ထရမ့်က အမေရိကန်၏ သရုပ်မှန်ကို ဖွင့်ပြခဲ့သည်ဟု အီရန်အဓိပတိပြော

ဖေဖော်ဝါရီ ၇၊ ၂၀၁၇
M-Media

– အမေရိကန်၏ သရုပ်မှန်ကို ဖွင့်ချလိုက်သည့်အတွက် သမ္မတသစ် ဒေါ်နယ်ထရမ့်ကို ကျေးဇူးတင်မိသည်ဟု အီရန်အဓိပတိ အယာတိုလာ အလီ ခါမေနီက ပြောကြားလိုက်သည်။

“ဒီလူကြီးကို ကျွန်တော်တို့ ကျေးဇူးတင်ပါတယ်။ သူဟာ အမေရိကရဲ့ သရုပ်မှန်ကို ဖွင့်ပြလိုက်တာပါ။ အမေရိကန်ရဲ့ အုပ်ချုပ်ရေးစနစ်မှာ နိုင်ငံရေး၊ စီးပွားရေး၊ အကျင့်စာရိတ္တနဲ့ လူမှုရေးဆိုင်ရာ ခြစားနေတာ ရှိတယ်လို့ ကျွန်တော်တို့ နှစ်ပေါင်း ၃၀ ကျော်လောက် ပြောခဲ့တာ အဲဒါပါပဲ။ ဒါကို ဒီလူကြီးက ရွေးကောက်ပွဲနဲ့ ရွေးကောက်နောက်ပိုင်းမှာ ပွင့်ပွင့်လင်းလင်း ယူလာခဲ့တာပါ” ဟု ခါမေနီက အင်္ဂါနေ့ မြို့တော်တီဟီရန်တွင် စစ်တပ်အရာရှိများအား ပြောကြားသည့် မိန့်ခွန်း၌ ထည့်သွင်းပြောဆိုခဲ့သည်။

ထရမ့်၏ ဗီဇာပိတ်ပင်သည့်အမိန့် ထွက်ပေါ်လာပြီးနောက် အမေရိကန်လေဆိပ်တွင် အီရန်ကလေငယ်တစ်ဦး လက်ထိပ်ခပ် ဖမ်းဆီးခံရသည့် ဓာတ်ပုံကို ရည်ညွှန်း၍ ခါမေနီက “အသက် ၅ နှစ်အရွယ် ကလေးငယ်လေးကို လက်ထိပ်ခတ်တဲ့ သူ့ရဲ့လုပ်ရပ်ဟာ အမေရိကန် လူ့အခွင့်အရေးရဲ့ အဓိပ္ပါယ်အစစ်အမှန်ကို ပြသလိုက်တာပါပဲ” ဟု ပြောကြားခဲ့သည်။

ထရမ့်က အီရန်မှာ မီးနှင့်ကစားနေပြီး၊ အိုဘားမား၏ ကြင်နာမှုကိုပင် မကျေနပ်နိုင်သေးဟု ဖေဖော်ဝါရီ ၃ ရက်နေ့တွင် Twitter စာမျက်နှာ၌ ရေးသားခဲ့ပြီး ခါမေနီက အိုဘားမားကို ကျေးဇူးမတင်နိုင်ကြောင်း၊ အိုဘားမားမှာ အီရန်အပေါ် ပိုမိုဆိုးရွားစေသည့် ပိတ်ဆို့မှုများကို ပြုလုပ်ခဲ့ပြီး အီရတ်နှင့် ဆီးရီးယားတို့တွင် မတည်မငြိမ်ဖြစ်အောင်လုပ်ကာ IS အကြမ်းဖက်အဖွဲ့ ပေါ်ပေါက်လာရေးကို ကူညီခဲ့သူဖြစ်ကြောင်း ပြန်လည်တုန့်ပြန်ခဲ့သည်။

ခါမေနီ၏ ယခုပြောကြားမှုမှာ အီရန်၏ ထိပ်ဆုံး အာဏာပိုင်တစ်ဦးက ထရမ့်ကို ပထမဆုံး တိုက်ရိုက်တုန့်ပြန်ခြင်းလည်းဖြစ်သည်။ ယခင်က အီရန်နှင့် အင်အားကြီး ၆ နိုင်ငံတို့၏ နျူအရေး သဘောတူညီချက်နှင့် စပ်လျဉ်း၍ ထရမ့်က ကြေငြာချက်ထုတ်ပြန်မှုကို အီရန်သမ္မတ ဟာဆန်ရူဟာနီက စောစောပိုင်းက ဝေဖန်ထားဖူးသည်။

Ref: Aljazeera