အစ္စရေးဝန်ကြီးချုပ်ကို ဟစ်တလာနှင့်နှိုင်းကာ သြဇီပြည်သူများ ဆန္ဒပြ

ဖေဖော်ဝါရီ ၂၄၊ ၂၀၁၇
M-Media

– သြစတေးလျနိုင်ငံသို့ တရားဝင်အလည်အပတ်ခရီး ရောက်ရှိနေသည့် အစ္စရေးဝန်ကြီးချုပ် နေတန်ယာဟုကို သြဇီပြည်သူများက ဟစ်တလာနှင့်ခိုင်းနှိုင်းကာ ဆန္ဒပြခဲ့ကြသည်ဟု သိရသည်။

ယမန်နေ့က ဆန္ဒပြခဲ့ကြခြင်းဖြစ်ပြီး ပါလက်စတိုင်းထောက်ခံသူ လူပေါင်း ၆၅၀ ခန့်မှာ ဆစ်ဒနီတွင် စုရုံးကာ ဟစ်တလာပုံစံ နှုတ်ခမ်းမွှေးတပ်ထားသည့် ပိုစတာ၊ ‘ဖက်စစ်ကောင်’ ဟု ရေးသားထားသည့် ပို့စတာများကို ကိုင်ဆောင်ခဲ့ကြသည်။

ထို့ပြင် နေတန်ယာဟုအား စစ်ရာဇ၀တ်ကောင်၊ အကြမ်းဖက်သမားအဖြစ် ရေးသားထားသော ပိုစတာများလည်း ပါဝင်သည်။ ဆန္ဒပြသူများမှာ ဆစ်ဒနီတွင် နေတန်ယာဟု တည်းခိုနေသည့် ဟိုတယ်သို့ ချီတက်သွားသည့်အချိန်တွင် ရဲတပ်ဖွဲ့က တားဆီးခဲ့သည်။

သြစတေးလျနှင့် အစ္စရေးတို့မှာ ခိုင်မာသော ဆက်ဆံရေးရှိပြီး ရာထူးရှိ အစ္စရေးဝန်ကြီးချုပ်တစ်ဦး သြဇီသို့ လာရောက်ခြင်းမှာလည်း ယခုအကြိမ်သည် ပထမဆုံးဖြစ်သည်။ နေတန်ယာဟုမှာ သြဇီတွင် ဗုဒ္ဓဟူးနေ့က ရောက်ရှိလာခဲ့ပြီး ခရီးစဉ်မှာ ၄ ရက် ကြမြင့်မည်ဖြစ်သည်။

Ref : RT