အင်္ဂလန်ရှိ နျူဘန်ကာဟောင်းတွင် ဆေးခြောက်အကြီးအကျယ်ထုတ်လုပ်မှုကို ဖမ်းဆီး

ဖေဖော်ဝါရီ ၂၄၊ ၂၀၁၇
M-Media

– အင်္ဂလန်နိုင်ငံ အနောက်တောင်ပိုင်းရှိ မြေအောက် နျူကလီးယား ဘန်ကာဟောင်းတစ်ခုတွင် ဆေးခြောက် စိုက်ပျိုး ထုတ်လုပ်နေသည့် အကြီးစားစက်ရုံတစ်ခုကို တွေ့ရှိခဲ့ရသည်ဟု ရဲတပ်ဖွဲ့က ပြောကြားလိုက်သည်။

ဝစ်လ်ရှိုင်းယားမြို့ရှိ ချီလ်မာ့က်ရွာတွင်ဖြစ်ပြီး ဗုဒ္ဓဟူးနေ့ သန်းခေါင်ယံအချိန်က ၀င်ရောက်စီးနင်းမှုအတွင်း အမျိုးသား ၅ ဦးနှင့် ဆယ်ကျော်သက်တစ်ဦးကို ဖမ်းဆီးခဲ့ကာ မှောင်ခိုဈေးကွက်တန်ဖိုး စတာလင်ပေါင် ၁ သန်းခန့်ရှိမည့် ဆေးခြောက်ပင်များကိုလည်း သိမ်းဆည်းရမိခဲ့သည်ဟု ဆိုသည်။

ဘန်ကာထဲတွင် အခန်းပေါင်း ၂၀ ခန့်ရှိနေပြီး အခန်းတိုင်းကို ဆေးခြောက်လက်ကား ဖြန့်ချီရန်အတွက် အသုံးပြုထားသည်။

၁၉၈၀ ပြည့်နှစ်များက ကာကွယ်ရေးဝန်ကြီးဌာနမှ ဆောက်လုပ်ခဲ့သည့် အဆိုပါဘန်ကာမှာ နျူကလီးယားတိုက်ခိုက်မှု ဖြစ်လာသည့်အခါတွင် ဒေသတွင်းရှိ ဂုဏ်သရေရှိသူများ၊ အစိုးရ တာဝန်ရှိသူများကို ကာကွယ်ရန် ရည်ရွယ်ခဲ့သည်။

ရဲတပ်ဖွဲ့ကမူ အဆိုပါ လုပ်ငန်းမှာ အလွန်သိုသိပ်ပြီး၊ သံသယရှိသူများ ထိုဘန်ကာမှ ထွက်လာသည့်အချိန်တွင်မှ ဖမ်းဆီးနိုင်ခဲ့သည်ဟု ရဲတပ်ဖွဲ့က ပြောကြားခဲ့သည်။

“အဆောက်အဦးထဲမှာ အခန်းပေါင်း ၂၀ နီးပါးလောက်ရှိတယ်။ ၂ ထပ်အဆောက်အဦးဖြစ်ပြီး တစ်ထပ်ကို ပေ ၂၀၀x ၇၀ လောက် ကျယ်ပါတယ်။ အခန်းတိုင်းကို ဆေးခြောက်ပင် စီးပွားဖြစ်ထုတ်လုပ်တဲ့နေရာအဖြစ် ပြောင်းထားတယ်။ အရင်ရိပ်သိမ်းပြီးသား ဆေးခြောက်ပင်အဟောင်း တော်တော်များများကိုလည်း တွေ့ခဲ့ရပါတယ်” ဟု ရဲတပ်ဖွဲ့ တာဝန်ရှိသူ ပေါလ် ဖရန့်ကလင်းက ပြောကြားခဲ့သည်။

ထို့ပြင် ယခုတွေ့ရှိမှုမှာ နိုင်ငံသမိုင်းတွင် အကြီးမားဆုံး ဆေးခြောက်လုပ်ငန်း တွေ့ရှိခဲ့ခြင်းဖြစ်သည်ဟု ပြောကြားခဲ့ သည်။

Ref: BBC