ဆော်ဒီတွင် ပထမဆုံး ‘အမျိုးသမီးများနေ့’ ကျင်းပ

ဖေဖော်ဝါရီ ၄၊ ၂၀၁၇
M-Media

– နိုင်ငံ၏ သမိုင်းတွင် ပထမဆုံးအဖြစ် ဆော်ဒီမှာ ‘အမျိုးသမီးများနေ့’ ကို ဗုဒ္ဓဟူးနေ့တွင် ကျင်းပခဲ့ပြီး ၃ ရက်တာ ကြာမြင့်ခဲ့သည်ဟု သိရသည်။

အဆိုပါ အခမ်းအနားကို ရီယာ့ဒ်ရှိ ‘ဘုရင်ဖာဟဒ် ယဉ်ကျေးမှုစင်တာ’ က ဦးစီးကာ ကျင်းပပြုလုပ်ခြင်းဖြစ်ပြီး အမျိုးသမီးသီးသန့်သာ တက်ရောက်ခွင့်ရခဲ့သည်။

“ဆော်ဒီအမျိုးသမီးတွေနဲ့ သူတို့ရဲ့ အောင်မြင်တဲ့အခန်းကဏ္ဍကို ကျွန်တော်တို့ ဂုဏ်ပြုဖို့၊ ပြီးတော့ ပညာရေး၊ ယဉ်ကျေးမှု၊ ဆေးဘက်၊ စာပေနဲ့ အခြားသော နယ်ပယ်တွေမှာ ဆော်ဒီအမျိုးသမီးတွေရဲ့ အောင်မြင်မှုတွေကို အမှတ်ရစေဖို့ပါ” ဟု စင်တာ၏ ကြီးကြပ်သူ မိုဟာမက် အလ်-ဆအစ်ဖ်က ပြောကြားခဲ့သည်။

ဆော်ဒီအမျိုးသမီးများ နိုင်ငံ၏ကဏ္ဍတိုင်းတွင် အရေးပါသည့်နေရာမှ ပါဝင်မှုကို မီးမောင်းထိုးပြရန်အတွက် ဆော်ဒီယဉ်ကျေးမှုနှင့် ပြန်ကြားရေးဝန်ကြီးဌာန၏ ညွှန်ကြားမှုဖြင့် အဆိုပါအမျိုးသမီးများနေ့ကို ကျင်းပခြင်းဖြစ်သည်။

အခမ်းအနားပြုလုပ်ရာ ‘ဘုရင်ဖာဟဒ် ယဉ်ကျေးမှုစင်တာ’ တွင် ဆော်ဒီအမျိုးသမီးများ၏ အနုပညာလက်ရာများကိုလည်း ပြသထားသည်။

ထို့ပြင် ဆွေးနွေးပွဲများလည်း ပြုလုပ်ခဲ့ပြီး ဆော်ဒီတော်ဝင်အသိုင်းအ၀ိုင်းမှ မင်းသမီးများ ပါဝင်ကာ ပညာရေး၊ ကျန်းမာရေးနှင့် ဥပဒေကဏ္ဍတို့အပါအ၀င် ကဏ္ဍပေါင်းများစွာကို ဆွေးနွေးခဲ့ကြသည်။

Ref: Arabnews