UN ကဒ် ကိုင်ထားသည့် ရိုဟင်ဂျာများကို မလေးရှားက တရားဝင်အလုပ်လုပ်ခွင့်ပေးမည်

ဇန်န၀ါရီ ၂၀၊ ၂၀၁၇
M-Media

– ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံး UNHCR မှ ထုတ်ပေးသည့်ကဒ် ကိုင်ဆောင်ထားသူ ရိုဟင်ဂျာ ၅၆၀၀၀ ခန့်ကို ကျွမ်းကျင်မှု နည်းနည်းသာ လိုအပ်သည့် ကဏ္ဍများတွင် အလုပ်လုပ်နိုင်ရန်အတွက် မလေးရှားက လေ့ကျင့်သင်ကြားပေးသွားမည်ဟု သိရသည်။

ဒုတိယ၀န်ကြီးချုပ်ဖြစ်ပြီး ပြည်ထဲရေးဝန်ကြီးလည်းဖြစ်သူ ဒါတွတ် ဆရီ ဒေါက်တာ အဟ်မဒ် ဇာဟစ်ဒ် ဟာမီဒီက အစိုးရအနေဖြင့် ထိုအစီအစဉ်ကို အကောင်အထည်ဖော်ရန် ဆောင်ရွက်နေပြီး ထို့နောက်တွင် ယာယီ အလုပ်လုပ်ကိုင်ခွင့်ကဒ် PLKS လျှောက်ထားနိုင်မည်ဟု ယမန်နေ့က ပါလက်စတိုင်း နိုင်ငံခြားရေးဝန်ကြီး ရီယဒ် အလ်-မာလီကီနှင့် တွေ့ဆုံပြီးနောက် သတင်းထောက်များအား ပြောကြားခဲ့သည်။

ထို့ပြင် ထိုအစီအစဉ်က အလုပ်အကိုင်ကဏ္ဍများတွင် ဥပဒေဘောင်အတွင်းမှ လူ့စွမ်းအားအရင်းအမြစ်ကို ထပ်မံထည့်သွင်းခြင်းဖြစ်ပြီး ရိုဟင်ဂျာလူ့အဖွဲ့အစည်းအား ၀န်ထုတ်ဝန်ပိုးအဖြစ်မှ အသုံးဝင်သူများအဖြစ် အမြင်ပြောင်းလဲစေလိမ့်မည်ဟုလည်း ၀န်ကြီးက ထည့်သွင်းပြောဆိုခဲ့သည်။

“လေ့လာမှုတွေ လုပ်နေတယ်။ မကြာမီကြေငြာသွားမှာပါ”

ပါလက်စတိုင်းနိုင်ငံခြားရေးဝန်ကြီးမှာ ကွာလာလမ်ပူမြို့တွင် ကျင်းနေသည့် ရိုဟင်ဂျာမွတ်စလင်ဆိုင်ရာ အိုအိုင်စီ အထူးအစည်းအဝေးသို့ တက်ရောက်ရန် ရောက်ရှိနေခြင်းဖြစ်သည်။

Ref: New Straits Times