ဆီးရီးယားသူပုန်များ မြို့တော်ကို အံ့အားသင့်ဖွယ် ထိုးစစ်ဆင်

မတ် ၁၉၊ ၂၀၁၇
M-Media

– ဆီးရီးယားမှ သူပုန်များမှာ အစိုးရက ထိန်းချုပ်ထားရာ မြို့တော် ဒမတ်စကတ် အရှေ့ပိုင်း ခရိုင်များ၌ ယနေ့တွင် အံ့အားသင့်ဖွယ် ထိုးစစ်များဆင်နွှဲခဲ့ပြီး အပြန်အလှန် ပစ်ခတ်တိုက်ခိုက်မှုများ ဖြစ်ပွားခဲ့သည်ဟု သိရသည်။

ယခင်က အလ်-ကိုင်းဒါးအဖွဲ့ကို သစ္စာခံသော ဖာတာ အလ်-ရှမ်တပ်ဦးနှင့်အတူ ပူးပေါင်းထိုးစစ်ဆင်ခြင်းဖြစ်ပြီး အစိုးရပစ်မှတ်များကို ကားဗုံးများ၊ အသေခံဗုံခွဲမှုများ ပြုလုပ်၍ တိုက်ခိုက်ခဲ့သည်ဟု ဆီးရီးယား လူ့အခွင့်အရေးဆိုင်ရာ စောင့်ကြည့်အဖွဲ့ အကြီးအကဲ ရာမီ အဘ်ဒဲလ် ရဟ်မန်က ပြောကြားခဲ့သည်။

ဂျိုဘာရ်ခရိုင်မှ စတင်တိုက်ခိုက်ခဲ့ပြီးနောက် သူပုန်များမှာ အဘ္ဘာစစ်ရင်ပြင်တစ်ဝိုက်ကို ရောက်ရှိလာခဲ့ပြီး အဆောက်အဦးများစွာကို သိမ်းပိုက်နိုင်ခဲ့ကာ ဒမတ်စကတ်ပတ်ဝန်းကျင်ကို ဒုံးကျည်များဖြင့် တိုက်ခိုက်ခဲ့သည်။

အစိုရစစ်တပ်ကလည်း လေကြောင်းတိုက်ခိုက်မှုများဖြင့် ပြန်လည်တုန့်ပြန်ခဲ့သည်။ ဂျိုဘာရ်ခရိုင်မှာ ၂ နှစ်ကျော်ခန့် စစ်မြေပြင်ဖြစ်ခဲ့ပြီး သူပုန်များနှင့် အစိုးရတပ်များ အပြန်အလှန် တိုက်ခိုက်ခဲ့ကြသည်။ ထို့ပြင် ထိုနေရာမှာ မြို့တော် ဒမတ်စတ် ပိုက်နက်အတွင်း သူပုန်များက သိမ်းပိုက်ထားသော နေရာ ၃ ခုမှ တစ်ခုလည်းဖြစ်သည်။

ဆီးရီးယား နိုင်ငံပိုင်သတင်းဌာနကမူ အစိုးရတပ်များမှာ အကြမ်းဖက်သမားများ၏ တိုက်ခိုက်မှုများကို တွန်းလှန်နေပြီး၊ လက်နက်ကြီးများလည်း အသုံးပြုနေကာ ဒေသခံများကို မိမိအိမ်တွင်သာ နေထိုင်ရန် အမိန့်ပေးထားသည်ဟု ဖော်ပြခဲ့သည်။

Ref: Aljazeera