ခရစ်ယာန်ဘုရားကျောင်းကို ၀င်ပစ်သည့် ကန်အမျိုးသားရေးဝါဒီ သေဒဏ်ကျခံရဖွယ် ရှိနေ

ဒီဇင်ဘာ ၁၆၊ ၂၀၁၆
M-Media

ချာလ်စတန် ခရစ်ယာန်ဘုရားကျောင်းကို တိုက်ခိုက်ခဲ့သည့် လူဖြူအမျိုးသားရေးအစွန်းရောက် ဒိုင်လန် ရုဖ်

– ပြီးခဲ့သည့်နှစ်က တောင်ကယ်ရိုလိုင်းနားပြည်နယ် ချာလ်စတန်မြို့ရှိ သမိုင်းဝင် ခရစ်ယာန်ဘုရားကျောင်းတွင် အာဖရိကန်-အမေရိကန် ၉ ဦးအား သေနတ်ဖြင့် ပစ်သတ်ခဲ့သူ လူဖြူအမျိုးသားရေးအစွန်းရောက် ဒိုင်လန် ရုဖ်မှာ အပြစ်ရှိကြောင်း တွေ့ရှိရသည်ဟု တရားရုံးက ဆုံးဖြတ်ခဲ့ပြီး သေဒဏ်ချခံရမည့် အခြေအနေ ရှိနေသည်။

ချာလ်စတန်တရားရုံးက ယမန်နေ့တွင် ၂ နာရီကြာ ကြားနာပြီးနောက် အသက် ၂၂ နှစ်အရွယ် ရုဖ်ကို အသက်သေဆုံးစေခဲ့သည့် အမုန်းရာဇ၀တ်မှုအပါအ၀င် စွဲချက်ပေါင်း ၃၃ ခုအတွက် အပြစ်ရှိကြောင်း ဆုံးဖြတ်ခဲ့ခြင်းဖြစ်သည်။

ချာလ်စတန်ရှိ Mother Emanuel ဟုသိကြသည့် မက်သဒစ် ခရစ်ယာန်ဘုရားကျောင်းမှ သမ္မာကျမ်းစာ လေ့လာမှုအတန်းကို ရုဖ်၏ ၀င်ရောက်ပစ်ခတ်မှုမှာ အမေရိကန်တစ်နိုင်ငံလုံးကို တုန်လှုပ်သွားစေခဲ့ပြီး လူမျိုးရေးခွဲခြားမှုနှင့် သေနတ်ကိုင်ဆောင်ခွင့်တို့အတွက် ဝေဖန်အပြစ်တင်မှုများ ကျယ်ကျယ်လောင်လောင် ပေါ်ထွက်လာခဲ့သည်။

“အဲဒီသူတွေဟာ တိရစ္ဆာန်ထက်မပိုဘူးလို့ သူက ယုံကြည်တာကြောင့် ဒီလို ပစ်သတ်ခဲ့တာပါ။ ဘုရားကျောင်းထဲက သူ့ရဲ့လုပ်ရပ်တွေဟာ သူ့ရဲ့ အမုန်းမီးတောက်လောင်မှုကို ရောင်ပြန်ဟပ်နေပါတယ်” ဟု တရားလိုရှေ့နေ နသ်ဟန် ၀ီလီယံက ပြောကြားခဲ့သည်။

ယခုကဲ့သို့ အပြစ်ရှိကြောင်း တွေ့ရှိခဲ့ရပြီးနောက် နောက်ဆုံးပြစ်ဒဏ်ကို ဇန်န၀ါရီ ၃ ရက်နေ့တွင် ချမှတ်မည်ဖြစ်ပြီး တရားလိုရှေ့နေကမူ သေဒဏ်ချမှတ်ရန် တောင်းဆိုသွားမည်ဟု ပြောကြားခဲ့သည်။

ရုဖ်က ၂၀၁၅ ခုနှစ် ဇွန်လ ၁၇ ရက်နေ့ ၎င်း၏ ထိုတိုက်ခိုက်မှုမှာ လူမည်းများက လူဖြူများအပေါ် ကျူးလွန်ခဲ့သည့် ရာဇ၀တ်မှုများအတွက် လက်စားချေခြင်းဖြစ်သည်ဟု ပြီးခဲ့သည့်တစ်ပတ်တွင် ဗီဒီယိုဖြင့် တရားရုံးတွင် ထွက်ဆိုခဲ့သည်။

တရားခံရှေ့နေ ဒေးဗစ် ဘရက်ကမူ ၎င်း၏အမှုသည်မှာ စိတ်ရောဂါရှိသည်ဟု လျှောက်လဲချက်နောက်ဆုံးတွင် အရိပ်အမြွက် ထည့်သွင်းပြောကြားခဲ့ပြီး လူမျိုးရေးခွဲခြားမှု သဘောထားရှိသည့် မိသားစုတွင် ကြီးပြင်းလာခြင်းမဟုတ်ကြောင်း၊ လူဖြူအမျိုးသားရေး အစွန်းရောက်များနှင့် ဆက်သွယ်မှုမရှိကြောင်း၊ လူမျိုးရေးခွဲခြားမှု အစွန်းရောက်စိတ်ဓာတ်များမှာ အင်တာနက်မှတစ်ဆင့် ၀င်ရောက်လာခြင်းဖြစ်ကြောင်း ခုခံချေပခဲ့သည်။

Ref: Aljazeera