အမေရိကန်စီးပွားရေးကျမှုမှာ စစ်တိုက်နေခြင်းကြောင့်ဟု တရုတ်ဘီလီယံနာ ပြော

ဇန်န၀ါရီ ၂၀၊ ၂၀၁၇
M-Media

အလီဘာဘာ အွန်လိုင်းရှော့ပင်းပိုင်ရှင် တရုတ်ဘီလီယံနာ ဂျက်မာ

– အမေရိကန်အတွင် အလုပ်အကိုင်များလျော့ကျကာ စီးပွားရေးကျဆင်းမှုမှာ ဂလိုဘယ်လိုက်ဇေးရှင်းနှင့် အခြားနိုင်ငံများကြောင့်မဟုတ်ဘဲ အမေရိကန်အစိုးရအဆက်ဆက်က ဘက်ဂျက်များ မလျော်မကန်သုံးစွဲမှု၊ စစ်ပွဲများတွင် အလွန်အကျွံ ငွေကြေးသုံးစွဲမှုတို့ကြောင့် ဖြစ်သည်ဟု အလီဘာဘာ ကုမ္ပဏီကို တည်ထောင်သူ တရုတ် ဘီလီယံနာ ဂျက်မာက ပြောကြားလိုက်သည်။

ယနေ့တွင် ကျမ်းသစ္စာကျိန်ဆိုမည့် အမေရိကန်သမ္မတ ဒေါ်နယ်ထရမ့်က အမေရိကန်တွင် အလုပ်အကိုင်များ၊ စက်မှုလုပ်ငန်းများ ဆုံးရှုံးရခြင်းမှာ မက္ကဆီကိုနှင့် တရုတ်တို့ကဲ့သို့ နိုင်ငံများက ခွဲဝေယူထားခြင်းကြောင့် ဖြစ်သည်ဟု ပြောကြားမှုကို မာက ယခုကဲ့သို့ ပြန်လည်တုန့်ပြန်လိုက်ခြင်း ဖြစ်သည်။

“အတိတ်ကိုပြန်ကြည့်ရင် အမေရိကန်ဟာ စစ်ပွဲပေါင်း ၁၃ ခုကို စစ်နွှဲခဲ့ပြီး ဒေါ်လာ ၄၀.၂ ထရီလီယံလောက် ကုန်ကျခဲ့ပါတယ်။ အဲဒီငွေကြေးထဲက တစ်စိတ်တစ်ပိုင်းလောက်ကို အခြေခံအဆောက်အဦးတွေ အဆင့်မြှင့်တင်တာမျိုး၊ ကာယလုပ်သား၊ ဉာဏလုပ်သားတွေကို ကူညီတာမျိုးမှာ ဘာဖြစ်လို့ မသုံးတာလဲ။ ဘယ်လောက်ပဲ မဟာဗျူဟာ ကျနေပါစေ ပိုက်ဆံကိုတော့ ကိုယ့်ပြည်သူတွေအတွက် သုံးစွဲရမှာပါ” ဟု မာက ဒါဗို့စ်မြို့တွင် ပြုလုပ်ခဲ့သည့် ကမ္ဘာ့စီးပွားရေးဖိုရမ်တွင် ယမန်နေ့က ပြောကြားခဲ့သည်။

ထို့ပြင် ၂၀၀၈ ခုနှစ် ဘဏ္ဍာရေးအကြပ်အတည်းကာလက အမေရိကန်တစ်နိုင်ငံတည်းမှာပင် ဒေါ်လာ ၁၉.၂ ထရီလီယံ ဆုံးရှုံးခဲ့ပြီး ကမ္ဘာတစ်ဝှမ်း အလုပ်အကိုင်ပေါင်း ၃၄ သန်း ဆုံးရှုံးခဲ့ကြောင်း၊ စစ်တိုက်မည့်ငွေကြေးများကို ထိုဆုံးရှုံးမှုများ ကာမိရန် သုံးစွဲပါက အပြောင်းအလဲများစွာ ဖြစ်ပေါ်လာနိုင်ကြောင်းလည်း မာက ထပ်လောင်း ပြောဆိုခဲ့သည်။

Stockholm International Peace Research Institute ၏ စစ်တမ်းများအရ အမေရိကန်မှာ ၂၀၁၅ ခုနှစ်တွင် နိုင်ငံ၏ ဂျီဒီပီ၏ ၃.၃ ရာခိုင်နှုန်း ကန်ဒေါ်လာ ၅၉၆ ဘီလီယံကို စစ်ပွဲများတွင် သုံးစွဲခဲ့ပြီး ကမ္ဘာပေါ်တွင် စစ်အသုံးစားရိတ် အမြင့်ဆုံးနိုင်ငံ ဖြစ်သည်။ မာကမူ ထိုကဲ့သို့ သုံးစွဲမှုများကြောင့်သာ အမေရိကန်တွင် အလုပ်အကိုင်ဆုံးရှုံးမှု ဖြစ်စေခဲ့သည်ဟု ယူဆနေသည်။

“ဒါပဲလေ။ ဘယ်နိုင်ငံကမှ ခင်ဗျားတို့ဆီက အလုပ်တွေကို ခိုးသွားတာမဟုတ်ဘူး။ ခင်ဗျားတို့ရဲ့ ဗျူဟာကြောင့် ဒီလိုဖြစ်တာပဲ။ ပိုက်ဆံကို သင့်လျော်တဲ့ နည်းလမ်းနဲ့မှ မသုံးတာ”

ဇန်န၀ါရီလ အစောပိုင်းက ဒေါ်နယ်ထရမ့်နှင့် တွေ့ဆုံခဲ့သည့် မာက ဂလိုဘယ်လိုက်ဇေးရှင်းကို အကောင်းမြင်နေပြီး ကမ္ဘာကြီးနှင့် တရုတ်နိုင်ငံတို့အတွက် အကျိုးရှိကြောင်း၊ သို့သော်လည်း ကမ္ဘာ့ ကုန်သွယ်ရေးအဖွဲ့ (WTO) က လက်ရှိတွင် ဆောင်ရွက်နေသည့် စနစ်ထက် အငယ်စား စီးပွားရေးလုပ်ငန်းများအတွက် အခွင့်အလမ်း ပိုမိုဖန်တီးပေးရမည်ဖြစ်ကြောင်း ထည့်သွင်းပြောကြားခဲ့သည်။

Ref: RT