ဆော်ဒီတွင် ဖျော်ဖြေရေးမြို့တော်တစ်ခု တည်ဆောက်မည်

ဧပြီ ၉၊ ၂၀၁၇
M-Media

ရီယာ့ဒ်မြို့ မြင်ကွင်းတစ်ခု

– မြို့တော်ရီယာ့ဒ် တောင်ဖက်တွင် ဖျော်ဖြေရေးမြို့တော်တစ်ခု တည်ဆောက်ရန် ဆော်ဒီက စီစဉ်နေပြီး တောလည်ခရီးထွက်ရန် နေရာတစ်ခု၊ Six Flags ကစားကွင်းတစ်ခု အပါအ၀င် အားကစား၊ ယဉ်ကျေးမှုနှင့် အပန်းဖြေစရာနေရာများ ပါဝင်မည်ဟု သိရသည်။

၃၃၄ စကွဲယားကီလိုမီတာ ကျယ်ဝန်းမည့် အဆိုပါ ဖျော်ဖြေရေးမြို့တော်ကို ဆော်ဒီအစိုးရ၏ ပြည်သူ့ရင်းနှီးမြှုပ်နှံမှု ရန်ပုံငွေအဖွဲ့မှ အဓိက ရင်းနှီးမြှုပ်နှံသူအဖြစ် ဆောင်ရွက်သွားမည်ဖြစ်ပြီး နိုင်ငံရပ်ခြားမှ ရင်းနှီးမြှုပ်နှံသူများလည်း ပါဝင်မည်ဖြစ်သည်။

စီမံကိန်းကို ၂၀၁၈ ခုနှစ်တွင် စတင်ကာ ၂၀၂၂ ခုနှစ်တွင် ဖွင့်လှစ်ရန် ရည်ရွယ်ထားသည်ဟု ဒုတိယအိမ်ရှေ့မင်းသား မိုဟာမက် ဘင် ဆလ်မန် အလ် ဆာအွဒ်က ထုတ်ပြန်သည့် ကြေငြာချက်တွင် ဖော်ပြထားသည်။

“ဒီမြို့ဟာ ဘုရားသခင်အလိုတော်နဲ့ ထင်ရှားတဲ့ ယဉ်ကျေးမှုဆိုင်ရာ အမှတ်သညာတစ်ခု၊ နိုင်ငံက အနာဂတ် မျိုးဆက်ရဲ့ အပန်းဖြေရေး၊ ယဉ်ကျေးမှုနဲ့ လူမှုရေးလိုအပ်ချက်တွေကို ဖြည့်ဆည်းပေးမယ့် အရေးပါတဲ့နေရာတစ်ခု ဖြစ်လာမှာပါ” ဟု ကြေငြာချက်က ဆိုသည်။

အမေရိကန်အခြေစိုက် Six Flags ကုမ္ပဏီ ၎င်းတို့၏ ကစားကွင်းကို ဆော်ဒီတွင် ဆောက်လုပ်ရန်အတွက် အစိုးရနှင့် ဆွေးနွေးမှုများ ပြုလုပ်နေသည်ဟု ပြီးခဲ့သည့်နှစ် ဇွန်လက ကြေငြာခဲ့သည်။

ဆော်ဒီ၏ ၂၀၃၀ ရည်မှန်းချက်တွင် တင်းကြပ်သည့် နိုင်ငံတစ်ခုအဖြစ် နာမည်ကျော်နေမှုကို လျှော့ချရေး၊ စီးပွားရေးတွင် ရေနံကို အလွန်အမင်းမှီခိုနေရမှုအား လျှော့ချရေး စသည်တို့ကို ဆောင်ရွက်ရန် ပါဝင်သည်။

Ref: Aljazeera