ယူအေအီးက နောက်ထပ် နှစ် ၁၀၀ အတွင်း အင်္ဂါဂြိုဟ်၌ မြို့တည်မည်

ဖေဖော်ဝါရီ ၁၈၊ ၂၀၁၇
M-Media

ယူအေအီးက အင်္ဂါဂြိုဟ်တွင်တည်ဆောက်မည့် လူသားမြို့တော်ဒီဇိုင်း

– ၂၁၁၇ ခုနှစ်အရောက်မှာ အင်္ဂါဂြိုဟ်ပေါ် ပထမဆုံး လူသားမြို့တော် တည်ဆောက်ပြီးဖြစ်ရမယ်ဆိုတဲ့ အံ့သြဖွယ် စီမံကိန်းတစ်ခုကို အာရပ်စော်ဘွားများပြည်ထောင်စု (ယူအေအီး) က ဖေဖော်ဝါရီ ၁၅ ရက်နေ့မှာ ကြေငြာလိုက်ပါတယ်။

ဒူဘိုင်းအုပ်ချုပ်ရးမှူး ရှိခ် မိုဟာမက် ဘင် ရာရှင် အလ် မခ်တွန်မ်က ဒီလို ပြောကြားလိုက်တာဖြစ်ပြီး Mars 2117 Project လို့ အမည်ပေးထားတဲ့ ဒီစီမံကိန်းဟာ လူတွေကို အင်္ဂါဂြိုဟ်ပို့နိုင်မယ့် သိပ္ပံဆိုင်ရာ တစ်မူထူးတဲ့ အောင်မြင်မှုရရှိရေး အမျိုးသားစီမံကိန်းရဲ့ အစိတ်အပိုင်းတစ်ခု ဖြစ်တယ်လို့လည်း ဆိုပါတယ်။

စီမံကိန်းကို World Government Summit (ကမ္ဘာ့အစိုးရ ထိပ်သီးအစည်းအဝေး) မှာ ကြေငြာရာမှာ အင်္ဂါဂြိုဟ်ပေါ် မြို့ တစ်ခုတည်ဆောက်ဖို့အတွက် ကနဦး သုံးသပ်ချက်ဆိုင်ရာတွေကို ဗီဒီယိုနဲ့ ရှင်းလင်းတင်ပြမှုတွေလည်း ပြုလုပ်ခဲ့ပါတယ်။

ဒီစီမံကိန်းကို နိုင်ငံတကာက အထူးအဖွဲ့တွေ၊ သိပ္ပံအသင်းအဖွဲ့တွေနဲ့ ပူးပေါင်းလုပ်ဆောင်သွားမယ်လို့ ဒူဘိုင်အခြေစိုက် Gulf News သတင်းစာက ဖော်ပြခဲ့ပါတယ်။

“အင်္ဂါဂြိုဟ်ပေါ်မှာ စက်ရုပ်တွေနဲ့ လူသားမြို့တော် တည်ဆောက်ဖို့အတွက် အယူအဆတစ်ခုကို ယူအေအီးက အင်ဂျင်နီယာအဖွဲ့ဟာ သိပ္ပံပညာရှင်တွေ၊ သုတေသနပညာရှင်တွေနဲ့အတူ ဖော်ထုတ်ခဲ့ပါတယ်” လို့ သတင်းစာက ဆိုပါတယ်။

ရှိခ်မိုဟာမက်ကလည်း အခြားသောဂြိုဟ်တွေပေါ်မှာ လူသားတွေ ခြေချနိုင်ရေးဟာ လူသားအားလုံးရဲ့ မဟာအိပ်မက်ဖြစ်ကြောင်း၊ မိမိတို့ရဲ့ ရည်ရွယ်ချက်မှာ အဆိုပါအိပ်မက် အမှန်တကယ်ဖြစ်လာရေး နိုင်ငံတကာ၏ ကြိုးပမ်းအားထုတ်မှုတွင် မိမိတို့ ယူအေအီးနိုင်ငံက ထိပ်တန်းမှ ပါဝင်ရေးဖြစ်ကြောင်း ပြောကြားခဲ့ပါတယ်။

“လူသားတွေရဲ့ ရည်မှန်းချက်တွေက အကန့်အသတ် မရှိပါဘူး။ လက်ရှိ ရာစုနှစ်မှာ သိပ္ပံဆိုင်ရာ ဖောက်ထွက်မှုတွေကို ကြည့်မယ်ယ်ဆိုရင် အရေးပါးဆုံး အိပ်မက်ကို အကောင်အထည်ဖော်နိုင်တဲ့ စွမ်းရည်တွေ လူသားတွေမှာ ရှိနေတယ်ဆိုတာ လူတိုင်း ယုံကြည်လာမှာပါ။ ဒီနေ့ ကျွန်တော်တို့ စိုက်ပျိုးလိုက်တဲ့ စီမံကိန်းအသစ်ကနေ နောက်မျိုးဆက်တွေ အသီးအပွင့်တွေ ဆွတ်ခူးနိုင်မယ်လို့ မျှော်လင့်ပါတယ်”

Ref: Saudi Gazette