Uber ၏ ကားပျံဝန်ဆောင်မှု ၂၀၂၀ တွင်စမည်

ဧပြီ ၂၆၊ ၂၀၁၇
M-Media

– ကမ္ဘာ့ထိပ်တန်း အငှားကား ကုမ္ပဏီဖြစ်တဲ့ Uber က ၂၀၂၀ ခုနှစ်ကျရင် ကားပျံကွန်ယက်ကို ဒါး လက်စ်နဲ့ ဒူဘိုင်းတို့မှာ ဖြန့်ကျက်ပြီး စတင် ၀န်ဆောင်မှုပေးသွားမယ်လို့ ယနေ့က ပြုလုပ်တဲ့ သူတို့ရဲ့ Elevate Summit မှာ ပြောကြားလိုက်ပါတယ်။

လက်ရှိမှာ ကားပျံတွေထုတ်လုပ်ဖို့အတွက် Uber ဟာ လေကြောင်း ကုမ္ပဏီတွေနဲ့ ပူးပေါင်း ဆောင်ရွက်မှုတွေရှိနေပြီး၊ ဒီလို ကားပျံဝန်ဆောင်မှုလုပ်ငန်းမှာ ရင်းနှီးမြှုပ်နှံတာဟာ သူတို့ရဲ့ စီးပွားရေးကို ကာကွယ်ဖို့အတွက် အရေးကြီးတယ်လို့လည်း ဆိုပါတယ်။

ကားပျံဝန်ဆောင်မှုကို ၂၀၂၃ ခုနှစ်မှာ အပြည့်အ၀ လည်ပတ်နိုင်ဖို့လည်း Uber ရည်ရွယ်ထားပါတယ်။ Uber ဟာ မောင်းသူမဲ့ကား လုပ်ငန်းမှာလည်း အကြီးအကျယ် ရင်းနှီးမြှုပ်နှံထားပါတယ်။

ပြီးခဲ့တဲ့နှစ် အောက်တိုဘာလက ဒီ ကားပျံတွေဟာ ခရီးသွားလာရေးမှာ ဘယ်လိုလျင်မြန်ပြီး၊ ဈေးသက်သာလဲဆိုတာနဲ့ပတ်သက်လို့ သူတို့ရဲ့ ရည်မှန်းချက်ကို ထုတ်ဖော်ပြသခဲ့ပါသေးတယ်။

ဒါပေမယ့် လက်ရှိမှာတော့ ဒီရည်မှန်းချက်အတွက် ကျော်လွှားရမယ့် အခက်အခဲတွေ အများကြီး ရှိနေသေးပြီး၊ စည်းမျဉ်းစည်းကမ်းပိုင်းဆိုင်ရာမှာလည်း မေးခွန်းထုတ်စရာတွေ ရှိနေပါသေးတယ်။

Ref : CNN