ပါလက်စတိုင်းတစ်ဦးက ကားဖြင့်ဝင်တိုက်သောကြောင့် အစ္စရေးစစ်သား ၄ ဦး သေဆုံး

ဇန်န၀ါရီ ၈၊ ၂၀၁၇
M-Media

– နိုင်ငံတကာက ပါလက်စတိုင်းပိုင်နက်ဖြစ်ရမည်ဟု သတ်မှတ်ထားသည့် ဂျေရုစလင်တွင် တပ်စွဲထားသော အစ္စရေး တပ်ဖွဲ့ဝင်များကို ပါလက်စတိုင်းတစ်ဦးက ကားဖြင့် ၀င်တိုက်မှုကြောင့် အနည်းဆုံး စစ်သား ၄ ဦး သေဆုံးခဲ့သည်ဟု သိရသည်။

အဆိုပါ ထရပ်ကားဖြင့်တိုက်ခိုက်မှုမှာ ယနေ့တွင် ဖြစ်ပွားခဲ့ခြင်းပြီး ကားမောင်းသမားကို အသေပစ်သတ်ခဲ့သည်ဟု အစ္စရေးအာဏာပိုင်များက ပြောကြားခဲ့သည်။ ထရပ်ကားအောက်တွင် စစ်သား ၁၀ ဦး ညပ်နေခဲ့ပြီး နောက်ပိုင်းတွင် ကယ်ဆယ်နိုင်ခဲ့သော်လည်း ၃ ဦးမှာ ဒဏ်ရာ ပြင်းပြင်းထန်ထန် ရရှိခဲ့သည်။

အစ္စရေးရဲတပ်ဖွဲ့ ပြောရေးဆိုခွင့်ရှိသူ မစ်ကေး ရိုဆန်ဖဲလ်ဒ်ကမူ အတိုက်ခံရသည့်စစ်သားများမှာ ဘတ်စ်ကားတစ်ခုမှ ဆင်းလာစဉ် ထရပ်ကားသမားက ၀င်တိုက်ခဲ့ခြင်းဖြစ်ကြောင်း၊ ယခုဖြစ်ရပ်မှာ မတော်တဆမှုမဟုတ်ဘဲ အကြမ်းဖက်တိုက်ခိုက်မှုဖြစ်ကြောင်း ပြောကြားခဲ့သည်။

ပါလက်စတိုင်းပိုင်နက်များတွင် ကျူးကျော်တပ်စွဲထားသော အစ္စရေးလုံခြုံရေးတပ်ဖွဲ့များ၊ ပါလက်စတိုင်းပိုင်နက်များတွင် ကျူးကျော်ဆောက်လုပ်ထားသော အစ္စရေး၏ တရားမ၀င်အခြေချအိမ်ယာများတွင် နေထိုင်သူများကို ပါလက်စတိုင်များက သေနတ်ဖြင့်ပစ်ခြင်း၊ ဓားဖြင့်ထိုးခြင်း၊ ယာဉ်များဖြင့် တိုက်ခိုက်ခြင်းတို့မှာ လွန်ခဲ့သည့် တစ်နှစ်ခန့်မှစ၍ အများအပြား ဖြစ်ပွားခဲ့ပြီး ဖြစ်ပွားမှုနှုန်းလျော့ကျလာချိန်တွင် ယခုတိုက်ခိုက်မှု ပေါ်ထွက်လာခြင်းဖြစ်သည်။

၂၀၁၅ ခုနှစ် အောက်တိုဘာလက အစ္စရေးလုံခြုံရေးတပ်ဖွဲ့များနှင့် ပါလက်စတိုင်းပိုင်နက်ရှိ အစ္စရေး၏ တရားမ၀င်အိမ်ယာများတွင် နေထိုင်သူများက အလ်-အက်ဆွာ ဗလီဝတ်ကျောင်းတော်ကို ၀င်ရောက်စီးနင်းခဲ့ပြီးနောက် ဖြစ်ပွားခဲ့သော နှစ်ဖက်တိုက်ခိုက်မှုများကြောင့် ပါလက်စတိုင်း ၂၄၇ ဦး၊ လုံခြုံရေးတပ်ဖွဲ့ဝင်အများစုအပါအ၀င် အစ္စရေး ၄၀ ဦး၊ အမေရိကန် ၂ ဦး၊ ဂျော်ဒန်တစ်ဦး၊ အီရစ်ထရီယံတစ်ဦးနှင့် ဆူဒန်တစ်ဦးတို့ သေဆုံးခဲ့သည်။

Ref: Aljazeera