အစ္စရေး သူလျှို ၅ ဦးကို လက်ဘနွန်ဖမ်းဆီး

ဇန်န၀ါရီ ၂၆၊ ၂၀၁၇
M-Media

လက်ဘနွန် လုံခြုံရေးဆိုင်ရာ အတွင်းဝန်ရုံး၏ တံဆိပ်

– အစ္စရေး ထောက်လှမ်းရေးအဖွဲ့ဖြစ်သော မော့ဆက်အတွက် အလုပ်လုပ်ပေးနေသူ သူလျှို ၅ ဦးကို မိမိတို့က ဖမ်းဆီးလိုက်သည်ဟု လက်ဘနွန် လုံခြုံရေးဆိုင်ရာ အတွင်းဝန်ရုံး မီဒီယာဌာနက ယမန်နေ့တွင် သတင်းထုတ်ပြန်လိုက်သည်။

လက်ဘနွန်နိုင်ငံသား ၂ ဦး၊ လက်ဘနွန်တွင် မွေးဖွားသည့် ပါလက်စတိုင်း ဒုက္ခသည်တစ်ဦး၊ နီပေါနိုင်ငံသား ၂ ဦးတို့ ဖြစ်ကြပြီး တူရကီ၊ ဂျော်ဒန်၊ ဗြိတိန်နှင့် နီပေါနိုင်ငံများရှိ အစ္စရေးသံရုံးများမှတစ်ဆင့် သတင်းအချက်အလက်များကို ပေးပို့ခဲ့သည်ဟု ၎င်းတို့က ၀န်ခံခဲ့ကြောင်း ထုတ်ပြန်ကြေငြာချက်တွင် ဖော်ပြထားသည်။

သူလျှိုကွန်ယက်များကို ဖြိုခွဲရေး ဆောင်ရွက်မှုအဖြစ် လက်ဘနွန်နိုင်ငံအတွင်း မော့ဆက်အဖွဲ့၏ ထောက်လှမ်းရေးဆိုိင်ရာ လုပ်ငန်းများကို အသေအချာ စောင့်ကြည့်လေ့လာပြီးနောက်ပိုင်း အဆိုပါစပိုင်များကို ဖမ်းဆီးခဲ့ခြင်းဖြစ်ပြီး၊ နီပေါမှ သူလျှိုနှစ်ဦးမှာ လက်ဘနွန်ရှိ အခြားသော နီပေါအလုပ်သမားများကို လူသစ်စုဆောင်းနေသည်ဟု ဆိုသည်။

“စစ်ကြောမှုပြီးတဲ့နောက်ပိုင်းမှာ ဖမ်းဆီးထားသူတွေကို အစ္စရေးစစ်တပ်နဲ့ ပူးပေါင်းဆောင်ရွက်မှုအတွက် တရားရုံးကို လွှဲပြောင်းပေးခဲ့ပြီး အခြားပါဝင်သူတွေကို ဖမ်းဆီးဖို့ ဆောင်ရွက်နေပါတယ်” ဟု ကြေငြာချက်တွင် ဖော်ပြထားသည်။

Ref: Press TV