သမိုင်းကြွေးရှိသည့် ပုလဲဆိပ်ကမ်းသို့ ဂျပန်ဝန်ကြီးချုပ် သွားရောက်

ဒီဇင်ဘာ ၂၈၊ ၂၀၁၆
M-Media

– လွန်ခဲ့သည့် ၇၅ နှစ်အရင် ဂျပန်က တိုက်ခိုက်ခဲ့သည့် ပုလဲဆိပ်ကမ်းသို့ ဂျပန်ဝန်ကြီးချုပ် ရှင်ဇိုအာဘေးက ယမန်နေ့တွင် သွားရောက်လည်ပတ်ခဲ့ပြီး အမေရိကန်သမ္မတ ဘာရက်အိုဘားမားနှင့် တွေ့ဆုံခဲ့သည်ဟု သိရသည်။

ဂျပန်၏ ထိုတိုက်ခိုက်မှုကြောင့် အမေရိကန်မှာ ဒုတိယကမ္ဘာစစ်အတွင်း ပါဝင်ခဲ့ပြီး ယခုတွေ့ဆုံမှုမှာ ယခင် ရန်ဘက်ဟောင်းများအကြား ပြန်လည်ရင်ကြားစေ့ရေး လုပ်ငန်းစဉ်အတွက် ခြေလှမ်းတစ်ခုလည်း ဖြစ်သည်။ အာဘေး၏ ထိုသို့သွားရောက်မှုမှာ ရာထူးရှိ ဂျပန်ဝန်ကြီးချုပ်တစ်ဦးက ပုလဲဆိပ်ကမ်းသို့ ပထမဆုံး လည်ပတ်မှုလည်း ဖြစ်သည်။

အိုဘားမား၏ အာရှရေးရာ ထိပ်တန်းအကြံပေးဖြစ်သူ ဒန်နီယဲလ် ကရီတန်ဘရင့်မူ ယခု ဂျပန်ဝန်ကြီးချုပ် သွားရောက်လည်ပတ်မှုနှင့် ယခုနှစ်အစောပိုင်းက အိုဘားမား၏ ဟီရိုရှီးမားသို့ သွားရောက်မှုမှာ မိမိတို့အစိုးရနှင့် လူ့အဖွဲ့အစည်းအကြား အဆင့်တိုင်းတွင် နှစ်ပေါင်းများစွာ ကြိုးစားအားထုတ်မှု၏ ရလဒ်ဖြစ်သည်ဟု ပြောကြားခဲ့သည်။

“ကျဆုံးသွားတဲ့ စစ်သည်တော်တွေ ကောင်းရာသုဂတိလားပါစေ။ ဂျပန်ဝန်ကြီးချုပ်တစ်ယောက်အနေနဲ့ ဒီနေရာမှာ အသက်ဆုံးရှုံးသွားတဲ့သူတွေအတွက် ၀မ်းနည်းကြေကွဲရတယ်လို့ ရင်ထဲအသည်းထဲက ပြောပါရစေ။ ဒီလို ကြောက်စရာစစ်မက်မျိုး နောက်ထပ် ဘယ်တော့မှ ဖြစ်လို့မရပါဘူး” ဟု အာဘေးက ပြောကြားခဲ့သည်။

အိုဘားမားကလည်း အာဘေးကို ကျေးဇူးတင်ကြောင်း ပြောကြားခဲ့ပြီး ယခုလည်ပတ်မှုမှာ ပြန်လည်ရင်ကြားစေ့ရေးစွမ်းအားကို ဖော်ပြနေသည့် သမိုင်းဝင်အမှတ်အသားဖြစ်သည်ဟုလည်း ဆိုသည်။

“ကျွန်တော်တို့ရဲ့ မဟာမိတ်ဖြစ်မှုဟာ ဘယ်တုန်းကမှနဲ့မတူအောင် ခိုင်မာလာပါတယ်။ ကမ္ဘာကြီးမှာ စစ်ပွဲထက် ငြိမ်းချမ်းရေးက ပိုပြီး အကျိုးဖြစ်ထွန်းစရာရှိတယ်ဆိုတာကို ကျွန်တော်တို့ နှစ်ယောက်ရဲ့ အတူယှဉ်တွဲတည်ရှိမှုက ကမ္ဘာကြီးကို သတင်းစကားပေးနေတာပါ” ဟု အိုဘားမားက ပြောကြားခဲ့ပြီး ပုလဲဆိပ်ကမ်းမှာ အမေရိကန်များအတွက် မြင့်မြတ်ရာနေရာဖြစ်သည်ဟုလည်း သမုတ်ခဲ့သည်။

Ref: WSJ, Aljazeera