ထိုင်းက မြန်မာကို နှစ်ရှည်ချေးငွေ ဘတ် ၄ ဘီလီယံကျော် ထုတ်ချေးမည်

ဖေဖော်ဝါရီ ၁၈၊ ၂၀၁၇
M-Media

ထားဝယ်အထူးစီးပွားရေးဇုန် ပုံစံငယ်

– မြန်မာနိုင်ငံ၏ အခြေခံအဆောက်အဦး ဖွံ့ဖြိုးရေး စီမံကိန်းအတွက် ဘတ်ငွေ ၄.၅ ဘီလီယံကို နှစ်ရှည်ချေးငွေအဖြစ် ပေးအပ်သွားရန် စဉ်းစားနေသည်ဟု ထိုင်းနိုင်ငံ ပို့ဆောင်ရေးဝန်ကြီးဌာန ၀န်ကြီး Arkhom Termpittayapaisith က အင်္ဂါနေ့တွင် ပြောကြားလိုက်သည်။

ပြီးခဲ့သည့် တစ်ပတ်က ပြုလုပ်ခဲ့သည့် ထားဝယ်အထူးစီးပွားရေးဇုန် စီမံခန့်ခွဲရေး ပူးပေါင်းကော်မတီ အစည်းအဝေးတွင် မြန်မာနိုင်ငံမှာ ထိုကဲ့သို့ ချေးငွေရရန် တောင်းဆိုခဲ့သည်ဟု ဆိုသည်။

အဆိုပါ ချေးငွေမှာ ထိုင်း-မြန်မာ နယ်စပ် ကန်ချာနာဘူရီမှ ထားဝယ်ရှိ အထူးစီးပွားရေးဇုန်အထိ ၁၃၃ ကီလိုမီတာ ရှည်လျားမည့် ၂ လမ်းသွား လမ်းတစ်ခု ဖောက်လုပ်ရေး အပါအ၀င် မြန်မာနိုင်ငံ၏ အခြေခံအဆောက်အဦးများ ဖွံ့ဖြိုးတိုးတက်ရေးအတွက် သုံးစွဲရမည်ဖြစ်သည်။

အိမ်နီးချင်းနိုင်ငံများ စီးပွားရေး ဖွံ့ဖြိုးတိုးတက်မှု ပူးပေါင်းဆောင်ရွက်ရေး အေဂျင်စီ (Neda) က မြန်မာနိုင်ငံအား ထိုချေးငွေ ပေရန်အတွက် လေ့လာမှုများ၊ အသေးစိတ်စီစဉ်မှုများ ပြုလုပ်နေသည်။

ထားဝယ်အထူးစီးပွားရေးဇုန်အတွက် အီတလီ-ထိုင်းကုမ္ပဏီ Italian-Thai Development Plc (ITD) က လုပ်ပိုင်ခွင့် ရထားခြင်းဖြစ်ပြီး ထားဝယ်တွင် ဆိပ်ကမ်းအသေးစားနှင့် ဓာတ်အားပေးစက်ရုံ တည်ဆောက်ပြီးပါက ထိုင်းအစိုးရမှာ အဆိုပါ စက်ရုံမှ ဓာတ်အားဝယ်ယူရန်လည်း ရှိနေသည်။

မြန်မာအစိုးရမှာ ထိုင်း-မြန်မာနယ်စပ်ရှိ ယာယီနှင့် အမြဲတမ်း စစ်ဆေးရေးဂိတ် ၃ ခုကို အဆင့်မြှင့်တင်ပေးရန်လည်း ပြီးခဲ့သည့်တစ်ပတ် အစည်းအဝေးတွင် တောင်းဆိုခဲ့သည်။

Ref: Bangkokpost