အမေရိကန်နှင့် ဆက်ဆံရေးဆိုးရွားလာကြောင်း ရုရှားသမ္မတပူတင် ဖွင့်ဟ

ဧပြီ ၁၂၊ ၂၀၁၇
M-Media

– သမ္မတထရမ့် တက်လာပြီးနောက်ပိုင်း အမေရိကန်နှင့် ရုရှားတို့၏ ဆက်ဆံရေးမှာ ဆိုးရွာလာခဲ့သည်ဟု ရုရှားသမ္မတ ပူတင်က ယနေ့တွင် ဖွင့်ဟပြောကြားလိုက်ပြီး ဆီးရီးယားအစိုးရနှင့် အဆက်ဖြတ်ရန် အမေရိကန်၏တောင်းဆိုမှုကိုလည်း ပယ်ချလိုက်သည်။

“ပူးပေါင်းလုပ်ဆောင်တဲ့နေရာ အထူးသဖြင့် စစ်တပ်ဖက်မှာ ယုံကြည်မှုအဆင့်ဟာ တိုးတက်မလာဘဲ ဆိုးရွားသွားတယ်လို့ ပြောနိုင်ပါတယ်” ဟု ပူတင်က နိုင်ငံပိုင်ရုပ်သံနှင့် အင်တာဗျူးတွင် ပြောကြားခဲ့သည်။

ထို့ပြင် ဆီးရီးယားသမ္မတ အာဆတ်အား ဆက်လက်ထောက်ခံသွားမည်ဖြစ်ကြောင်း၊ ပြီးခဲ့သည့်တစ်ပတ်က သူပုန်များသိမ်းပိုက်ထားရာ မြို့တစ်မြို့သို့ အာဆတ်အစိုးရက ဓာတုလက်နက်ဖြင့် တိုက်ခိုက်ခဲ့သည်ဆိုသည့် အပြစ်တင်မှုများကို ပယ်ချခဲ့ကာ အာဆတ်၏ ရန်သူများက လုပ်ကြံခြင်းဖြစ်ကြောင်း ထည့်သွင်းပြောဆိုခဲ့သည်။

စောစောပိုင်းကလည်း ရုရှားနိုင်ငံခြားရေးဝန်ကြီး လာဗရော့ဗ်မှာ အမေရိကန်နိုင်ငံခြားရေးဝန်ကြီး တီလာဆန်နှင့် တွေ့ဆုံစဉ် ပြင်းပြင်းထန်ထန် ဝေဖန်ခဲ့ပြီး၊ ဆီးရီးယားအား အမေရိကန်က ဒုံးကျည်ဖြင့် တိုက်ခိုက်မှုမှာ တရားမ၀င်ဘဲ ၀ါရှင်တန်အနေဖြင့် ကြိုတင်တွက်ဆမှုမရှိဘဲ ဆောင်ရွက်ခဲ့ခြင်းဖြစ်သည်ဟု ပြော
ကြားခဲ့သည်။

အမေရိကန်က ဆီးရီးယား၏ အနာဂတ်တွင် အာဆတ်အတွက် နေရာမရှိဘဲ ရုရှားအနေဖြင့် အာဆတ်အစိုးရအား ပံ့ပိုးပေးနေမှုများကို ရပ်တန့်ရန် ပြီးခဲ့သည့်ရက်ပိုင်းက သတိပေးခဲ့သည်။

Ref: Aljazeera