ဒုက္ခသည်ကလေးများအား လိင်ပိုင်းဆိုင်ရာစော်ကားသည့် ခရစ်ယာန်ဘုန်းကြီးကို ဂရိဖမ်းဆီး

ဖေဖော်ဝါရီ ၂၃၊ ၂၀၁၇
M-Media

– ဒုက္ခသည်ကလေးများကို လိင်ပိုင်းဆိုင်ရာ စော်ကားသည်ဆိုသည့် သံသယဖြင့် ပြင်သစ်ခရစ်ယာန်ဘုန်းကြီးတစ်ပါးကို ဖမ်းဆီးလိုက်သည်ဟု ဂရိရဲတပ်ဖွဲ့က ပြောကြားလိုက်သည်။

ပြင်သစ် ဖရန်စီကန်အသင်းတော်မှ အသက် ၅၂ နှစ်အရွယ် ဘုန်းကြီးဖြစ်ပြီး ဂရိနိုင်ငံ၏ ဒုတိယအကြီးဆုံးမြို့ သီဆာလိုနီကီရှိ ၎င်း၏ အိမ်တွင် ခိုလှုံခဲ့သော အသက် ၁၄ နှစ်မှ ၁၈ နှစ်အရွယ် ပါကစ္စတန်အိမ်ယာမဲ့ ကလေးငယ် ၄ ဦးကို လိင်ပိုင်းဆိုင်ရာ စော်ကားခဲ့ခြင်းဖြစ်သည်။

မြို့တွင်း ရထားဘူတာများတွင် လှည့်လည်နေထိုင်သည့် အဆိုပါကလေးငယ်များက ဘုန်းတော်ကြီးမှာ စားစရာနှင့် နေစရာပေးမည်ဟု ကမ်းလှမ်းခဲ့သောကြောင့် ဇန်န၀ါရီလတွင် ၎င်း၏အိမ်၌ နေထိုင်ရန် သဘောတူခဲ့ခြင်းဖြစ်သည်ဟု ရဲတပ်ဖွဲ့အား ပြောကြားခဲ့သည်။

“ကျွန်တော်တို့ မေးတဲ့အခါမှာ ကလေးတွေက ဒီလူရဲ့ လိင်ပိုင်းဆိုင်ရာ စော်ကားမှုကို ထပ်ခါတလဲလဲ ခံစားရကြောင်း ဖြေကြားခဲ့ပါတယ်။ သူတို့မှာ နေစရာအိမ်မရှိတာ၊ စားစရာမရှိတာကို အခွင့်ကောင်းယူပြီး ဒီလူဟာ လိင်ပိုင်းဆိုင်ရာ စော်ကားမှု ပြလုပ်တယ်လို့ သူတို့က ပြောကြပါတယ်” ဟု ရဲတပ်ဖွဲ့ တာဝန်ရှိသူတစ်ဦးက ပြောကြားခဲ့သည်။

ထိုကလေးငယ်များမှာ ဘုန်းကြီး၏ နေအိမ်မှ ထွက်ပြေးကာ တစ်ယောက်မှာ ပြောင်းရွှေ့အခြေချသူများ ခိုလှုံရာစင်တာသို့ ရောက်ရှိခဲ့ပြီးနောက် ထိုကဲ့သို့ လိင်ပိုင်းဆိုင်ရာ စော်ကားမှုကို စင်တာဝန်ထမ်းအား ပြောပြရာမှ ရဲတပ်ဖွဲ့က သိရှိခဲ့ခြင်းဖြစ်သည်။

အဆိုပါ ဘုန်းတော်ကြီးအား ဖမ်းဆီးမှုအတွင်း ကွန်ပျူတာ ဟာ့ဒ်ဒစ် ၆ လုံး၊ USB စတစ်တစ်ခုနှင့် ဂရိဥပဒေအရ တားမြစ်ထားသည့် မူးယစ်ဆေးဝါးများစွာကို တွေ့ရှိခဲ့ရသည်။

ရဲတပ်ဖွဲ့ကမူ ဂရိနိုင်ငံတွင် ၁၂ နှစ်တာ နေထိုင်ခဲ့သည့် အဆိုပါ ဘုန်းကြီးကို လိင်ပိုင်းဆိုင်ရာ စော်ကားမှု၊ မူးယစ်ဆေး လက်ဝယ်ထားမှုနှင့် ပိုင်ဆိုင်မှု စသည့် စွဲချက်များဖြင့် တရားစွဲဆိုထားသည်ဟု ယမန်နေ့တွင် ပြောကြားခဲ့သည်။

အစော်ကားခံရသည့် ကလေးငယ်များကမူ အန်ဂျီအိုအဖွဲ့များ စီမံခန့်ခွဲနေသော ဒုက္ခသည်စင်တာများတွင် နေထိုင်နေသည်။

Ref: Aljazeera