မွတ်စလင်နိုင်ငံအချို့မှ အမေရိကန်သို့ပျံသန်းသော လေယာဉ်များတွင် ပိတ်ပင်မှုတစ်ခု ထရမ့် လုပ်မည်

မတ် ၂၁၊ ၂၀၁၇
M-Media

– မွတ်စလင်အများစုရှိရာနိုင်ငံအချို့မှ အမေရိကန်သို့ ထွက်ခွာသော လေယာဉ်များကို စီးနင်းသည့် ခရီးသည်များအနေဖြင့် ဆဲလ်ဖုန်းထက် အရွယ်အစားကြီးမားသော အီလက်ထရောနစ်ပစ္စည်းများကို မိမိနှင့်အတူ လေယာဉ်ပေါ် ယူဆောင်သွားမှုကို အမေရိကန်အစိုးရက ပိတ်ပင်မည်ဟု သိရသည်။

အဆိုပါအမိန့်နှင့်ပတ်သက်၍ GMT အင်္ဂါနေ့မနက် ၁၀ နာရီတွင် များပြည်သူသိအောင် ကြေငြာချက်ထုတ်ပြန်ရန်ရှိနေသည်။

အမေရိကန်၏ ထိုကဲ့သို့ပိတ်ပင်မှုကို တော်ဝင်ဂျော်ဒန်လေကြောင်းလိုင်းမှ ယမန်နေ့တွင် ကြေငြာချက်ထုတ်ပြန်ခဲ့ပြီး ဆော်ဒီနိုင်ငံပိုင် သတင်းအေဂျင်စီကလည်း ဖော်ပြခဲ့သည်။

အမည်မဖော်လိုသည့် အမေရိကန်တာဝန်ရှိသူတစ်ဦးကမူ အဆိုပါ ပိတ်ပင်မှုမှာ ရပ်နားမှုမရှိဘဲ အမေရိကန်လေဆိပ်များသို့ တိုက်ရိုက်ပျံသန်းသည့် နိုင်ငံတကာ လေဆိပ် ၁၀ ခုတွင် ကျင့်သုံးမည်ဖြစ်ပြီး အီဂျစ်မှ ကိုင်ရိုလေဆိပ်၊ ဂျော်ဒန်မှ အမ်နန်လေဆိပ်၊ ကူဝိတ်မှ ကူဝိတ်စီးတီးလေဆိပ်၊ မော်ရိုကိုမှ ကာဆာဘလန်ကာလေဆိပ်၊ ကာတာမှ ဒိုဟာလေဆိပ်၊ ဆော်ဒီမှ ရီယာ့ဒ်နှင့် ဂျစ်ဒါလေဆိပ်၊ တူရကီမှ အစ္စတန်ဘူလ်လေဆိပ်၊ ယူအေအီးမှ အဘူဒါဘီနှင့် ဒူဘိုင်းလေဆိပ်တို့ ဖြစ်ကြသည်ဟု ဆိုသည်။

ထိုပိတ်ပင်မှုမှာ အကန့်အသတ်မရှိဟုလည်း ၎င်းက ပြောကြားခဲ့သည်။

အခြား အမေရိကန်အစိုးရ တာဝန်ရှိသူတစ်ဦးကမူ အဆိုပါ ပိတ်ပင်မှုမှာ လေကြောင်းလိုင်း ၉ လိုင်းကို သက်ရောက်မည်ဖြစ်ပြီး သယ်ယူပို့ဆောင်ရေးဆိုင်ရာ လုံခြုံရေးစီမံခန့်ခွဲမှုအဖွဲ့က အင်္ဂါနေ့ GMT မနက် ၇ နာရီတွင် သက်ဆိုင်ရာ လေကြောင်းလိုင်းများသို့ အကြောင်းကြားမည်ဟု ဆိုသည်။

ယခုပိတ်ပင်မှုမှာ သမ္မတဒေါ်နယ်ထရမ့်က မွတ်စလင်အများစုရှိရာ နိုင်ငံ ၆ နိုင်ငံအား ဗီဇာပိတ်ခြင်းနှင့် ဒုက္ခသည်များ ၀င်ရောက်ခွင့် ပိတ်ပင်သည့် ဒုတိယမြောက် အမိန့်ကို ဖက်ဒရာတရားသူကြီးတစ်ဦးက တားဆီးခဲ့ပြီး တစ်ပတ်အကြာတွင် ပေါ်ထွက်လာခြင်းလည်းဖြစ်သည်။

ယခုပိတ်ပင်မှုတွင် ဆဲလ်ဖုန်းနှင့် ဆေးဘက်ဆိုင်ရာ ကိရိယာများမှလွဲ၍၊ လက်တော့ကွန်ပျူတာများ၊ တက်ဘလက်များ၊ အီလက်ထရောနစ် စာအုပ်ဖတ်ကိရိယာများ၊ DVD စက်များ၊ ဂိမ်းစက်များနှင့် ကင်မရာများကို မိမိနှင့်အတူ သယ်ဆောင်ခွင့်မရှိဘဲ ခရီးဆောင်အိတ်များတွင်သာ ထည့်သွင်း သယ်ဆောင်ရမည်ဖြစ်သည်။

ဂျော်ဒန် တော်ဝင်လေကြောင်းလိုင်းကမူ ထိုကဲ့သို့ အီလက်ထရောနစ်ကိရိယာများ ပိတ်ပင်မှုမှာ နယူးယောက်၊ ချီကာဂို၊ ဒက်ထရွိုက်နှင့် မွန်ထရီယဲလ်သို့ ပျံသန်းသော လေယာဉ်များတွင် အကျုံးဝင်မည်ဟု ပြောကြားခဲ့သည်။

Ref: Aljazzeera