ရခိုင်ပြည် လွတ်မြောက်ရေးပါတီမှ ရခိုင်ပို့မည့် လက်နက်များ ဘားအံမှာ မိ

ဒီဇင်ဘာ ၁၀ ၊ ၂၀၁၆
M-Media

ဘားအံမြို့ရှိ လှိုင်းဘွဲ့-ဘားအံမြို့အ၀င်ဂိတ် မှာ ရခိုင်ပြည်နယ်သို့ ပို့ဆောင်မယ့် လက်နက်တွေ နဲ့အတူ ရခိုင်ပြည် လွတ်မြောက်ရေးပါတီ (ALP) အဖွဲ့ဝင် ၃ ဦးကို ဖမ်းဆီးရမိခဲ့ကြောင်း တပ်မတော်ကာကွယ်ရေးဦးစီးချုပ်ရုံးက သတင်းထုတ်ပြန်ပါတယ်။

ကရင်ပြည်နယ် ဘားအံမြို့၊ လှိုင်းဘွဲ့-ဘားအံမြို့အ၀င်ဂိတ်၌ လုံခြုံရေးပူးပေါင်း အဖွဲ့ များက မော်တော်ယာဉ်များအား ရှောင်တခင် စစ်ဆေးရာ ယမန်နေ့ နံနက် ၁၀ နာရီခွဲခန့်တွင် လှိုင်းဘွဲ့မှ ဘားအံဘက်သို့ မောင်းနှင်လာသည့် ယာဉ်အမှတ် YGN 2G/——- ပါကျဲရိုးအမျိုးအစား ခဲရောင် မော်တော် ယာဉ်ပေါ်မှ AK-47 (ခေါက်ဒင်) ၁၅ လက်၊ AK-47 (ဒင်ရှည်) ၄ လက်၊ ၎င်းကျည်အိမ် အတို/အရှည် ၁၉ ခု၊ ၎င်းကျည် ၃၀၀ တောင့်နှင့် ငွေကျပ် သိန်း ၆၀ တို့အား သိမ်းဆည်းရမိခဲ့ကြောင်း သတင်းထုတ်ပြန်ချက်မှာ ဖော်ပြထားပါတယ်။

ဖမ်းဆီးရမိသူများတွင် ရခိုင်ပြည် လွတ်မြောက်ရေးပါတီ (ALP)မှ ဗိုလ်မှူးကြီး အဆင့်ရှိ ခိုင်မိုးချမ်း(ခ) မောင်သာမြင့်၊ စီးပွားရေးတာဝန်ခံ ခိုင်သိန်းဦး ပါဝင်ပြီး ၎င်းတို့၏ထွက်ဆိုချက်အရ ခိုင်မိုးချမ်း(ခ)မောင်သာမြင့် သည် မြ၀တီ-မဲဆောက်သို့ ဒီဇင်ဘာ ၇ ရက်တွင်ရောက်ရှိခဲ့ပြီး ခိုင်သိန်းဦးအား ဒီဇင်ဘာ ၈ ရက်တွင် ရန်ကုန်-မြ၀တီ-လှိုင်းဘွဲ့မှတစ်ဆင့် လော်ခီးလာ သို့ ခေါ်ဆောင်ခဲ့ကြောင်း၊ လော်ခီးလာရှိ ရခိုင်အဖွဲ့ ထံမှ အဆိုပါ လက်နက်ခဲယမ်းများအား ယူဆောင်ပြီး ရခိုင်ပြည်နယ်သို့ပို့ဆောင်ရန် ထွက်ခွာလာစဉ် ယခုကဲ့သို့ ဖမ်းဆီးခံရခြင်းဖြစ်ကြောင်းသိရပါတယ်။

ရခိုင်ပြည် လွတ်မြောက်ရေးပါတီ (ALP) မှာ ပြည်ထောင်စုအစိုးရ အဆင့် အပစ်အခတ်ရပ်စဲရေး ငြိမ်းချမ်းရေး စာချုပ်ချုပ်ကို  ယခင် အစိုးရ သမ္မတဦးသိန်းစိန်လက်ထက်တွင် လက်မှတ်ရေးထိုးထားသော အဖွဲ့ တစ်ဖွဲ့ဖြစ်ပါတယ်။

ref: ဧရာဝတီ