မြန်မာမွတ်စလင် အမျိုးသား အဖွဲ့ချုပ် နာယက ဒု-ဗိုလ်မှူးကြီး ရန်မောင် (ငြိမ်း) ကွယ်လွန်

မတ်လ ၂၄ ၊ ၂၀၁၇
M-Media
သတင်း-မိုးစက်

မြန်မာမွတ်စလင်အမျိုးသား အဖွဲ့ချုပ် (မအဖ) ရဲ့ ဦးသျှောင်နာယကကြီးတစ်ဦးဖြစ်သူ ဒုတိယဗိုလ်မှူးကြီး ဦးရန်မောင် (ငြိမ်း) သည် ဦးနှောက်သွေးကြောပိတ်သည့် ရောဂါဖြင့် မတ်လ ၂၄ ရက်နေ့မှာ ကွယ်လွန်သွားကြောင်းသိရပါတယ်။

ဒုတိယဗိုလ်မှူးကြီး ဦးရန်မောင် (ငြိမ်း) သည် ရမည်းသင်းဇာတိဖြစ်ပါတယ်။ တက္ကသိုလ် ဒုတိယနှစ်အရွယ်မှာ ဗိုလ်သင်တန်းကျောင်းကို တက်ရောက်ခဲ့ပြီး ရန်ကုန်မြို့ ကုန်သွယ်ရေးရုံးကို ဒု- အရာရှိအဖြစ် ပထမဆုံး တာဝန်လာရောက် ထမ်းဆောင်ခဲ့ရပါတယ်။ အငြိမ်းစား မယူခင်  ခလရ-၄၁ တွင် ဒုဗိုလ်မှူးကြီး တာဝန်အဖြစ်လည်းကောင်း၊ ခယက ဥက္ကဌအဖြစ် တာဝန်ထမ်းဆောင်ခဲ့ပါတယ်။

မြန်မာမွတ်စလင်အဖွဲ့အစည်းများဘက်တွင်လည်း ၁၉၉၃ ခုနှစ်မှာ မြန်မာမွတ်စလင်အမျိုးသား အဖွဲ့ချုပ် (မအဖ) ရန်ကုန်တွင် ဥက္ကဌအဖြစ် တာဝန်ထမ်းဆောင်ခဲ့ပါတယ်။ ၂၀၀၂ ခုနှစ်ကနေ ၂၀၀၆ ခုနှစ်အထိ မြန်မာမွတ်စလင်အမျိုးသား အဖွဲ့ချုပ် (မအဖ) ဌာနချုပ်တွင် ဥက္ကဌအဖြစ် တာဝန်ယူခဲ့ပြီး မြန်မာမွတ်စလင်အမျိုးသားရေး လုပ်ငန်းများကို လုပ်ဆောင်ခဲ့ပါတယ်။

ဦးရန်မောင် (ဒုတိယဗိုလ်မှူးကြီး-ငြိမ်း) သည် ၂၀၀၆ ခုနှစ်မှ မသေဆုံးမီအချိန်ထိ မြန်မာမွတ်စလင်အမျိုးသား အဖွဲ့ချုပ် (မအဖ) ဌာနချုပ်တွင် နာယကအဖြစ် တာဝန်ယူပြီး မြန်မာမွတ်စလင် အရေးကိစ္စများကို ဆက်လက်လုပ်ဆောင်ခဲ့ပါတယ်။

ကွယ်လွန်သူ ဦးရန်မောင် (ဒုတိယဗိုလ်မှူးကြီး-ငြိမ်း)ကို ယနေ့ နေ့လယ်ပိုင်းတွင် ရန်ကုန်မြို့ ရေဝေးရှိ မွတ်စလင်မ် သုဿာန်ဥယျာဉ်တော်၌ အစ္စလာမ်ဘာသာဝင်တို့၏ ထုံးစံအတိုင်း မြှုပ်နှံသဂြိုလ်ခဲ့ကြောင်းသိရှိရပါတယ်။

ဦးရန်မောင် (ဒုတိယဗိုလ်မှူးကြီး-ငြိမ်း) ကွယ်လွန်ချိန်တွင် ဇနီး ဟာဂျီမ ဒေါ်ခင်သန်းရီနှင့် သမီး (၃) ယောက်တို့ ကျန်ရှိခဲ့ပါတယ်။