အင်ဒိုမွတ်စလင် တရားဟောဆရာတစ်ဦး ခရစ်ယာန်သာသနာကို စော်ကားမှုဖြင့် အမှုဖွင့်ခံထားရ

ဒီဇင်ဘာ ၂၇၊ ၂၀၁၆
M-Media

အမှုဖွင့်ခံထားရသည့် ဟာဘစ် ရီဇစ် ရှီဟဘ်

– အင်ဒိုနီးရှားရှိ အစ္စလာမ်ဘာသာရေးခေါင်းဆောင်တစ်ဦးမှာ ခရစ်ယာန်ဘာသာကို စော်ကားမှုဖြင့် ရဲစခန်းတွင် အမှုဖွင့်ခံထားရသည်ဟု သိရသည်။

အစ္စလာမ်သာသနာ ကာကွယ်စောင့်ရှောက်သူများ တပ်ဦး (FPI) အဖွဲ့ ခေါင်းဆောင် ဟာဘစ် ရီဇစ် ရှီဟဘ်ဖြစ်ပြီး အင်တာနက်တွင် ပြန့်နှံ့ခဲ့သည့် ၎င်း၏ မိန့်ခွန်းတွင် ခရစ်ယာန်သာသနာကို စော်ကားသည့် ပြောကြားမှု ပါဝင်သည်ဟုဆိုကာ အင်ဒိုနီးရှား ကက်သလစ်ကျောင်းသားများအသင်း PMKRI မှ အမှုဆောင်များက ဂျကာတာရဲတပ်ဖွဲ့ထံ ယမန်နေ့က အမှုဖွင့်ခဲ့ခြင်းဖြစ်သည်။

“ဘုရားသခင်က (ယေရှုကို) မွေးတယ်ဆိုရင် ၀မ်းဆွဲသည်က ဘယ်သူဖြစ်မလဲ” ဟု ရှီဟဘ်က ၎င်း၏ မိန့်ခွန်းတွင် ပြောကြားခဲ့ခြင်းဖြစ်ပြီး ထိုဗီဒီယိုကို လွှင့်တင်ခဲ့သူနှင့် ထိုပြောကြားမှုအား Instagram စာမျက်နှာတွင် ပြန်လည်ရေးသားခဲ့သူ ၂ ဦးမှာလည်း အမှုတွဲတွင် ပါဝင်သည်။

“အင်ဒိုနီးရှားနိုင်ငံသားအားလုံးဟာ အခြားဘာသာတရားတွေရဲ့ ကိုယ်ရေးကိုယ်တာတွေကို စွက်ဖက်တာမျိုး မလုပ်ဘဲ မတူကွဲပြားမှုကို လေးစားသင့်တယ်ဗျ။ ခရစ်ယာန်ဘာသာတရားအကြောင်းကို ခရစ်ယာန်တွေကသာ ပိုသိတာပါ။ ဘာမှမသိတဲ့လူက ပါးစပ်ပိတ်ထားတာ ပိုကောင်းပါတယ်” ဟု PMKRI မှ ဥက္ကဌဖြစ်သူ အန်ဂျလီယက် ၀ါကီ ကာကိုက ပြောကြားခဲ့သည်။

ထို့ပြင် ရှီဟဘ်၏ ထိုပြောကြားမှုအတွက် ခရစ်ယာန်တစ်ယောက်ဖြစ်သည့် မိမိအနေဖြင့် နာကျင်အရှက်ရမိသည်ဟုလည်း ၎င်းက ဆိုသည်။

ရှီဟ်ဘ်မှာ ရာဇ၀တ်မှုဆိုင်ရာပုဒ်မ ၁၅၆(က) ကို ချိုးဖောက်သည်ဟု စွပ်စွဲခံထားရပြီး ပြစ်မှုထင်ရှားပါက အမြင့်ဆုံးထောင်ဒဏ် ၅ နှစ်အထိ ကျခံရနိုင်သည်။

Ref : Jakarta Post