ကွဲလွဲမှုတွေကို ရင်ကြားစေ့ဖို့ ကြိုးစားလာတဲ့ ကာချုပ်နှင့် နိုင်ငံတော်အတိုင်ပင်ခံပုဂ္ဂိုလ်

ဖေဖော်ဝါရီ ၁၄၊ ၂၀၁၇
M-Media

– မြန်မာနိုင်ငံ၏ စစ်တပ်အကြီးအကဲ ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်နှင့် တိုင်းပြည်၏ အရပ်သားအစိုးရမှ ထိပ်တန်းပုဂ္ဂိုလ် – နိုင်ငံတော်၏ အတိုင်ပင်ခံပုဂ္ဂိုလ်နှင့် နိုင်ငံခြားရေးဝန်ကြီး – ဒေါ်အောင်ဆန်းစုကြည်တို့မှာ ပြီးခဲ့သည့်လ သို့မဟုတ် မကြာသေးမီကာလအတွင်း လျှို့ဝှက်တွေ့ဆုံမှုများ ပြုလုပ်ခဲ့သည်။

“ဒါက လျှို့ဝှက်ဆွေးနွးမှုဆိုတာထက် တရားဝင်မထုတ်ပြန်တဲ့ တွေ့ဆုံမှုတွေပါ” ဟု အာဏာရ အမျိုးသား ဒီမိုကရေစီအဖွဲ့ချုပ်ပါတီ NLD မှ အကြီးတန်းအဖွဲ့ဝင်များက ပြောကြားခဲ့သည်။

ကာကွယ်ရေးဦးစီးချုပ်နှင့် နီးစပ်သည့်ရင်းမြစ်များက ၎င်းတို့ နှစ်ဦးမှာ အနည်းဆုံး ပြီးခဲ့သည့်နှစ် အောက်တိုဘာလနောက်ပိုင်းတွင် မျက်နှာချင်းဆိုင် မတွေ့ခဲ့ကြဟု ဆိုသည်။ ဗိုလ်ချုပ်မှူးကြီးက တရုတ်နိုင်ငံသို့ အလျင်စလို စီစဉ်ကာ သွားရောက်လည်ပတ်ခဲ့ပြီးနောက်ပိုင်း ၎င်းတို့နှစ်ဦးကြား ဆက်ဆံရေးမှာ ဆိုးရွားခဲ့သည်ဟု The Lady နှင့် နီးစပ်သည့် ရင်းမြစ်တစ်ခုက ဆိုသည်။

ထိုအချိန်ကတည်းကစ၍ ဗိုလ်ချုပ်မှူးကြီးနှင့် အရပ်သားအစိုးရကြား ဆက်သွယ်ဆောင်ရွက်မှုကို ဖွဲ့စည်းပုံအခြေခံဥပဒေအရ စစ်တပ်အကြီးအကဲက ခန့်အပ်ထားသည့် ၀န်ကြီးများတွင် တစ်ဦးအပါအ၀င်ဖြစ်ပြီး လက်ရှိ စစ်တပ်တွင် တာဝန်ထမ်းဆောင်နေသည့် ကာကွယ်ရေးဝန်ကြီး ဗိုလ်ချုပ်ကြီးစိန်ဝင်းမှတစ်ဆင့် လုပ်ဆောင်ခဲ့သည်။

ပြီးခဲ့သည့်သီးတင်းပတ်များတွင် မြန်မာနိုင်ငံ၏ လူ့အခွင့်အရေးဆိုင်ရာ ကုလ၏ အထူးကိုယ်စားလှယ် ယန်းဟီးလီ၏ ပြင်းပြင်းထန်ထန် ပြစ်တင်ပြောဆိုမှုနှင့်အတူ နိုင်ငံတကာက ဝေဖန်မှုများ မြင့်တက်လာခြင်း၊ ရခိုင်ပြည်နယ်ရှိ အခြေအနေများမှာ ဆိုးရွားလာခြင်း၊ ၁၉၄၇ ခုနှစ်က ဗိုလ်ချုပ်အောင်ဆန်းနှင့် တိုင်းရင်းသား ခေါင်းဆောင်များ၏ သမိုင်းဝင်တွေ့ဆုံမှုအတွင်း ငြိမ်းချမ်းသည့် ဖက်ဒရယ်ပြည်ထောင်စုဖြစ်ရေး ကတိက၀တ်နှင့် သဘောတူညီခဲ့သည့် ပင်လုံသဘောတူညီချက်ကို ‘၂၁ ရာစု ပင်လုံ’ ဟု ခေါင်းစဉ်တပ်ကာ ဒုတိယအကြိမ်မြောက် ‘ပြည်ထောင်စုငြိမ်းချမ်းရေး ညီလာခံ’ ပြုလုပ်ရန် ပြင်ဆင်နေခြင်း စသည်တို့ကြောင့် ခေါင်းဆောင်နှစ်ဦးမှာ ပို၍ အနီးကပ် ပူးပေါင်းဆောင်ရွက်ရမည်ကို မကြာခင်သီတင်းပတ်များအတွင်း သိရှိလာခဲ့သည်။

“တစ်ယောက်နဲ့တစ်ယောက် မနှစ်မြို့ဘူး၊ မယုံကြည်ဘူးဆိုရင်တောင်မှ တစ်ယောက်အတွက် နောက်တစ်ယောက်က လိုအပ်တယ်ဆိုတာ နှစ်ဖက်စလုံးက နားလည်ကြပါတယ်” ဟု ကာကွယ်ရေးဦးစီးချုပ်နှင့် နီးစပ်သည့် အငြိမ်းစား စစ်တပ်အရာရှိတစ်ဦးက Bnagkok Post သို့ အမည်မဖော်လိုသည့် အခြေအနေဖြင့် ပြောကြားခဲ့သည်။ ဒေါ်အောင်ဆန်းစုကြည်နှင့် ဗိုလ်ချုပ်မှူးကြီးမင်းအောင်လှိုင်တို့အကြား ပြီးခဲ့သည့်လအတွင်း ဆွေးနွေးမှုများစွာ ပြုလုပ်ခဲ့သော်လည်း NLD ပါတီ၏ ဥပေဒအကြံပေးဖြစ်သည့် မွတ်စလင်တရားလွှတ်တော်ရှေ့နေ ဦးကိုနီ လုပ်ကြံခံရပြီးနောက် လုံခြုံရေးဆိုင်ရာ စိုးရိမ်မှုများ မြင့်တက်လာခြင်းက အစိုးရနှင့် စစ်တပ်တို့အကြား လုံခြုံရေးကိစ္စများတွင် ပိုမို နီးနီးကပ်ကပ် ပူးပေါင်းဆောင်ရွက်ရေး အရေးပါမှုကလည်း ထင်ရှားလာသည်။

ရခိုင်ပြည်နယ်မှ အခြေအနေနှင့် ရပ်တန့်နေသော ငြိမ်းချမ်းရေးလုပ်ငန်းစဉ်တို့ကလည်း တိုင်းပြည်၏ အရပ်သား ခေါင်းဆောင်နှင့် စစ်တပ်ခေါင်းဆောင်နှစ်ဦးအကြား ကြီးထွားနေသည့် သဘောထားကွဲလွဲမှုကို ရင်ကြားစေ့ရန် ကနဦးကြိုးပမ်းမှုကို လှုံ့ဆော်ပေးခဲ့သည်။ သို့သော်လည်း ငြိမ်းချမ်းရေးလုပ်ငန်းစဉ်တွင် ပြဿနာများ ရှိနေပြီး၊ ဒေါ်အောင်ဆန်းစုကြည်၏ ထိုကိစ္စနှင့်ပတ်သက်၍ ပွင်လင်းမြင်သာ မရှိဟု ကာချုပ်က ယူဆကာ ထိုအချက်က ၎င်းတို့ နှစ်ဦးအကြား ဆက်ဆံရေး ဆိုးရွားမှု၏ ပထမဆုံး အကြောင်းအရင်းဖြစ်သည်ဟု စစ်တပ်ရင်းမြစ်များက ဆိုသည်။

ပြဿနာ၏ အဓိကကိစ္စက ပြီးခဲ့သည့်နှစ် သြဂုတ်လက ပြုလုပ်ခဲ့သည့် ပထမအကြိမ် ငြိမ်းချမ်းရေးညီလာခံတွင် ပါဝင်ရန် တိုင်းရင်းသားအဖွဲ့အချို့ကို တိုက်တွန်းရာတွင် ကန့်လန့်ကာနောက်ကွယ်က ပါဝင်ခဲ့သည့် တရုတ်၏ အခန်းကဏ္ဍဖြစ်သည်။ သြဂုတ်လတွင် ဒေါ်အောင်ဆန်းစုကြည် တရုတ်သို့ သွားရောက်လည်ပတ်ခဲ့ပြီးနောက်ပိုင်း ရှမ်းပြည်နယ်ရှိ နယ်စပ်တစ်လျှောက်တွင် အခြေစိုက်ထားသော တရုတ်လိုလားသည့် တိုင်းရင်းသားအုပ်စုနှစ်ခု- ၀နှင့် မိုင်းလားတို့ ညီလာခံတွင် ပါဝင်ရန် သဘောတူညီခဲ့သည်မှာ သံသယဖြစ်ဖွယ် မရှိ။

သို့သော်လည်း ပြဿနာက ရခိုင့်တပ်မတော် (AA)၊ ကိုးကန့် သို့မဟုတ် မြန်မာအမျိုးသား ဒီမိုကရက်တစ် မဟာမိတ်တပ်ဖွဲ့ (MNDAA)၊ ပလောင် သို့မဟုတ် တအောင်း အမျိုးသား လွတ်မြာက်ရေး တပ်ဖွဲ့ (TNLA) စသည့် အဖွဲ့ ၃ ခု ပါဝင်သည့်ကိစ္စဖြစ်သည်။ စစ်တပ်က ထိုအဖွဲ့များ လက်နက်မချလျှင်၊ ပါဝင်ခွင့်မပြု။ အခြားသော တိုင်းရင်းသား အဖွဲ့များက ငြိမ်းချမ်းရေးလုပ်ငန်းစဉ်မှာ အားလုံးပါအ၀င်သည့် မှန်ကန်သော ဖြစ်စဉ်တစ်ခု ဖြစ်လိုလျှင် ညီလာခံတွင် ထို ၃ ဖွဲ့ ပါဝင်သင့်သည်ဟု ပြောကြသည်။

အဆိုပါ လက်နက်ကိုင်အဖွဲ့ ၃ ဖွဲ့က ၎င်းတို့အနေဖြင့် နိုင်ငံရေးလုပ်ငန်းစဉ်အရ အနာဂတ်တွင် တိုက်ခိုက်မှု ရပ်တန့်ပြီး၊ လက်နက်ချမည်ဟု သဘောတူ လက်မှတ်ရေးထိုးရမည့် ညှိနှိုင်းဆွေးနွေးမှုတစ်ခုကို ရှာဖွေနိုင်ခဲ့သည်။ သံတမန် ရင်းမြစ်များက ဒေါ်အောင်ဆန်းစုကြည်မှာ ထိုညှိနှိုင်းမှုကို အဆိုပါ အဖွဲ့ ၃ ဖွဲ့က သဘောတူရေးနှင့် လက်မှတ်ရေးထိုးရေး ၀,က ဖျောင်းပြပေးရန် ၎င်း၏ မဟာမိတ်ဖြစ်သော တရုတ်ကို ထိထိရောကရောက် ဖိအားပေးခဲ့သည်ဟု ဆိုသည်။

ထိုအချက်ကို ဆောင်ရွက်ပေးမည်ဟုသော တရုတ်၏ကတိကို ယုံကြည်ကာ ဒေါ်အောင်ဆန်းစုကြည်မှာ ဘေးဂျင်းမှ ပြန်ရောက်လာခဲ့ပြီး ညီလာခံ မကျင်းပခင်လေးမှာပင် ထိုသတင်းကောင်းကို စစ်တပ်အကြီးအကဲအား ပြောပြခဲ့သည်။ သို့သော်လည်း အဆိုပါ အဖွဲ့ ၃ ခုက သဘောတူညီချက်ကို လက်မှတ်ရေးထိုးခြင်း မပြုခဲ့။

ဗိုလ်ချုပ်မှူးကြီးမင်းအောင်လှိုင် အောက်တိုဘာလ တရုတ်ပြည်သို့ သွားရောက်စဉ် တရုတ်အစိုးရက ၎င်းတို့အနေဖြင့် ဒေါ်အောင်ဆန်းစုကြည်အား ထိုကဲ့သို့ ကတိမျိုး မပေးခဲ့သော်လည်း လက်နက်ကိုင် ၃ ဖွဲ့အား ဖျောင်းဖြရန် ၀,ကို ဖိအားပေးမည်ဟု သဘောတူခဲ့သည်ဟု ပြောကြားခဲ့သည်။ တရုတ်သတင်းရင်းမြစ်အရ ဘေဂျင်းမှာ ၀,အဖွဲ့အား ထိုကဲ့သို့ ဆောင်ရွက်ရန် အမိန့်ပေးခဲ့သည့် အခြေအနေမျိုး မရှိခဲ့ဟု ဆိုသည်။ ဗိုလ်ချုပ်မှူးကြီးက ဒေါ်အောင်ဆန်းစုကြည်မှာ ၎င်းအား လှည့်ဖြားခဲ့သည်ဟု အထင်ရောက်ခဲ့ပြီး၊ ပို၍ မယုံကြမကြည် ဖြစ်သွားစေသည်ဟု စစ်တပ် ရင်းမြစ်များက ပြောကြားခဲ့သည်။

ဒေါ်အောင်ဆန်းစုကြည်ဘက်မှကြည့်လျှင် သူမမှာ စစ်တပ်အား ဖျောင်းပြရန် အစွမ်းကုန် ကြိုးစားခဲ့ပုံရသည်။ ရခိုင်ပြည်နယ်အခြေအနေနှင့် ငြိမ်းချမ်းရေးလုပ်ငန်းစဉ်တွင် စစ်တပ်၏ အမြင်အတိုင်း သူမက လက်ခံခဲ့သည်။ ကချင်လွတ်မြောက်ရးအဖွဲ့ KIO အား NCA တွင် လက်မှတ်ရေးထိုးရေး ဖိအားပေးရန် စစ်ရေးအရ ပြင်းပြင်းထန်ထန် ဆောင်ရွက်မည်ဟု စီစဉ်ထားမှုကိုလည်း စစ်တပ်က သူမကို ကနဦးကတည်းက အသိပေးခဲ့သည်။ စစ်တပ်ရင်းမြစ်များအရ ကာကွယ်ရေးဝန်ကြီး ဗိုလ်ချုပ်ကြီး စိန်ဝင်းမှာ ထိုအမိန့်အား သူမ လက်မှတ်ရေးထိုးရန်ပင် စီစဉ်ခဲ့သည် ဟူ၏။

လက်ရှိအချိန်တွင် ဒေါ်အောင်ဆန်းစုကြည်မှာ NCA ကို လက်မှတ်ရေးထိုးထားသည့် အဖွဲ့များနှင့်သာ ငြိမ်းချမ်းရေးညီလာခံကို ဆောင်ရွက်သွားရန် စီစဉ်နေပြီး အခြားသူများကို ဗြောင်ကျကျ ချန်ထားတော့မည်ဖြစ်သည်။ ထိုအခြေအနေက စစ်တပ်မှ တစ်စိုက်မတ်မတ် ပြောဆိုထားသည့် အခြေအနေမျိုး ဖြစ်သည်။

သို့သော်လည်း ရခိုင်ပြည်နယ်ကိစ္စ၊ ထိုဒေသတွင် စစ်တပ်က ရက်စက်ကြမ်းကြုတ်မှုများ ပြုလုပ်နေသည်ဟု စွပ်စွဲမှုများ မြင့်တက်လာခြင်းက ဒေါ်အောင်ဆန်းစုကြည်အတွက် ပိုကြီးသည့် ပြဿနာ ဖြစ်လာပြီး၊ စစ်တပ်အကြီးအကဲနှင့် သူမ၏ ဆက်ဆံရေး တင်းမာမှုမှာ မြင့်တက်လာဖွယ် ရှိနေသည်။ ရခိုင်ပြည်နယ်ရှိ အခြေအနေများမှာ ‘လူထားထုအပေါ် ကျူးလွန်သည့် ရာဇ၀တ်မှု’ ပုံစံ ဖြစ်နေသည်ဟု ဖော်ပြထားသည့် ကုလ၏ နောက်ဆုံးထွက်ပေါ်လာသော အစီရင်ခံစာနှင့်ပတ်သက်၍ ယခုအချိန်အထိ ဒေါ်အောင်ဆန်းစုကြည်က ပါးစပ်မဟ။

ဒီဇင်ဘာကလည်း သူမမှာ ရခိုင်ပြည်နယ်မှ အခြေအနေများကို အကျဉ်းချုံးတင်ပြရန် အာဆီယံနိုင်ငံများမှ နိုင်ငံခြားရေး ၀န်ကြီးများနှင့် တွေ့ဆုံခဲ့ပြီး၊ လူ့အခွင့်အရေးချိုးဖောက်မှုများစွာ ရှိကောင်းရှိနိုင်သည်ဟု သူမက ၀န်ခံခဲ့သည်။

သူမအနေဖြင့် စစ်တပ်အား ထိန်းရမည်ကို နားလည်သော်လည်း မည်ကဲ့သို့ဆောင်ရွက်ရမည်ကို မသိကြောင်း အာဆီယံနိုင်ငံခြားရေးဝန်ကြီးများအား ပြောပြခဲ့သည်ဟု အာဆီယံဒေသ အကြီးတန်း သံတမန်ရင်းမြစ်များက ဆိုသည်။

ထိုအကြောင်းအရင်းများကြောင့် ဒေါ်အောင်ဆန်းစုကြည်နှင့် ကာကွယ်ရေးဦးစီးချုပ်တို့အကြား ဆွေးနွေးစရာများ အများအပြားရှိနေသည်မှာ သံသယရှိစရာမဟုတ်။ လေ့လာဆန်းစစ်သူအများစုကတော့ ၎င်းတို့နှစ်ဦးအကြား ပိုမိုကောင်းမွန်သည့် နားလည်မှုကသာ တိုင်းပြည် ရှေ့ဆက်လျှောက်လှမ်းရန် အကူအညီဖြစ်စေမည်ဟု ယုံကြည်နေကြလေသည်။

Ref: Bankokpost

(မြန်မာအရေးကျွမ်းကျင်သူ Larry Jagan ရေးသားပြီး Bangkokpost တွင် ဖေဖော်ဝါရီ ၁၃ ရက်နေ့က လွှင့်တင်ထားသည့် Suu Kyi, general try to heal differences ဆောင်းပါးကို လေးမောင်က ဆီလျော်အောင် ဘာသာပြန်ဆိုသည်)