ရိုဟင်ဂျာများကို လူမျိုးစုလိုက် သုတ်သင်ခြင်းမရှိဟု ဒေါ်အောင်ဆန်းစုကြည် ပြော

ဧပြီ ၆၊ ၂၀၁၇
M-Media

– ရခိုင်ပြည်နယ်တွင် ဖြစ်ပွားနေသည့် ပြဿနာအတွက် လူမျိုးစုလိုက်သုတ်သင်မှုဟု သုံးစွဲခြင်းမှာ အလွန်ပြင်းထန်သည့် စကားလုံးဖြစ်သည်ဟု နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ဘီဘီစီနှင့်တွေ့ဆုံမေးမြန်းမှုတွင် ပြောကြားလိုက်သည်။

“လူမျိုးစုလိုက်သုတ်သင်မှု ဖြစ်နေတယ်လို့ ကျွန်မ မထင်ပါဘူး။ ဖြစ်နေတာတွေအတွက် လူမျိုးစုလိုက် ရှင်းလင်းတယ်ဆိုတဲ့ အသုံးအနှုန်းဟာ သိပ်ပြီး ပြင်းထန်တယ်လို့ ကျွန်မထင်ပါတယ်” ဟု နိုင်ငံအတွင်း လူမျိုးစုလိုက် သုတ်သင်မှုကို လစ်လျူရှုထားသည့် နိုဘယ်ငြိမ်းချမ်းရေးဆုရှင် ဖြစ်နေပြီလားဆိုသည့် မေးမြန်းမှုကို ပြန်လည်ဖြေကြားခဲ့သည်။

ရခိုင်ပြည်နယ်ပြဿနာကို သူမ၏အစိုးရက ကိုင်တွယ်မှုအတွက် နိုင်ငံတကာမှ ဝေဖန်မှုများ ရှိနေသည်။

ပြီးခဲ့သည့်နှစ် အောက်တိုဘာလက ရခိုင်ပြည်နယ်မြောက်ပိုင်းတွင် နယ်ခြားစောင့်စခန်းများ အကြမ်းဖက်တိုက်ခိုက်ခံရပြီးနောက် အစိုးရစစ်တပ်က ပြုလုပ်ခဲ့သည့် နယ်မြေရှင်းလင်းရေးကြောင့် ရိုဟင်ဂျာမွတ်စလင် ၇၅၀၀၀ ကျော်မှာ ဘင်္ဂလားဒေ့ရ်ှသို့ ထွက်ပြေးခဲ့ရသည်။

စစ်ဆင်ရေးအတွင်း လုံခြုံရေးတပ်ဖွဲ့များမှာ အဓမ္မပြုကျင့်မှုများ၊ နေအိမ်မီးရှို့မှုများ ညှင်းပမ်းနှိပ်စက်မှုများ ရှိခဲ့ပြီး ထိုလုပ်ရပ်များမှာ လူသားထုအပေါ် ကျူးလွန်သည့် ရာဇ၀တ်မှု မြောက်နေပြီဟု ယခုနှစ်အစောပိုင်းတွင် ကုလမှထုတ်ပြန်သည့် အစီရင်ခံစာ၌ ဖော်ပြထားသည်။

စစ်တပ်ကမူ ထိုစွပ်စွဲချက်များကို ငြင်းဆိုခဲ့ပြီး မိမိတို့မှာ ဥပဒေအတိုင်း ဆောင်ရွက်ခဲ့သည်ဟု ပြောကြားခဲ့သည်။

“ကျွန်မတို့ သွားဖို့ကြိုးစားနေတာက ရင်ကြားစေ့ရေးအတွက်ဖြစ်ပြီး အပြစ်တင်ဖို့ မဟုတ်ပါဘူး။ မွတ်စလင်တွေလည်း မွတ်စလင်တွေကို ပြန်သတ်နေကြတာပါပဲ” ဟု ဒေါ်အောင်ဆန်းစုကြည်က ပြောကြားခဲ့သည်။

Ref : Reuters