ကင်ဂျုံနမ်အသတ်ခံရမှု တိုင်းပြည်၏ ဥပဒေကို လိုက်နာရန် မလေးက မြောက်ကိုရီးယားကိုပြော

ဖေဖော်ဝါရီ ၁၈၊ ၂၀၁၇
M-Media

– မြောက်ကိုရီးယားခေါင်းဆောင် ကင်ဂျုံအန်၏ အဖေတူ အမေကွဲအစ်ကို လုပ်ကြံခံရမှုနှင့်ပတ်သက်၍ မိမိတို့နိုင်ငံ၏ တရားဥပဒေကို လိုက်နာရမည်ဟု မလေးရှားက ပြောကြားလိုက်ပြီး၊ အလောင်းအား ခွဲစိပ်စစ်ဆေးမှု မလုပ်ရန် မြောက်ကိုရီးယား၏ သတိပေးမှုကို တုန့်ပြန်လိုက်ခြင်းလည်းဖြစ်သည်။

ကင်ဂျုံနမ်မှာ ယခုတစ်ပတ်အစောပိုင်းက ကွာလာလမ်ပူလေဆိပ်တွင် လုပ်ကြံခံခဲ့ရပြီး မြောက်ကိုရီးယားမှ သူလျှိုများလွှတ်ကာ သတ်ခိုင်းခဲ့သည်ဟု သတင်းထွက်ပေါ်ခဲ့သည်။ မြောက်ကိုရီးယားကမူ ကင်ဂျုံနမ်၏ အလောင်းကို မူလအတိုင်း ပြန်လိုချင်နေပြီး၊ ရရှိသည့် အချက်အလက်များကိုလည်း ၎င်းတို့အား ပေးစေချင်နေသည်။

မလေးရှားကမူ လုပ်ထုံးလုပ်နည်းအရ ခွဲစိပ်စစ်ဆေးမှု ပြုလုပ်မည်ဆိုသောကြောင့် မလေးရှားနိုင်ငံဆိုင်ရာ မြောက်ကိုရီးယား သံအမတ်က မိမိတို့အနေဖြင့် ထိုလုပ်ရပ်ကို ပြင်းပြင်းထန်ထန် တုန့်ပြန်သွားမည်ဖြစ်ကြောင်း၊ မလေးရှားမှာ ရန်လိုသော အင်အားစုများနှင့် ပူးပေါင်းကာ လျှို့ဝှက်ကြံစည်မှု ရှိနေပြီး မိမိတို့အား လှည့်ဖျားရန် စီစဉ်နေကြောင်း၊ မလေးရှားက ထုတ်ပြန်သော အချက်အလက်များကို မိမိတို့က ပယ်ချမည်ဖြစ်ကြောင်း ယမန်နေ့တွင် ပြောကြားခဲ့သည်။

သို့သော် မလေးရှားရဲတပ်ဖွဲ့မှ စစ်ဆေးရေးအရာရှိချုပ် ခါလစ် အဘူ ဘာကာရ်ကမူ မြောက်ကိုရီးယားအနေဖြင့် မလေးရှား၏ ဥပဒေကို လိုက်နာရမည်ဟု တုန့်ပြန်ခဲ့သည်။

“ကျွန်တော်တို့ မလေးရှားမှာ ဥပဒေရှိတယ်၊ လူတိုင်းက ကျွန်တော်တို့ရဲ့ ဥပဒေ၊ ပြဌာန်းချက်တွေကို လိုက်နာဖို့ လိုပါတယ်။ ဒီအထဲမှာ မြောက်ကိုရီးယားလည်း ပါပါတယ်” ဟု ခါလစ်က ပြောကြားခဲ့သည်။

ထို့ပြင် ကင်၏ မိသားစုထံမှ DNA နမူနာယူကာ စုံစမ်းစစ်ဆေးမှု မပြီးမချင်း အလောင်းအား မည်သူ့ကိုမှ ထုတ်ပေးမည်မဟုတ်ဟုလည်း ၎င်းက ထည့်သွင်းပြောကြားခဲ့သည်။

Ref: CNA