ဘာသာရေးသည်းမခံနိုင်မှုက အစ္စလာမ်နှင့်ဆန့်ကျင်နေသည်ဟု အင်ဒို ထိပ်တန်း အီမာမ်ကြီးပြော

ဧပြီ ၈၊ ၂၀၁၇
M-Media

Istiqlal ဗလီဝတ်ကျောင်းတော်ရဲ့ ရှေ့ဆောင်အီမာမ်ကြီး နာဆာရုဒ်ဒင် အူမာရ်

– သဘောထားတင်းမာသူ အုပ်စုတွေက လူ့အဖွဲ့အစည်းကြားမှာ အမုန်းတရားတွေ၊ အစွန်းရောက် အယူအဆတွေ သွတ်သွင်းနေတာကို ရပ်တန့်ဖို့အတွက် အရှေ့တောင်အာရှရဲ့ အကြီးဆုံး ဗလီဝတ်ကျောင်းတော်ဖြစ်တဲ့ ဂျကာတာက Istiqlal ဗလီဝတ်ကျောင်းတော်ရဲ့ ရှေ့ဆောင်အီမာမ်ကြီး နာဆာရုဒ်ဒင် အူမာရ်က ဆော်သြလိုက်ပါတယ်။

အင်ဒိုနီရှားနိုင်ငံမှာ အခုနှစ်ပိုင်းအတွင်း ဘာသာရေး သည်းမခံနိုင်မှုတွေ မြင့်တက်လာခဲ့ပြီး ဂျကာတာအုပ်ချုပ်ရေးမှူး ရွေးကောက်ပွဲမှာ ဒါကို ထင်ထင်ရှားရှား တွေ့မြင်လာရပါတယ်။ သဘောထားတင်းမာသူ အဖွဲ့တွေဟာ ငြိမ်းချမ်းရေးနဲ့ ဘာသာရေးသည်းခံနိုင်မှုအကြောင်း ပြောတဲ့ နိုင်ငံရေး၊ ဘာသာရေး ခေါင်းဆောင်တွေကိုပါ ပစ်မှတ်ထားလာကြတာပါ။

ဒါပေမယ့် အင်ဒိုနီးရှားမှာ အလေးစားခံရဆုံး အစ္စလာမ့်ဓမ္မပညာရှင်တွေထဲက တစ်ဦးဖြစ်တဲ့ အီမာမ်ကြီး နာဆာရုဒ်ဒင် အူမာရ်က ဘာသာရေး သည်းမခံနိုင်မှုဟာ အစ္စလာမ့်သွန်သင်ချက်နဲ့ ဆန့်ကျင်နေတယ်လို့ ဧပြီလ ၅ ရက်နေ့မှာ ပြောကြားလိုက်ပါတယ်။

“ကိုယ့်ရဲ့ ဘာသာတရားကို ပိုပြီးနားလည်လာရင် ဘုရားသခင်အလိုတော်နဲ့ သူတို့ဟာ ပိုပြီး အလယ်အလတ်ဝါဒီတွေ၊ ပိုပြီး သည်းခံနိုင်သူတွေ၊ ပူးပေါင်းဆောင်ရွက်နိုင်သူတွေ၊ ကျွန်တော်တို့ နိုင်ငံအတွက် အပြုသဘောဆောင်တဲ့ အတွေးအခေါ်မျိုး တွေးခေါ်နိုင်သူတွေ ဖြစ်လာမယ်လို့ ကျွန်တော့်အနေနဲ့ ပြည့်ပြည့် ၀၀ ယုံကြည်ပါတယ်” လို့ အီမာမ်ကြီးက ဆိုပါတယ်။

အီမာမ်ကြီးဟာ ၂၀၁၁ ခုနှစ်က ၂၀၁၄ ခုနှစ်အထိ အင်ဒိုနီးရှား သာသနာရေးဝန်ကြီးဌာနမှာ ဒုတိယ၀န်ကြီးအဖြစ် ဆောင်ရွက်ခဲ့ပြီး နိုင်ငံအတွင်း ဘာသာရေးသည်းခံနိုင်မှုရှိဖို့ အသိပညာပေးရာမှာ ထိပ်တန်းက ဆောင်ရွက်နေတဲ့ ပုဂ္ဂိုလ်လည်း ဖြစ်ပါတယ်။

တိုကျို၊ လန်ဒန်၊ ၀ါရှင်တန်တွေမှာလည်း အစ္စလာမ့်ရေးရာ ပညာရပ်တွေကို သင်ကြားပို့ချပေးခဲ့ပြီး Masyarakat Dialog antar Umat Beragama ဆိုတဲ့ ဘာသာပေါင်းစုံ ချစ်ကြည်ရေးအဖွဲ့ကိုလည်း တည်ထောင်ထားသူပါ။ ပြီးခဲ့တဲ့နှစ်မှာတော့ အင်ဒိုနီးရှားရဲ့ နိုင်ငံတော်ဗလီ Istiqlal ရဲ့ ရှေ့ဆောင်အီမာမ်အဖြစ် ခန့်အပ်ခံခဲ့ရပါတယ်။

Ref: Coconuts Jakarta