အမေရိကန်၏ လေကြောင်းတိုက်ခိုက်မှုကြောင့် မူဆိုးလ်တွင် အရပ်သား ၂၃၀ သေဆုံး

မတ် ၂၄၊ ၂၀၁၇
M-Media

– အီရတ်နိုင်ငံ မူဆိုးလ်မြို့တွင် IS သိမ်းပိုက်ထားရာ ရပ်ကွက်တစ်ခုတွက် အမေရိကန်ဦးဆောင်သည့် မဟာမိတ်အဖွဲ့က ပြုလုပ်သည်ဟု ယူဆရသည့် လေကြောင်းတိုက်ခိုက်မှုကြောင့် လူပေါင်း ၂၃၀ နီးပါး သေဆုံးခဲ့သည်ဟု သိရသည်။

ကြာသာပတေးနေ့က မူးဆိုးလ်မြို့အနောက်ပိုင်း အလ်-ဂျာဒီဒါရှိ အဆောက်အဦးတစ်ခုတည်းမှာပင် အရပ်သားအများစုပါဝင်သည့် လူပေါင်း ၁၃၇ ဦး သေဆုံးခဲ့ပြီး၊ အခြား ၁၀၀ ဦးမှာ အနားရှိ အဆောက်အဦး ထပ်မံဗုံးကြဲခံရပြီးနောက် သေဆုံးခဲ့ခြင်းဖြစ်သည်ဟု နိုင်ငံမြောက်ပိုင်းတွင် အခြေစိုက်သည့် ကာ့ဒ်သတင်းဌာန Rudaw က ဖော်ပြခဲ့သည်။

“သေဆုံးသွားတဲ့သူအချို့ဟာ အိမ်တွေထဲမှာ ခိုလှုံနေကြတဲ့သူတွေပါ” ဟု သတင်းထောက် ဟာဗီဒါ အဟ်မဒ်က အခင်းဖြစ်ပွားရာနေရာမှ ပြောကြားခဲ့သည်။

အီရတ်တွင် အမေရိကန်၏ စစ်ရေးကိစ္စများကို ပူးပေါင်းဆောင်ရွက်နေသော အမေရိကန် ဗဟိုစစ်ဌာနချုပ်မှ ပြောရေးဆိုခွင့်ရှိသူ တစ်ဦးက ထိုကဲ့သို့ အရပ်သားများ သေဆုံးသည်ဆိုသည့်သတင်းကို မိမိတို့ ကြားသိရပြီး စုံစမ်းစစ်ဆေးမှုများ ပြုလုပ်သွားမည်ဟု ပြောကြားခဲ့သည်။

ဗဟိုစစ်ဌာနချုပ်က တစ်နေ့တာအတွက် သုံးသပ်ချက်တွင် ကြာသာပတေးနေ့တွင် မူဆိုးလ်မြိုကအနီး လေကြောင်းတိုက်ခိုက်မှု ၅ ခု ပြုလုပ်ခဲ့ပြီး IS အဆောက်အဦး ၅ ခု၊ စနိုက်ပါအဖွဲ့ ၁ ခု၊ တိုက်ခိုက်ရေးနေရာ ၁၁ ခု၊ ယာဉ်များ၊ အဝေးပစ်လက်နက်များကို ဖျက်ဆီးချေမှုန်းနိုင်ခဲ့သည်ဟု ဖော်ပြထားသည်။

Ref: Independent