ဆော်ဒီစတော့အိတ်ချိန်းက ပထမဆုံး အမျိုးသမီး ဥက္ကကို ခန့်အပ်

ဖေဖော်ဝါရီ ၁၉၊ ၂၀၁၇
M-Media

ဆော်ဒီအာရေဗျ စတော့အိတ်ချိန်းလုပ်ငန်း၏ ဥက္ကဌ ဆာရာ အလ်-ဆူဟိုင်မီ

– ဆော်ဒီအာရေဗျ စတော့အိတ်ချိန်းလုပ်ငန်း၏ ဥက္ကဌအဖြစ် NCB Capital ရင်းနှီးမြှုပ်နှံမှုဘဏ်မှ အမှုဆောင်အကြီးအကဲ အမျိုးသမီး ဆာရာ အလ်-ဆူဟိုင်မီကို ခန့်အပ်လိုက်သည်ဟု သိရသည်။

ဗဟိုဘဏ်၊ ဘဏ္ဍာရေးဝန်ကြီးဌာနနှင့် စီးပွားကူးသန်း ၀န်ကြီးဌာနတို့မှ ကိုယ်စားလှယ်များဖြင့် ဖွဲ့စည်းထားသော စတော့အိတ်ချိန်း ဘုတ်အဖွဲ့က ကြာသာပတေးနေ့တွင် ရွေးချယ် ခန့်အပ်လိုက်ခြင်းဖြစ်သည်ဟု ကြေငြာချက်တွင် ဖော်ပြခဲ့သည်။

ဆူဟိုင်မီမှာ ဆော်ဒီနိုင်ငံအတွင်း အစိုးရ၏ အဓိက ဘဏ္ဍာရေးအဖွဲ့အစည်းတစ်ခုကို ကိုင်တွယ်သည့် ပထမဆုံး အမျိုးသမီး ဖြစ်လာခဲ့သည်။ ၂၀၁၄ ခုနှစ်က NCB Capital ၏ အမှုဆောင်အကြီးအကဲ (CEO) တာဝန်ကို စတင်ထမ်းဆောင်စဉ်ကလည်း ဆော်ဒီနိုင်ငံရှိ ရင်းနှီးမြှုပ်နှံမှု ဘဏ်တစ်ခုတွင် ပထမဆုံး အမျိုးသမီး အမှုဆောင် အကြီးအကဲဖြစ် မှတ်တမ်းဝင်ခဲ့သည်။

ဆော်ဒီ၏ ဘဏ္ဍာရေးကဏ္ဍတွင် ထိပ်တန်းအဆင့်သို့ ရောက်ရှိနေသည့် အမျိုးသမီး အနည်းငယ်တွင် ဆူဟိုင်မီမှာ တစ်ဦး အပါအ၀င်ဖြစ်သည်။

ဆူဟိုင်မီ၏ ဖခင် ဂျမ်မက်ဇ်မှာ ဆော်ဒီ ဘဏ္ဍာရေးအာဏာပိုင်အဖွဲ့ဖြစ်သော Capital Market Authority ကို ၂၀၀၄ ခုနှစ်မှ ၂၀၀၆ ခုနှစ်အထိ ဦးဆောင်ခဲ့သူဖြစ်သည်။

ပြီးခဲ့သည့်နှစ်က ကြေငြာခဲ့သည့် ဆော်ဒီအာရေဗျ၏ စီးပွားရေးနှင့် လူမှုရေး ပြုပြင်ပြောင်းလဲမှုဆိုင်ရာ စီမံကိန်းတွင် နိုင်ငံ၏ စီးပွားရေး၌ အမျိုးသမီးများ၏ အခန်းကဏ္ဍ ဖွံ့ဖြိုးတိုးတက်လာရေးလည်း ပါဝင်ပြီး လက်ရှိ နိုင်ငံလုပ်အားတွင် အမျိုးသမီး ၂၂ ရာခိုင်နှုန်း ရှိရာမှ လာမည့်နှစ်များတွင် ၃၀ ရာခိုင်နှုန်းအထိ မြင့်တက်လာရန်လည်း ရည်မှန်းထားသည်။

ဆော်ဒီ စတော့အိတ်ချိန်းမှာ အာရပ်ကမ္ဘာ၏ အကြီးဆုံး စတော့အိတ်ချိန်းလည်းဖြစ်သည်။

Ref: IINA