အိန္ဒိယတစ်ဝှမ်း အရက်ပိတ်ပင်လျှင် ဘာသာတရားများ ပိုစည်းလုံးမည်ဟု ပြည်နယ်ဝန်ကြီးချုပ် ပြော

ဧပြီ ၂၃၊ ၂၀၁၇
M-Media

ဘီဟာရ်ပြည်နယ်ဝန်ကြီးချုပ် နီတစ်ရ်ှကူးမားရ်

– အိန္ဒိယတစ်နိုင်ငံလုံးတွင် အရက်ကို တားမြစ်ပိတ်ပင်ရန်အတွက် ဘီဟာရ်ပြည်နယ် ၀န်ကြီးချုပ် နီတစ်ရှ် ကူမားရ်က ယနေ့တွင် တိုက်တွန်းလိုက်ပြီး ထိုသို့ဆောင်ရွက်ခြင်းက ဘာသာတရားအားလုံးကို ပေါင်းစည်စေမည်ဟုလည်း ဆိုသည်။

ကူးမားရ်ဦးဆောင်သည့် ဘီဟာရ်ပြည်နယ် အစိုးရအဖွဲ့မှာ ပြည်နယ်တစ်ခုလုံးတွင် အရက်ကို တားမြစ်ပိတ်ပင်ထားပြီး မဟာရက်ရ်ှထရာ ပြည်နယ်တွင် ၎င်း၏ပါတီ ဂျန်တာဒါလ်း၏ ရုံးခွဲဖွင့်လှစ်မှု အခမ်းအနား၌ ယခုကဲ့သို့ ပြောကြားခဲ့ခြင်းဖြစ်သည်။

“ဘာသာတရားတိုင်းဟာ အရက်သောက်သုံးမှုကို ဆန့်ကျင်ပါတယ်။ အိန္ဒိယတစ်နိုင်ငံလုံးမှာ အရက်ကို ပိတ်ပင်တာဟာ ပြည်သူအားလုံး၊ ဘာသာတရားအားလုံး ပေါင်းစည်းဖို့ ကူညီနိုင်ပါတယ်” ဟု ကူးမားရ်က ပြောကြားခဲ့သည်။

ထို့ပြင် အဝေးပြေးလမ်းများတွင် အရက်ရောင်းချမှု ပိတ်ပင်ရန် တရားရုံးချုပ်က ချမှတ်ထားသည့် အမိန့်ကို မနာခံသည့် ပြည်နယ်များကိုလည်း ကူးမားရ်က ဝေဖန်ခဲ့သည်။

“ဒါက အန္တရာယ်ဗျ။ ဘီဟာရ်က အရက်ကင်းမဲ့တဲ့ ပြည်နယ်ပါ။ ၀င်ငွေတော့မရဘူးပေါ့လေ။ အရက်ရောင်းချမှု၊ သောက်သုံးမှုအတွက် အခွန်က ရူပီး ကုဋေ ၅၀၀၀ ရတယ်။ ဒါပေမယ့် အရက်ရောင်းတာကြောင့် ဘီဟာရ်လို ဆင်းရဲတဲ့ပြည်နယ်က လူတွေရဲ့ ၀င်ငွေ ကုဋေ ၁၀၀၀ လောက် အဆုံးရှုံးခံမှာ မဟုတ်ပါဘူး။ ၀င်ငွေက အဲဒီလောက်ကြီး လျော့သွားတာလည်း မဟုတ်ပါဘူး။ အဝေးပြေးလမ်းမှာ မတော်တဆဖြစ်မှုကတော့ ကျဆင်းသွားပါတယ်” ဟု ကူးမားရ်ဟု ဆိုပြီး အရက်ကို တားဖြစ်ပိတ်ပင်ပြီးနောက် ပြည်နယ်အတွင်း ခရီးသွားလုပ်ငန်း တိုးတက်လာသည်ဟုလည်း ထည့်သွင်းပြောကြားခဲ့သည်။

နိုင်ငံရှိ အမျိုးသမီး ၈၀ ရာခိုင်နှုန်းမှာ ခင်ပွန်းများ၏ အရက်စွဲမှုကြောင့် စိတ်ကျရောဂါ ခံစားနေရသည့်ဆိုသည့် ဂိုအာသတင်းစာ၏ သတင်းတစ်ပုဒ်ကိုလည်း ကူးမားရ်က ထောက်ပြခဲ့သည်။

ဘီဟာရ်အစိုးရမှာ ကျောင်းတက်နေသည့် မိန်းကလေးငယ်များကို စက်ဘီး ထောက်ပံ့ပေးမည့် အစီအစဉ်၊ အမျိုးသမီးများ ပညာရေးနှင့် ပတ်သက်၍ လူများ၏ စိတ်နေစိတ်ထားကို ပြောင်းလဲပစ်မည့် အစီအစဉ်တို့ ရှိနေသည်ဟု ၀န်ကြီးချုပ်က ဆိုသည်။

Ref: Outlook India