ဒူဘိုင်းရှိ ဆေးရုံတစ်ခုကို ယူနီဆက်ဖ်က Baby Friendly Hospital အဖြစ် သတ်မှတ်

ဖေဖော်ဝါရီ ၁၃၊ ၂၀၁၇
M-Media

– အာရပ်စော်ဘွားများပြည်ထောင်စု (ယူအေအီး) နိုင်ငံ ဒူဘိုင်းမြို့ရှိ ဆေးရုံတစ်ခုမှာ ယူနီဆက်ဖ်က သတ်မှတ်သည့်’ ရင်ခွင်ပိုက်ကလေးငယ်များနှင့် သင့်လျော်သောဆေးရုံ’ (Baby Friendly Hospital) အဆင့်ကို ရရှိခဲ့သည်ဟု သိရသည်။

Dubai Hospital ဖြစ်ပြီး ဇန်န၀ါရီလနှောင်းပိုင်းက ထိုကဲ့သို့ သတ်မှတ်ခဲ့ခြင်းဖြစ်ကာ ဂုဏ်ပြုအခမ်းအနားကို ထိုဆေးရုံ၌ ကျင်းပခဲ့သည်။

Baby-Friendly Hospital Initiative (BFHI) လှုပ်ရှားမှုကို ယူနီဆက်ဖ်နှင့် ကမ္ဘာ့ကျန်းမာရေးအဖွဲ့ (WHO) တို့ ပူးပေါင်းကာ ၁၉၉၁ ခုနှစ်တွင် စတင်ခဲ့ခြင်းဖြစ်ပြီး ရင်ခွင်ပိုက်ကလေးငယ်များအား ကာကွယ်မှု၊ ဦးစားပေးမှုနှင့် ကူညီပံ့ပိုးမှုများကို တိုက်တွန်းအားပေးရန်နှင့် ဖွံ့ဖြိုးစေရန်ဖြစ်သည်။

ဆေးရုံတစ်ခုမှာ Baby-Friendly Hospital အဆင့် ရရှိရန်အတွက် အဓိကအားဖြင့် မိခင်လောင်းများ၊ ရင်ခွင်ပိုက်ကလေးငယ်များကို ပြုစုခြင်း၊ ထောက်ပံ့ခြင်း၊ လေ့ကျင့်သင်ကြားပေးခြင်း စသည့် ကျန်းမာရေးဆောင့်ရှောက်မှုဆိုင်ရာ သတ်မှတ်ချက် ၁၀ ခုကို ပြည့်မီအောင် ဆောင်ရွက်ရသည်။

Dubai Hospital ၏ စီအီးအိုဖြစ်သူ အဘ်ဒူလ် ရဟ်မန် အလ်-ဂျက်စ်မီက မိမိတို့ဆေးရုံအနေဖြင့် ရင်ခွင်ပိုက်ကလေးငယ်များအား အလုံးစုံ ကြည့်ရှုစောင့်ရှောက်နိုင်ရေး ကြိုးပမ်းအားထုတ်မှုများကို နှစ်မြှုပ်ဆောင်ရွက်နေသည်ဟု ပြောကြားခဲ့ပြီး ယူနီဆက်ဖ်ကိုလည်း ၎င်းတို့၏ ကြိုးပမ်းအားထုတ်မှုများအတွက် ချီးကျူးခဲ့သည်။

Ref : IINA