒါပေမယ့် တစ်နေ့တော့ ပီဘိသူစိမ်းဖြစ်တဲ့ မွတ်စ်လင်မ်အမျိုးသားတစ်ဦးက စူပါမားကက်တစ်ခုမှာ ကျွန်မကို ချဉ်းကပ်လာတယ်၊ ကျွန်မရဲ့ ဖုန်းနံပါတ်ကို တောင်းပါတယ်။

တကယ်တမ်းကျတော့ ဟိဂျာ့ဗ်အောက်မှာ ဘာရှိနေတယ်ဆိုတာ လူတိုင်းပြောပြနိုင်ပါတယ်။ ဘယ်လိုပုံစံပြောင်းပြောင်း အမျိုးသားရဲ့ ငေးမောကြည့်ရှုမှုကတော့ မလွတ်ပါဘူး၊ အားလုံးအတူတူပဲဆိုတာကို အတွေးဝင်ရောက်လာပါတော့တယ်။

ကျွန်မရဲ့ဦးခေါင်း ဖွင့်လှပ်ဖို့ ဘယ်အရာက နောက်ဆုံး တွန်းအားပေးခဲ့တာလဲ သိပါသလား။ ကျွန်မရဲ့ ဆံပင်ပေါ့။ ပြောင်းလဲ သက်ဝင်မှု မတိုင်မီက ဖြောင့်စင်းအောင် မထားခဲ့တဲ့ အာဖရိကန်နွယ်အမေရိကန် ဆံပင်ကောက်ကောက်တွေပေါ့။

ဗလီမှာရှိတဲ့ မိန်းမကြီးတွေရဲ့စကားတွေကြောင့် ကျွန်မဆီမှာ အာဖရိကန်-အမေရိကန် ယဉ်ကျေးမှုတွေ အများအပြား ပျောက်ကွယ်နေပါတယ်။ သူတို့ဟာ ကျွန်မ အလျဉ်းနားမလည်ခဲ့တဲ့ ဘာသာစကားနဲ့ ဆုတောင်းဆိုရမယ်လို့ ပြောကြတယ်။ ဘာသာရေးမဟုတ်တဲ့ အခမ်းအနားနေ့ကျင်းပခြင်း/အားလပ်ရက်ဆိုတာ မိမိတို့အဖို့ ဟရာမ်ဖြစ်ကြောင်း သူတို့က ဆိုကြတယ်။

ကျွန်မ တန်ဖိုးထားတဲ့ ဆံခွေကိုရစ်ပြီး ဟိဂျာ့ဗ် လွှမ်းခြုံလိုက်တဲ့အခါတိုင်း တစ်ခါက အမြင်အတိုင်းရှိခဲ့တဲ့ လူမည်းဖြစ်ခြင်းအမှတ်သညာကို ဖုံးကွယ်နေရတယ်လို့ ကျွန်မ ခံစားခဲ့ရတယ်။ ဗလီဝတ်ကျောင်းထဲမှာ လူတွေရဲ့လက်ခံမှုရရှိဖို့ ကျွန်မဟာ ကျွန်မရဲ့ယဉ်ကျေးမှုစံပုံစံတွေကို စွန့်လွှတ်ခ၀ါချနေခဲ့ရပါတယ်။

နောက်ဆုံးတော့ ဟိဂျာ့ဗ်ဝတ်ဆင်ခြင်းကို ကျွန်မ ရပ်တန့်လိုက်ပါတယ်။ ဆံပင်ကို ကျစ်ဆံမြီးပြန်ကျစ်ပါတယ်။ အပြင်ကိုတော့ ထုတ်မပြထားပါဘူး။ ကျွန်မဟာ လူမည်းတစ်ဦးဖြစ်ကြောင်း ကမ္ဘာကို ဂုဏ်ယူစွာ ပြသလိုက်ပါတယ်။ ကျွန်မရဲ့လူမည်းဖြစ်ခြင်းအပေါ် နဂိုကထက် ပိုမြတ်နိုးလာမိပါတော့တယ်။

(မှတ်ချက် – အစ္စလာမ်သည် တစ်ပါးသောယဉ်ကျေးမှုကောင်းနှင့် ကိုယ်ပိုင်ဝိသေသများကို စွန့်လွှတ်ခိုင်းစေခြင်း အလျဉ်းမရှိပါ)

(မူရင်း – What the hijab means to me : From Nigeria to Uruguay, women share their thoughts and feelings about the hijab. Al Jazeera)

ပြန်ဆိုသူ – သြရသ ရေချမ်း

(ဖော်ပြခဲ့ပြီးသော အပိုင်းများ

အပိုင်း(၁)

အပိုင်း(၂)

အပိုင်း(၃) ဖတ်ရှုနိုင်ပါတယ်