အမုန်းတရားလှုံ့ဆော်မှုဖြင့် မြို့တော်ဝန်တစ်ဦးကို ပြင်သစ် ဒဏ်ငွေရိုက်

ဧပြီ ၂၆၊ ၂၀၁၇
M-Media

– နိုင်ငံအတွင်းရှိ မွတ်စလင်များကို ထိခိုက်နစ်နာစေသည့် စကားများ ပြောဆိုခဲ့သော မြို့တော်ဝန်တစ်ဦးအား ပြင်သစ် တရားရုံးက ဒဏ်ငွေရိုက်ခဲ့သည်ဟု သိရသည်။

နိုင်ငံတောင်ပိုင်း ဘီဇီယာမြို့မှ မြို့တော်ဝန် ရောဘတ် မီနာ့ဒ်ဖြစ်ပြီး ၎င်းမှာ ရွှေ့ပြောင်းအခြေချသူဆန့်ကျင်ရေး National Front ပါတီ၏ မဟာမိတ်တစ်ဦးလည်း ဖြစ်သည်။

၂၀၁၆ ခုနှစ် စက်တင်ဘာ ၁ ရက်နေ့ ကျောင်းများ စဖွင့်သည့်အချိန်တွင် မီနာ့ဒ်က Twitter စာမျက်နှာ၌ ‘ကြီးမားသည့် အစားထိုးမှု’ ကို ကြုံတွေ့လိုက်ရသည်ဟု ရေးသားခဲ့ပြီး၊ စာသင်ကျောင်းများတွင် လူဖြူခရစ်ယာန် အရေအတွက်ထက် ရွှေ့ပြောင်းအခြေချသူများက များပြားမှုကို ရည်ရွယ်ပြောဆိုခြင်းဖြစ်သည်။

စင်တင်ဘာ ၅ ရက်နေ့ကလည်း မီနာ့ဒ်က LCI ရုပ်သံအစီအစဉ်တွင် “ကျွန်တော့်မြို့ရဲ့ မြို့လယ်ကောင် ကျောင်းမှာ ကလေးတွေရဲ့ ၉၁ ရာခိုင်နှုန်းက မွတ်စလင်တွေဖြစ်ပါတယ်။ ဒါက ပြဿနာပါ။ သည်းခံမှုဆိုတာ အကန့်အသတ်ရှိပါတယ်” ဟု ပြောကြားခဲ့သည်။

ပြင်သစ်နိုင်ငံတွင် ဘာသာရေးယုံကြည်မှု သို့မဟုတ် လူမျိုးကို အခြေခံ၍ အချက်အလက်ကောက်ယူမှုကို တားမြစ်ထားသည်။

ထိုကိစ္စနှင့်ပတ်သက်၍ လူမျိုးရေးခွဲခြားမှုဆန့်ကျင်ရေး အဖွဲ့တစ်ခုက တရားစွဲဆိုခဲ့ပြီးနောက် ပဲရစ်ရှိ တရားရုံးက မီနာ့ဒ်အား အမုန်းတရားလှုံ့ဆော်မှုဖြင့် ယူရို ၂၀၀၀ ဒဏ်ငွေရိုက်ခဲ့သည်။ ထို့ပြင် တရားစွဲဆိုမှုအတွက် ကုန်ကျစားရိတ် ၁၀၀၀ ကို လူမျိုးရေးခွဲခြားမှုဆန့်ကျင်ရေးအဖွဲ့အား ပေးအပ်ရန်လည်း အမိန့်ပေးခဲ့သည်။

မီနာ့ဒ်ကမူ အဆိုပါ ဆုံးဖြတ်ချက်အတွက် ယူခံဝင်သွားမည်ဟု ပြောကြားခဲ့သည်။

Ref: BBC