ရိုဟင်ဂျာပြဿနာဖြေရှင်းရေး ကူညီရန် အိုအိုင်စီနိုင်ငံများကို မလေးရှား တိုက်တွန်း

ဇန်န၀ါရီ ၁၉၊ ၂၀၁၇
M-Media

မလေးရှားဝန်ကြီးချုပ် နာဂျစ်ရာဇတ်

– မြန်မာနိုင်ငံက ရိုဟင်ဂျာမွတ်စလင်လူနည်းစုတွေ ညှင်းပမ်းနှိပ်စက်ခံနေရမှုကို လုံးဝရပ်တန့်ဖို့အရေး မွတ်စလင်တွေနိုင်ငံတွေက ကူညီဆောက်ရွက်ပေးဖို့ မလေးရှားဝန်ကြီးချုပ် နာဂျစ်ရာဇတ်က ဒီကနေ့မှာ တိုက်တွန်းလိုက်ပါတယ်။

မလေးရှားနိုင်ငံ ကွာလာလမ်ပူမှာပြုလုပ်တဲ့ အိုအိုင်စီ အထူးအစည်းအဝေးမှာ ဒီလိုပြောကြားလိုက်တာဖြစ်ပြီး မြန်မာနိုင်ငံက ရိုဟင်ဂျာတွေ အစုလိုက်အပြုံလိုက် ထွက်ပြေးလာတာက ဒေသတွင်းမှာ မတည်ငြိမ်မှုတွေ ဖြစ်စေတာကြောင့် ဒါဟာ မြန်မာနိုင်ငံရဲ့ ပြည်တွင်းရေးသက်သက် မဟုတ်တော့ဘူးလို့လည်း ပြောဆိုခဲ့ပါတယ်။

ရိုဟင်ဂျာတွေအပေါ် ပြုလုပ်နေတဲ့ အကြမ်းဖက်မှုတွေကို လုံးဝ ရပ်တန့်ရမှာဖြစ်ပြီး အဲဒီလိုမှမဟုတ်ရင် IS အကြမ်းဖက်အဖွဲ့အပါအ၀င် အခြား လက်နက်ကိုင်အဖွဲ့တွေက ရိုဟင်ဂျာတွေကို သွေးဆောင်ဖျားယောင်းသွားနိုင်တယ်လို့လည်း ၀န်ကြီးချုပ်က ဆိုပါတယ်။

“IS လို အကြမ်းဖက်အဖွဲ့အစည်းတွေဟာ ဒီအခြေအနေကို အမြတ်ထုတ်နိုင်တယ်ဆိုတာ အိုအိုင်စီအဖွဲ့ဝင်နိုင်ငံတွေ ကောင်းကောင်းသိပါတယ်”

နောက်ပြီး မြန်မာအစိုးရအနေနဲ့ ခွဲခြားဆက်ဆံမှု၊ တိုက်ခိုက်မှုအားလုံးကို ရပ်တန့်ဖို့ နာဂျစ်က တိုက်တွန်းခဲ့ပြီး အကူအညီတွေဝင်ရောက်ခွင့်ပေးဖို့၊ ဒုက္ခသည်တွေကို အန္တရာယ်ကင်းစွာ အိမ်ပြန်ခွင့်ပေးဖို့လည်း ဆော်သြခဲ့ပါတယ်။

“ဒါမျိုးက လက်ရှိမှာ လုပ်ကိုလုပ်ရမှာပါ။ မြန်မာအစိုးရက ‘လူမျိုးတုန်းသတ်ဖြတ်မှု’၊ ‘လူမျိုးစုလိုက် သုတ်သင်မှု’ ဆိုတဲ့ စကားလုံးတွေအတွက် ငြင်းချက်ထုတ်ပါတယ်။ ဘယ်လိုအသုံးအနှုန်းပဲဖြစ်ဖြစ် ရိုဟင်ဂျာတွေက စောင့်လို့မရတော့ပါဘူး”

ရခိုင်ပြည်နယ်က လူသားချင်းစာနာထောက်ထားမှုဆိုင်ရာနဲ့ လူမှုရေးဆိုင်ရာ စီမံကိန်းတွေအတွက် မလေးရှားက ရင်းဂစ် ၁၀ သန်း (ကန်ဒေါ်လာ ၂.၂၅ သန်း) ထပ်မံလှူဒါန်းသွားမယ်လို့လည်း ၀န်ကြီးချုပ်နာဂျစ်က ထည့်သွင်း ပြောဆိုခဲ့ပါတယ်။

အောက်တိုဘာ လဆန်းပိုင်းက နယ်ခြားစောင့်စခန်းတွေ တိုက်ခိုက်ခံရမှုနောက်ပိုင်း ရခိုင်ပြည်နယ်မြောက်ပိုင်းမှာ အစိုးရစစ်တပ်က ပြုလုပ်ခဲ့တဲ့ စစ်ဆင်ရေးတွေမှာ စစ်သားတွေဟာ ရိုဟင်ဂျာပြည်သူတွေအပေါ် တရားလက်လွတ်သတ်ဖြတ်မှုတွေ၊ အဓမ္မကျင့်မှုတွေနဲ့ နေအိမ်မီးရှို့မှုတွေ ရှိတယ်လို့ သတင်းတွေ ထွက်ပေါ်ခဲ့ပြီး မြန်မာအစိုးရကတော့ ဒါဟာ မဟုတ်မမှန်ဘူးလို့ ငြင်းဆိုထားပါတယ်။

ပြီးခဲ့တဲ့သီတင်းပတ်အနည်းငယ်က ရိုဟင်ဂျာရွာသားတွေကို လုံခြုံရေးတပ်ဖွဲ့တွေက ထိုးကြိတ်ကန်ကျောက် ရိုက်နှက်တဲ့ ဗီဒီယိုမှတ်တမ်းတစ်ခု ထွက်ပေါ်လာခဲ့တာကြောင့် နိုင်ငံတကာက ဝေဖန်သံတွေ ပိုမိုထွက်လာခဲ့ပါတယ်။ အစိုးရကတော့ ဒီလို အပြစ်ကျူးလွန်သူတွေကို အရေးယူထားပြီးပြီလို့ ပြောဆိုခဲ့ပါတယ်။

နာဂျစ်က မြန်မာအစိုးရအနေနဲ့ ရိုဟင်ဂျာတွေအပေါ် ဆက်ဆံမှုဟာ အာဆီယံအဖွဲ့ရဲ့ ဂုဏ်သိက္ခာကို စွန်းထင်းစေတယ်လို့လည်း ဆိုပါတယ်။

အင်ဒိုနီးရှားနိုင်ငံခြားရေးဝန်ကြီး ရက်တနို မာဆူဒီက မိမိတို့အနေနဲ့ ရိုဟင်ဂျာပြဿနာဖြေရှင်းရေး အခန်းကဏ္ဍတစ်ခုကနေ ပါဝင်သွားဖို့ အဆင်သင့်ဖြစ်တာထက်တောင် ပိုနေပြီလို့ ပြောကြားခဲ့ပါတယ်။

မာဆူဒီဟာ သောကြာနေ့မှာ မြန်မာနိုင်ငံကိုလာရောက်ကာ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ တွေ့ဖိုရှိနေပြီး စနေနေ့မှာတော့ ရခိုင်ပြည်နယ်ကို သွားရောက်ဖို့ ရှိနေပါတယ်။

အိုအိုင်စီအဖွဲ့ရဲ့ အထွေထွေအတွင်းရေးမှူး ယူစွဖ် အလ် အိုထိုင်မင်ကလည်း မြန်မာအစိုးရအနေနဲ့ ရိုဟင်ဂျာတွေအပေါ် ခွဲခြားဆက်ဆံမှု၊ စနစ်တကျ ညှင်းပမ်းနှိပ်စက်မှုတွေကို လုံးဝရပ်တန့်ရမယ်လို့ ပြောကြားခဲ့ပါတယ်။

Ref: Aljazeera