နှစ်နိုင်ငံတည်ရှိရေးသာလျှင် ပါလက်စတိုင်း-အစ္စရေးပြဿနာအတွက် အဖြေဟု ပြင်သစ်သမ္မတပြော

ဇန်န၀ါရီ ၁၆၊ ၂၀၁၇
M-Media

– အစ္စရေး-ပါလက်စတိုင်း ပြဿနာတွင် နှစ်နိုင်ငံတည်ရှိရေးအဖြေသည်သာလျှင် အရှေ့အလယ်ပိုင်းတွင် ရေရှည်ခံမည့် ငြိမ်းချမ်းရေးနှင့် လုံခြုံရေး ရရှိရန်အတွက် တစ်ခုတည်းသော နည်းလမ်းဖြစ်သည်ဟု ပြင်သစ်သမ္မတ ဖရန်ကိုအစ် အော်လွန်းက ပြောကြားလိုက်သည်။

ပါလက်စတိုင်းပြဿနာဖြေရှင်းရေးအတွက် ယမန်နေ့က မြို့တော်ပဲရစ်တွင် ပြုလုပ်ခဲ့သည့် နိုင်ငံတကာအဆင့် အစည်းအဝေးတွင် အော်လွန်းက ယခုကဲ့သို့ ပြောကြားလိုက်ခြင်းဖြစ်သည်။ အဆိုပါညီလာခံသို့ နိုင်ငံပေါင်း ၇၀ ကျော်မှ အစိုးရတာဝန်ရှိသူများ၊ လူမှုအဖွဲ့အစည်းများ တက်ရောက်ခဲ့ကြပြီး အစ္စရေး-ပါလက်စတိုင်းပြဿနာ စားပွဲဝိုင်းပေါ်ပြန်ရောက်ရေး ဆွေးနွေးခဲ့ကြသည်။

“ဒေသတွင်းက သက်တမ်းအရှည်ကြားဆုံးဖြစ်နေတဲ့ ပြဿနာတစ်ခုအတွက် ကျွန်တော်တို့ အဖြေမရှာနိုင်ဘူးဆိုရင် အရှေ့အလယ်ပိုင်းဒေသ တည်ငြိမ်ဖို့ ကျွန်တော်တို့ ဘယ်လို မျှော်လင့်နိုင်တော့မှာလဲ” ဟု ပြင်သစ်သမ္မတက ပြောကြားခဲ့သည်။

ယခုထိပ်သီးအစည်းအဝေးမှာ အစ္စရေး-ပါလက်စတိုင်း ငြိမ်းချမ်းရေးလုပ်ငန်းစဉ်အတွက် ပြီးခဲ့သည့် ၈ လအတွင်း ပြင်သစ်က ဦးဆောင်ပြုလုပ်သည့် ဒုတိယအကြိမ်မြောက် ဆွေးနွေးမှုလည်းဖြစ်သည်။ အဆိုပါအစည်းအဝေးကို အစ္စရေး ၀န်ကြီးချုပ် နေတန်ယာဟုနှင့် ပါလက်စတိုင်းသမ္မတ မဟ်မူဒ် အဘတ်စ်တို့ တက်ရောက်ခြင်းမရှိပေ။

တစ်ရက်တာကြာမြင့်သည့် အဆိုပါအစည်းအဝေးတွင် စီးပွားရေးဆိုင်ရာ ကိစ္စများ၊ အနာဂတ် ပါလက်စတိုင်းနိုင်ငံ ထူထောင်ရေးအတွက် စွမ်းဆောင်ရည်မြှင့်တင်ပေးမှု လုပ်ငန်းစဉ်များအကြောင်း ဆွေနွေးခဲ့ကြသည်။

ပြင်သစ်မှာ ပါလက်စတိုင်းအား အဓိကထောက်ခံအားပေးသူတစ်ဦးဖြစ်ပြီး ၂၀၁၅ ခုနှစ်အတွင်း အကူအညီ ကန်ဒေါ်လာ ၄၃ သန်းဖိုး ပေးအပ်ခဲ့သည်။

ပြင်သစ်သမ္မတ အော်လွန်းကမူ အဆိုပါ ငြိမ်းချမ်းရေးဆွေးနွေးမှုတွင် ပါလက်စတိုင်းနှင့် အစ္စရေးတို့မှ အဖွဲ့ပေါင်း ၁၅၀ ကျော် ပါဝင်ခဲ့ပြီး ရလဒ်ကောင်းများကို တွေ့ခဲ့ရသည်ဟု ပြောကြားခဲ့သည်။

Ref: Aljazeera