တောင်ကိုရီးယားသမ္မတ ပတ်ဂျုံဟေးကို ရာထူးမှ ဖယ်ရှားရန် အခြေခံဥပဒေခုံရုံး ဆုံးဖြတ်

မတ် ၁၀၊ ၂၀၁၇
M-Media

– တောင်ကိုရီးယားသမ္မတ ပက်ဂျုံဟေးကို ဒီဇင်ဘာလက ပါလီမန်မှ ယာယီအနားပေးထားမှုကို အခြေခံဥပဒေခုံရုံးက အတည်ဖြစ်ကြောင်း ဆုံးဖြတ်လိုက်သောကြောင့် သူမ၏ သမ္မတတာဝန်မှာ တရားဝင် အဆုံးသတ်သွားပြီ ဖြစ်သည်။

ယမန်နေ့ ကြားနာမှုအတွင်း တရားသူကြီး ၈ ဦးက ပက်၏ ခြစားမှုပြဿနာနှင့် ပတ်သက်၍ ရာထူးမှ ဖယ်ရှားရန် အမိန့်ချလိုက်ခြင်းဖြစ်ပြီး သူမ၏ လုပ်ရပ်မှာ “ဒီမိုကရေစီနှင့် ဥပဒေစိုးမိုးရေးကို ယုတ်လျော့စေသောကြောင့် သမ္မတ ပတ်ဂျုံဟေးကို ဖြုတ်ချလိုက်ကြောင်း” တရားသူကြီး လီ ဂျန် မီက ပြောကြားခဲ့သည်။

ထို့ကြောင့် ပတ်ဂျုံဟေးမှာ ၁၉၈၀ ပြည့်နှစ်များတွင် အာဏာရှင်စနစ် အဆုံးသတ်ပြီး ဒီမိုကရေစီစနစ် ပေါ်ပေါက်လာပြီးနောက် တောင်ကိုရီးယားတွင် ရာထူးတာဝန် ပြီးဆုံးအောင် မထမ်းဆောင်ရဘဲ ဖြုတ်ချခံရသည့် ပထမဆုံးသမ္မတ ဖြစ်လာခဲ့သည်။

သမ္မအကြံပေးဟောင်းဖြစ်ပြီး ပက်၏ သူငယ်ချင်းလည်းဖြစ်သူ ချို ဆွန် ဆီလ်မှာ ၎င်းတည်ထောင်ထားသည့် ဖောင်ဒေးရှင်းနှစ်ခုတွင် ငွေကြေးများထောက်ပံ့ရန်အတွက် စီးပွားရေးလုပ်ငန်းကြီးများကို ဖိအားပေးပြီး အသက် ၆၅ နှစ်အရွယ် ပက်ကလည်း ထိုကိစ္စတွင် ပူးပေါင်းပါဝင်ခဲ့သည်ဟု စွပ်စွဲခံထားရသည်။

ထို့ပြင် အစိုးရ၏ မျက်နှာသာပေးမှုကို ရရှိရန်အတွက် Samsung Group မှ လာဘ်ငွေ တောင်းသည်ဟုလည်း စွပ်စွဲခံထားရသည်။

ပက်ကမူ ထိုစွပ်စွဲမှုများအားလုံးကို ငြင်းဆိုခဲ့ပြီး သူမ၏ သူငယ်ချင်းအပေါ် ယုံကြည်ခဲ့မှုအတွကလည်း တောင်းပန်ကြောင်း ပြောကြားခဲ့သည်။

ယခုကဲ့သို့ သမ္မတကို ဖြုတ်ချခဲ့ပြီးနောက် ရက်ပေါင်း ၆၀ အတွင်း ရွေးကောက်ပွဲတစ်ခု ကျင်းပပြုလုပ်ရမည်ဖြစ်ပြီး လက်ရှိတွင် ထိုအတွက် ဥပဒေတစ်ခု လိုအပ်နေသည်။

Ref: Aljazeera