ပြည်တွင်းဖြစ် တိုက်ချင်းပစ်ဒုံးကျည်ကို အီရန်က အောင်မြင်စွာ စမ်းသပ်နိုင်

မတ် ၁၀၊ ၂၀၁၇
M-Media

– ရွေ့လျားပစ်မှတ်ကို ပစ်ခတ်နိုင်သည့် ပြည်တွင်းဖြစ် တိုက်ချင်းပစ် Hormuz-2 ဒုံးကျည်ကို အောင်မြင်စွာ စမ်းသပ်နိုင်ခဲ့ပြီဟု အီရန် အစ္စလာမ့်တော်လှန်ရေးအစောင့်တပ် (IRGC) လေကြောင်းဌာန တပ်မှူး ဗိုလ်မှူးချုပ် အမီရန် အလီ ဟာဂျီဇာဒဟ်က ယမန်နေ့တွင် ပြောကြားလိုက်သည်။

ပင်လယ်ပြင်ပေါ်မှ ပစ်မှတ်များကို ဖျက်ဆီးနိုင်သည့် အဆိုပါ Hormuz-2 ကို ယခုသီတင်းပတ်အတွင်း စမ်းသပ်ခဲ့ခြင်းဖြစ်ပြီး ကီလိုမီတာ ၂၅၀ အကွာအဝေးရှိ ရွှေ့လျားပစ်မှတ်ကို ဖျက်ဆီးနိုင်ခဲ့သည်ဟု ဆိုသည်။ အဆိုပါ ဒုံးကျည်မှာ ကီလိုမီတာ ၃၀၀ အထိ ပစ်ခတ်နိုင်သည်။

ကာကွယ်ရေးဝန်ကြီး ဗိုလ်မှူးချုပ် ဟိုစိန် ဒေကန်က အီရန်၏ ကာကွယ်ရေး စွမ်းအားမှာ ဖြစ်ပေါ်လာနိုင်သည့် မည်သည့်ကျူကျာ်မှုမျိုးကိုမဆို တားဆီးနိုင်သည်ဟု ပြောကြားခဲ့ပြီး ရုရှားမှ ၀ယ်ယူထားသည့် S-300 ဒုံးခွင်းစနစ်ကို စမ်းသပ်ပြီး နောက်တစ်ရက်တွင် ပြောကြားခဲ့ခြင်းလည်း ဖြစ်သည်။

အီရန်မှာ လက်ရှိတွင် S-300 ကဲ့သို့ ပြင်တွင်းဖြစ် ဒုံးခွင်းစနစ် Bavar-373 ကို ဒီဇိုင်းဆွဲ တည်ဆောက်နေသည်ဟု ဗိုလ်မှူးချုပ် ဖာရ်ဇဒ် အက်စ်မိုင်လီက ပြောကြားခဲ့သည်။

Ref: Press TV