ပါလက်စတိုင်းအား အစိုးရက ကျူးကျော်သိမ်းပိုက်ထားမှုကို အစ္စရေးဂျူးများ ဆန့်ကျင်ဆန္ဒပြ

ဧပြီ ၂၊ ၂၀၁၇
M-Media

– ပါလက်စတိုင်းပိုင်နက်များအား အစ္စရေးက နှစ်ပေါင်း ၅၀ ကြာ ကျူးကျော်သိမ်းပိုက်ထားမှုများကို ဆန့်ကျင်သည့်အနေဖြင့် အစ္စရေးရှိ ဂျူးလူမျိုးများမှာ ဂျေရုစလင်တွင် ချီတက် ဆန္ဒပြခဲ့ကြသည်ဟု သိရသည်။

ယမန်နေ့က ပြုလုပ်ခဲ့သည့် အဆိုပါ ချီတက်ဆန္ဒပြမှုကို Standing Together လှုပ်ရှားမှုအဖွဲ့မှ ဆောင်ရွက်ခဲ့ခြင်းဖြစ်ပြီး လူပေါင်း ၂၀၀၀ ခန့်မှာ ဂျေရုစလင်မြို့ဟောင်းရှိ ဂျက်ဖာဂိတ်အထိ ချီတက်ခဲ့ကြသည်။

Standing Together လှုပ်ရှားမှုမှာ အစ္စရေးရှိ ငြိမ်းချမ်းရေးလိုလားသော အဖွဲ့အစည်းများနှင့် လက်ဝဲပါတီများ စုပေါင်းကာ ဆောင်ရွက်ခြင်းဖြစ်ပြီး ယမန်နေ့ ချီတက်မှုမှာ ၆ ရက်စစ်ပွဲ နှစ် ၅၀ မြောက် အထိမ်းအမှတ်လည်းဖြစ်သည်။

ချီတက်ဆန္ဒပြမှု၏ ရည်ရွယ်ချက်မှာ ပါလက်စတိုင်းပိုင်နက်များ အထူးသဖြင့် အရှေ့ဂျေရုစလင်အား အစ္စရေးက ဆက်လက် ထိန်းချုပ်ထားမှုကို ဆန့်ကျင်ပြီး၊ ငြိမ်းချမ်းသော အဖြေတစ်ခုထွက်လာရေး ဖြစ်သည်ဟု ကြေငြာချက်တွင် ဖော်ပြထားသည်။

ဆန္ဒပြသူများမှာ အစ္စရေးအစိုးရက ပါလက်စတိုင်းပိုင်နက်များတွင် တရားမ၀င် အခြေချအိမ်ယာများ ဆောက်လုပ်ခြင်းကို ဆန့်ကျင်ခဲ့ကြပြီး “အစိုးရ၏ ကျူးကျော်သိမ်းပိုက်မှု အလိုမရှိ” ဟုလည်း ကျွေးကျော်ခဲ့ကြသည်။

Ref: Press TV