တော်လှန်ရေးကသာ ပါလက်စတိုင်းကို လွတ်မြောက်စေမည်ဟု အီရန်အဓိပတိပြော

ဒီဇင်ဘာ ၁၅၊ ၂၀၁၆
M-Media

– တော်လှန်ရေးလှုပ်ရှားမှု၊ ပါလက်စတိုင်းပြည်သူများ၊ အဖွဲ့များ၏ ရုန်းကန်ကြိုးစားမှုများဖြင့်သာ ပါလက်စတိုင်းမှာ အစ္စရေး၏ ကျူးကျော်သိမ်းပိုက်မှုလက်မှ လွတ်မြောက်မည်ဟု အီရန်အဓိပတိ အယာတိုလာ ဆယဒ် အလီ ခါမေနီက ပြောကြားလိုက်သည်။

အစ္စလာမ့်မစ် ဂျီဟတ် လှုပ်ရှားမှုခေါင်းဆောင် ရမဒန် အဘ်ဒူလာ ဆာလာဟ်နှင့် ယမန်နေ့က မြို့တော် တီဟီရန်၌ တွေ့ဆုံစဉ် ခါမေနီက ယခုကဲ့သို့ ပြောကြားခဲ့ခြင်းဖြစ်ပြီး ယုံကြည်ချက်နှင့် တော်လှန်ရေးစိတ်ဓာတ်ကို အခြေခံသည့် ပါလက်စတိုင်းတို့၏ နိုးကြားမှုများကိုလည်းကို ချီးကျူးခဲ့သည်။

“မြင့်မြတ်တဲ့မြို့တော် အလ်-ကွဒ်စ် လွတ်မြောက်ဖို့ တစ်ခုတည်းသော နည်းလမ်းကတော့ လုံလစိုက်မှုနဲ့ တော်လှန်ရေးလှုပ်ရှားမှုပါပဲ။ အခြားနည်းလမ်းတွေက အသုံးဝင်မှာ မဟုတ်သလို အချည်းအနှီးဖြစ်မှာပါ” ဟု ခါမေနီက ပြောကြားခဲ့သည်။

အစ္စရေးက ကျူးကျော်သိမ်းပိုက်ထားသည့် ပါလက်စတိုင်းပိုင်နက်များ လွတ်မြောက်ရေးအတွက် ပါလက်စတိုင်းလူငယ်များမှာ အရေးပါသော အကြောင်းအရင်းတစ်ခု ဖြစ်နေပြီး အစ္စရေးအစိုးရမှာ နောက်ထပ် ၂၅ နှစ်အတွင်း ပြိုလဲသွားမည်ဟု အီရန်အဓိပတိက မှတ်ချက်ပြုခဲ့သည်။

“အရင်က ကျွန်တော်တို့ ပြောခဲ့သလိုပါပဲ – ပါလက်စတိုင်း ပြည်သူတွေနဲ့ မွတ်စလင်တွေက ဇီယွန်ဝါဒီတွေကို စည်းစည်းလုံးလုံးနဲ့ ဆန့်ကျင်ကြမယ်ဆိုရင် ဇီယွန်အစိုးရဟာ နောက်ထပ် ၂၅ နှစ်အတွင်းမှာ ပျောက်ကွယ်သွားပါလိမ့်မယ်”

ထို့ပြင် မိမိတို့ အီရန်နိုင်ငံအနေဖြင့် ပါလက်စတိုင်းအား ဆက်လက် ထောက်ခံအားပေးသွားမည်ဖြစ်ကြောင်း၊ အရှေ့အလယ်ပိုင်းတွင် လက်ရှိဖြစ်ပွားနေသော ပြဿနာများ၏ နောက်ကွယ်မှ အကြောင်းအရင်းမှာ အမေရိကန်နှင့် မဟာမိတ်များကြောင့်သာဖြစ်ပြီး ဘာသာရေးပြဿနာ၊ စွန်နီ-ရှီအာ ပြဿနာမဟုတ်ကြောင်း ခါမေနီက ထည့်သွင်းပြောကြားခဲ့သည်။

“အဲလစ်ပို၊ မူဆိုးလ်နဲ့ အခြားမြို့တွေက ဆွန်နီတွေကလည်း IS ရာဇ၀တ်ကောင်တွေရဲ့ သတ်ဖြတ်မှုကို ခံနေရတာပါပဲ။ ဒါ့ကြောင့် ဒီပြဿနာတွေဟာ ဆွန်နီနဲ့ ဒါမှမဟုတ် ရှီအာနဲ့ ဘာမှကို မဆိုင်ပါဘူး”

Ref: PressTV