ပီအက်စ်ဂျီနှင့် ဆက်သွယ်နေသည်ဆိုသည့် သတင်းကို ၀င်းဂါး ငြင်းဆို

မတ် ၂၁၊ ၂၀၁၇
M-Media

– ရာသီကုန်လျှင် အာဆင်နယ်မှ ထွက်ခွာကာ ပီအက်စ်ဂျီအသင်းတွင် နည်းပြရန် သဘောတူထားသည်ဆိုသည့် သတင်းများကို အာဆင်ဝင်းဂါးက ငြင်းဆိုလိုက်ပြီး သတင်းမှားများဖြစ်သည်ဟု ပြောကြားခဲ့သည်။

အာဆင်နယ်မှာ မတ်လအတွင်း FA ဖလား ဆဌမအဆင့်တွင် အတန်းမရှိသော လင်ကွန်းစီးတီးအသင်းကို ၅ ဂိုးပြတ်ဖြင့် အနိုင်ရရှိခဲ့သည်မှလွဲ၍ အခြားပွဲများတွင် နိုင်ပွဲတစ်ပွဲမှ မရသေးဘဲ ချန်ပီယံလိဂ်တွင်လည်း ဘိုင်ယန်မြူးနစ်အသင်းကို အရှက်တကွဲရှုံးနိမ့်ကာ ပြိုင်ပွဲမှ ထွက်ခွာခဲ့ရသည်။

ထို့ပြင် ယခုတစ်ပတ် ၀က်စ်ဘရွန်းအသင်းအား ၃ ဂိုး ၁ ဂိုးဖြင့်ရှုံးနိမ့်ခဲ့မှုကြောင့် ယခုနှစ်ရာသီကုန်တွင် အသင်းနှင့် သက်တမ်းပြည့်မည့် ၀င်းဂါးအပေါ် ဖိအားများမှာ ပိုမိုပြင်းထန်လာခဲ့သည်။

အချို့သတင်းများက ၀င်းဂါးမှာ ပြင်သစ်လီဂူးကလပ် ပီအက်စ်ဂျီအသင်းနှင့် ၂ နှစ်စာချုပ်ချုပ်ရန် သဘောတူထားသည်ဟု ယနေ့တွင် ဖော်ပြခဲ့သည်။ ၀င်းဂါးကို ပီအက်စ်ဂျီအသင်းနှင့် ချိတ်ဆက်ပြောဆိုမှုမှာ ယခင်ကလည်း ရှိခဲ့သည်။

သို့သော်လည်း ၀င်းဂါးက ထိုသတင်းကို ငြင်းဆိုခဲ့သည်။

“ပီအက်စ်ဂျီနဲ့ ဆက်သွယ်တယ်ဆိုတာလား။ ဒါကို တရားဝင်ငြင်းပါတယ်။ ဒါဟာ သတင်းအတုတွေပါ။ ဒါကို တရားဝင်ငြင်းပါတယ်” ဟု BeIn Sports နှင့် အင်တာဗျူးတွင် ပြောကြားခဲ့သည်။

အာဆင်နယ်မှာ လက်ရှိတွင် ပရီးမီးယားလိဂ်၌ အဆင့် ၆ နေရာတွင် ရှိနေပြီး ထိပ်ဆုံးမှ ချယ်ဆီးနှင့် ၁၉ မှတ် ကွာဟနေသည်။

Ref: Goal