မြန်မာနိုင်ငံသည် အလက်ပိုဖြစ်စဉ်နောက် လိုက်နင်းနေပြီလော ?

ဖေဖော်ဝါရီ ၅၊ ၂၀၁၇

M-Media

ဘင်္ဂလားဒေ့ရ်ှရှိ Kutalong ရိုဟင်ဂျာဒုက္ခသည်စခန်းတွင် နေထိုင်လျက်ရှိသော ဂျမလီဒါး ဘီဂမ်းနှင့် သူမကလေးငယ်များ

– စစ်တပ်က ကြောက်ခမန်းလိလိ ရှေ့ဆက်လွှမ်းမိုးထားသည့် မြန်မာနိုင်ငံအတွင်း၌ စစ်အုပ်ချုပ်ရေးမှ ဒီမိုကရေစီသို့ အသွင်ကူးပြောင်းရေးမှာ မသေမချာနှင့် အလှမ်းကွာနေဆဲ။ ရခိုင်ပြည်နယ်ရှိ ရိုဟင်ဂျာမွတ်စ်လင်မ်စစ်သွေးကြွများအပေါ် ပြုလုပ်လိုက်သော စစ်ဆင်ရေးသည် အရပ်သားပေါင်း ခြောက်သောင်းခွဲခန့်ကို ဘင်္ဂလားဒေ့ရ်ှနယ်စပ်သို့ အလွတ်ရုန်းထွက်ပြေးစေခဲ့သည်။ ထိုဖြစ်စဉ်ဝယ် အုပ်စုဖွဲ့မုဒိမ်းကျင့်မှု၊ နှိပ်စက်ညှင်းပန်းမှု၊ အပြစ်မဲ့အရပ်သားများအပေါ် သတ်ဖြတ်မှု သတင်းများလည်း ဖြစ်ပေါ်နေသည်။ လူ ၉၀ ၀န်းကျင် သေဆုံးရသည်။ ဤသည်မှာ တိုင်းပြည်ကို ပဲ့ထိန်းမောင်းနှင်နေသူ မြန်မာ့ဒီမိုကရေစီခေါင်းဆောင် ဒေါ်အောင်ဆန်းစုကြည်အတွက်သာမက မြန်မာ၏ ပြည်ပမိတ်ဖက်များအတွက်လည်း စိန်ခေါ်ချက်တစ်ရပ် ဖြစ်စေသည်။

နှစ်ရှည်လများ ဒုက္ခခံစားနေရသော လူနည်းစုဝင်ရိုဟင်ဂျာများအပေါ် အားပေးစကား ထုတ်ဖော်ပြောဆိုရန် ကျွန်ုပ်တို့မှ ဒေါ်အောင်ဆန်းစုကြည်အား တိုက်တွန်းထားပါသည်။ ယခုအခါ သူမသည် အတိုက်အခံဘ၀မှ သူမတိုင်းပြည်၏ နိုင်ငံရေးခေါင်းဆောင်အဖြစ်သို့ ဖြတ်ကျော်လာခဲ့ပြီးဖြစ်သည်။ သူမအနေနှင့် နိုဗဲလ်ဆုရှင်တစ်ဦး၏ စိတ်ဓာတ်နှင့် ခံယူချက်အတိုင်း ထိုက်သင့်သမျှ စွဲမြဲရပ်တည်လျက် ရှိနေသင့်သည်ဟု ကျွန်ုပ်တို့ ယူဆပါသည်။ ထို့ပြင် ပြစ်တင်ကဲ့ရဲ့မှုများ အဆုံးသတ်စေရန် ဒေသတွင်း သတင်းအချက်အလက်များ၊ စုံစမ်းစစ်ဆေးမှုများကို ပွင့်လင်းမြင်သာစေခြင်း အပါအ၀င် သူမ တတ်နိုင်သလောက် ဆောက်ရွက်သင့်သည်။ သို့သော် ရိုဟင်ဂျာများအပေါ် စစ်တပ်၏ရက်စက်စော်ကားမှုများ ဆက်လက်ဖြစ်ပေါ်နေခြင်းကြောင့် စစ်ဗိုလ်ချုပ်များအား ပထမဦးဆုံး အရေးယူရပါမည်။ အဆိုပါ စစ်ဗိုလ်ချုပ်များသည် ပါလီမန်နေရာ လေးပုံတစ်ပုံရယူထားခြင်းနှင့်အတူ ဗုဒ္ဓဘာသာဝင် လူများစုတိုင်းပြည်၏ အာဏာအဆောက်အဦအား လွှမ်းမိုးကြီးစိုးထားကြဆဲဖြစ်သည်။

ရိုဟင်ဂျာသူပုန်အုပ်စုသစ်တစ်ခုသည် ရခိုင်ပြည်နယ်မြောက်ပိုင်း ဘင်္ဂလားဒေ့ရ်ှနယ်စပ်အနီးရှိ ကင်းစခန်းသုံးကို ၀င်ရောက်တိုက်ခိုက်ပြီး ရဲအရာရှိ ကိုးဦးကို သေဆုံးစေခဲ့သော အောက်တိုဘာ ၉ ရက်မှ စတင်၍ နောက်ဆုံး ပဋိပက္ခ စတင်လာသည်။ The International Crisis Group ၏အဆိုအရ ၎င်းအုပ်စုမှာ စနစ်တကျ ဖွဲ့စည်းလေ့ကျင့်ထားပြီး Harakah al-Yaqin ဟု ပညတ်ထားကြောင်း၊ ရိုဟင်ဂျာစစ်သွေးကြွများက ပြောက်ကျားစစ်ဆင်ရေးနည်းဗျူဟာသုံး၍ အကြမ်းဖက်တိုက်ခိုက်တတ်ကြောင်း သိရသည်။ ထိုအချိန်မှစပြီး စစ်တပ်ကလည်း ကျေးရွာများကို အကြီးအကျယ် ဖျက်ဆိးခြင်း၊ အရပ်သားများကို ရက်စက်ခြင်းတို့ဖြင့် ပြင်းထန်ကြမ်းတမ်းစွာ ပြန်လည်တုန့်ပြန်ခဲ့သည်။ ၎င်းစော်ကားချက်များအပေါ် စွပ်စွဲမှုများကို အစိုးရဖက်မှ ငြင်းဆိုထားသော်လည်း လူ့အခွင့်အရေးဆိုင်ရာ စုံစမ်းစစ်ဆေးကြသူများနှင့် ဂျာနယ်လစ်များအား အဆိုပါမြင်ကွင်းမှ တားမြစ်ကန့်သတ်လျက် ရှိနေပြန်သည်။

ပြင်ပဖိအားများလည်း အတော်အတန် သက်ရောက်လာသဖြင့် ဤသည်မှာ အလွန်သိမ်မွေ့သည့် အချိန်အခါသို့ ဆိုက်ရောက်နေပြီဖြစ်သည်။ အိုဘားမားအစိုးရက မြန်မာနိုင်ငံ၏ဒီမိုကရေစီဖော်ဆောင်ရေးလမ်းစဉ်ကို ချီးကျူးဂုဏ်ပြုခဲ့သည်၊ ပိတ်ဆို့မှုများကို ဖယ်ရှားပေးခဲ့သည်၊ အထူးခရီးစဉ်ဖြင့်ပင် ရောက်လာပြီး အားပေးခဲ့သည်။ သမ္မတသစ် ဒေါ်နယ်ထရမ့်သည် ကြိတ်ဖတ် ကဲ့သို့ဖြစ်နေသည့် ဤလူသား၏ ဒုက္ခများအတွက် စာနာမှု မည်သို့ရှိမည်ကို ကျွန်ုပ်တို့ မသိနိုင်သေးပါ။ သူနှင့် သူ၏ခန့်အပ်ခံပုဂ္ဂိုလ်များက လူ့အခွင့်အရေးကိစ္စများအပေါ် စိတ်အားထက်သန်မှု မပြသသေးသလို သူကိုယ်တိုင်က ခေါင်းမာပြင်းထန်သူ ဖြစ်လို့နေသည်။ သို့ရာတွင် အမေရိကန်ပြည်ထောင်စုအနေနှင့် မြန်မာ့လူ့အဖွဲ့အစည်း၏ ဒီမိုကရေစီခရီးစဉ်အတွက် ကြီးမားစွာ ပေးကမ်းထားပြီးသည့်အပြင် ယိုင်နဲ့နေသော ဒေါ်အောင်ဆန်းစုကြည်၏အနေအထားကို မဖြိုလှဲဘဲ ထပ်မံပံ့ပိုးပေးရန်လည်း ရှိနေသည်။ ရခိုင်ပြည်နယ်ရှိ ပဋိပက္ခမှာ ကုလသမဂ္ဂအဖွဲ့အစည်းမှ ပြင်းထန်သော တုန့်ပြန်မှုတစ်ရပ် ဆောင်ရွက်သင့်ပေသည်။

အနောက်တိုင်းနိုင်ငံများရှိ ရေဒါမျက်နှာပြင်ပေါ် ရောက်ရှိမလာသေးသော ရိုဟင်ဂျာလူထု၏ ပြင်းထန်ဆိုးဝါးသည့် ဒုက္ခဝေဒနာများလည်း ရှိနေဦးမည်။ ယင်းအကြမ်းဖက်မှုအတိုင်းအတာမှာ သေးငယ်လင့်ကစား “အာရှ၏အလက်ပို” ဖြစ်ရန် နီးစပ်လာနေပြီ။ လက်နက်ကိုင်သူပုန်တပ်ဖွဲ့တစ်ခု ထွက်ပေါ်ရန် တာစူနေပြီ၊ တအုံတကျင်းသော အပြစ်မဲ့ပြည်သူများ ကယ်ကူရာမဲ့ဘ၀သို့ ရောက်ရှိနေကြသည်၊ ဘာသာရေးကို ပစ်မှတ်ထားခံနေရသည်၊ အင်အားကြီးသည့် စစ်တပ်က ပြင်းထန်စွာ လိုက်လံချေမှုန်းနေသည်။ ဤသည်မှာ လူသားအားလုံးကို စိုးရိမ်သောက ရောက်စေသည့် ယမ်းအိုးတစ်လုံးပင် ဖြစ်ပါတော့သည်။

×××××××××××××××

The Washington Post ၏ အယ်ဒီတာ့အာဘော် Asia’s version of Aleppo is happening in Burma ကို မြင့်မိုရ်မောင်မောင် မှ ဆီလျော်အောင် ပြန်ဆိုသည်။