သူမနှင့် တွေ့ဆုံသူများ လက်တုန့်ပြန်ခံရမည့်အရေး စိုးရိမ်မိသည်ဟု ယန်ဟီးလီပြော

ဇန်န၀ါရီ ၂၅၊ ၂၀၁၇
M-Media

– မြန်မာနိုင်ငံသို့ ဇန်န၀ါရီ ၉ ရက်နေ့မှ ၂၁ ရက်နေ့အထိ လာရောက်မှုအတွင်း တွေ့ဆုံခဲ့သူများအပေါ် ဖြစ်လာနိုင်သည့် ပြန်လည်လက်တုန့်ပြန်မှုများအတွက် စိုးရိမ်မိသည်ဟု မြန်မာနိုင်ငံ၏ လူ့အခွင့်အရေးဆိုင်ရာ အထူးကိုယ်စားလှယ် ယန်ဟီးလီက ယနေ့တွင် ပြောကြားလိုက်သည်။

“လာရောက်လည်ပတ်စဉ်အတွင်းမှာ ကျွန်မစိတ်ထဲ စွဲနေတဲ့ စကားလုံးတစ်လုံး ရှိပါတယ်။ ဒါက ‘လက်တုန့်ပြန်မှု’ ဆိုတာပါပဲ။ ကျွန်မနဲ့တွေ့ပြီး စကားပြောခဲ့တဲ့သူတွေ၊ အစိုးရကို ဝေဖန်ခဲ့တဲ့သူတွေ၊ အခြားသူတွေရဲ့ အခွင့်အရေးတွေအတွက် ကာကွယ်ပေးသူတွေ၊ လုပ်ပေးနေသူတွေ၊ အာဏာပါဝါရှိသူတွေရဲ့ ပြောဆိုမှုတွေနဲ့ တစ်ခြားစီဖြစ်နေတဲ့ ယူဆချက်တွေ၊ ခံစားချက်တွေကို ပြောပြတဲ့သူတွေနဲ့ပတ်သက်ပြီး ကျွန်မ အလွန်အမင်း စိုးရိမ်မိပါတယ်” ဟု ယန်ဟီးလီက ပြောကြားခဲ့သည်။

ထို့ပြင် ရခိုင်ပြည်နယ်မြောက်ပိုင်း မောင်တောမြို့နယ်ရှိ ရွာများတွင် လုံခြုံရေးတပ်ဖွဲ့များက ပြုလုပ်နေသည့် အကြမ်းဖက်တိုက်ဖျက်မှု စစ်ဆင်ရေးတွင် အနည်းငယ် ငြိမ်သက်သွားပြီးနောက်ပိုင်း မိမိ သွားရောက်လည်ပတ်ခဲ့သည့် နေရာအနီး အပါအ၀င် ကျေးရွာအများအပြားတွင် စီးနင်းဖမ်းဆီးမှုများ ပြုလုပ်နေသည်ဆိုသည့် သတင်းများကို ကြားရခြင်းမှာ စိုးရိမ်စရာဖြစ်ကြောင်း အထူးကိုယ်စားလှယ်က ပြောကြားခဲ့သည်။

ယခုနောက်ဆုံး ထွက်ပေါ်လာသည့် အဆိုပါ စီးနင်းမှုများတွင် တရားလက်လွတ်ဖမ်းဆီးခြင်း၊ ထိန်းသိမ်းခြင်းတို့ ရှိသည်ဟု သတင်းများ ထွက်ပေါ်ခဲ့သည်။

၁၂ ရက်ကြာ မြန်မာနိုင်ငံခရီးစဉ်အတွင်း ကုလအထူးကိုယ်စားလှယ်မှာ ရခိုင်ပြည်နယ်တွင် အောက်တိုဘာ ၉ ရက်နေ့က နယ်ခြားစောင့်စခန်းများ အကြမ်းဖက်တိုက်ခိုက်ခံရသည့် ဒေသ၊ ကချင်ပြည်နယ်တွင် မြစ်ကြီးနားမြို့၊ မွန်ပြည်နယ်တွင် အလုပ်ကြမ်းစခန်းတို့ကို သွားရောက်ခဲ့သည်။ ကချင်ပြည်နယ်ရှိ လိုင်ဇာနှင့် ဖားကန့်ဒေသများသို့ သွားရောက်ရန် တောင်းဆိုမှုအား မြန်မာအစိုးက လုံခြုံရေးအကြောင်းပြချက်ဖြင့် ခွင့်မပြုခဲ့ပေ။

ခရီးစဉ်ပြီးဆုံးပြီးနောက် သတင်းစာရှင်းလင်းပွဲတွင် ယန်ဟီးလီမှာ ကချင်ပြည်နယ်နှင့် ရခိုင်ပြည်နယ်တွင် အစိုးရစစ်တပ်၏ လွန်လွန်ကျူးကျူးတုန့်ပြန်မှုများအတွက် ရှုတ်ချခဲ့သည်။

ယခုခရီးစဉ်နှင့်ပတ်သက်သည့် အစီရင်ခံစာကို ကုလသမဂ္ဂ လူ့အခွင့်အရေးကောင်စီသို့ ၂၀၁၇ ခုနှစ် မတ်လတွင်တင်သွင်းမည် ဖြစ်သည်။

Ref: OHCHR.org