မက္ကာရှိ ကအ်ဘာကျောင်းတော်တွင် မြန်မာနိုင်ငံမှ ကျွန်းသစ်များ အသုံးပြုထား

ဒီဇင်ဘာ ၉၊ ၂၀၁၆
M-Media

– ဆော်ဒီအာရေဗျနိုင်ငံ မက္ကာမြို့က အစ္စလာမ်ဘာသာဝင်တို့ အထွဋ်အမြတ်ထားရာ ကအ်ဘာကျောင်းတော်မှာ အသုံးပြုထားတဲ့ သစ်သားတွေဟာ မြန်မာနိုင်ငံကလာတဲ့ ကျွန်းသစ်တွေလို့ သိရပါတယ်။

အဲဒီကျောင်းတော်အတွင်းက ထောက်ထားတဲ့တိုင်တွေ၊ အတွင်းမျက်နှာကျက်၊ နံရံမှာ အသုံးပြုထားတဲ့ သစ်သားတွေအားလုံးဟာ ကျွန်းသစ်ဖြစ်ပြီး ကျောင်းတော်အတွင်း အသုံးပြုလို့ရမယ့် အခြေအနေမျိုးဖြစ်အောင် ဂျစ်ဒါမှာ ဒီသစ်တွေကို ပြုပြင်ပုံသွင်းတာ ဖြစ်ပါတယ်။

အရှေ့တောင်အာရှက အပူပိုင်းသစ်တောတွေမှာ ပေါက်လေ့ရှိတဲ့ ကျွန်းသစ်ဟာ ခိုင်ခံ့မာကျောမှုကြောင့် ကျော်ကြားပြီး ကျွန်းသစ်တစ်လုံးကို ၄၅ ပေအထိ ရှည်ပါတယ်။ အဲဒီကျွန်းသစ်တွေကို များသောအားဖြင့် သင်္ဘောဆောက်လုပ်မှုနဲ့ အဆင့်မြင့် စက်မှုလုပ်ငန်းတွေမှာ အသုံးပြုကြပါတယ်။

ကအ်ဘာကျောင်းတော် အတွင်းပိုင်း

ကုန်အာန်ကျမ်းအရ အဲဒီ ကအ်ဘာကျောင်းတော်ကို ကမ္ဘာဦးတမန်တော် အာဒမ်က စတင်ဆောက်လုပ်ခဲ့တာဖြစ်ပြီး သမိုင်းတစ်လျှောက် ပွင့်ပေါ်ခဲ့တဲ့တမန်တော်တွေထဲက တမန်တော်နူးဟ် (နောဧ)၊ တမန်တော် အီဘရာဟင် (အာဗြဟံ) တို့ကလည်း မူလအုတ်မြစ်မှာ ထပ်မံ ဆောက်လုပ်ခဲ့ကြတယ်လို့ မွတ်စလင်တွေက ယုံကြည်ကြပါတယ်။

သဘာဝ ဘေးအန္တရာယ်တွေကြောင့် ပျက်ဆီးမှုတွေရှိခဲ့ပြီး ခေတ်အဆက်ဆက် ပြင်ဆင်ရတာတွေ၊ ပြန်လည်ဆောက်လုပ်ရတာတွေ ရှိခဲ့ပါတယ်။ အစ္စလာမ်ဘာသာကို စတင်ဟောကြားတဲ့ တမန်တော်မုဟမ္မဒ်သခင် လက်ထက်မှာလည်း ကိုရိုက်ရ်ှမျိုးနွယ်တွေက ဒီကအ်ဘာကျောင်းတော်ကို တစ်ကြိမ် ပြန်လည်ဆောက်လုပ်ခဲ့ပြီး မုဟမ္မဒ်သခင်လည်း ပါဝင်ခဲ့ပါတယ်။

ကအ်ဘာကျောင်းတော် ထိန်းသိမ်းရေးရုံးက ဒါရိုက်တာ မူဟ်ယစ်ဒင် ဟာရှေမီက လက်ရှိ အဆောက်အဦးဟာ ကိုရိုက်ရ်ှမျိုးနွယ်က ဆောက်လုပ်ထားတဲ့ အဆောက်ဦးဖြစ်တယ်လို့ ဆိုပါတယ်။

အခုလက်ရှိ ဆော်ဒီကို အုပ်စိုးနေတဲ့ ဆအူးဒ်မင်းဆက် လက်ထက်မှာတော့ ကျောင်းတောကို ပြင်ဆင်မှုတွေ တော်တော်များများ ပြုလုပ်ခဲ့ပါတယ်။

Ref: Alarabiya