ပါလက်စတိုင်းအကျဉ်းသားများအတွက် ယူကေကျောင်းသားများ အစာငတ်ခံ ဆန္ဒပြမည်

မေ ၁၊ ၂၀၁၇
M-Media

– အစ္စရေးအကျဉ်းထောင်များတွင် ရှိနေသည့် ပါလက်စတိုင်းအကျဉ်းသားများနှင့် တစ်သားတည်းရှိကြောင်း ပြသသည့်အနေဖြင့် ယူကရှိ တက္ကသိုလ်ကျောင်းသားများမှာ အစာငတ်ခံ ဆန္ဒပြမှုတစ်ခု စတင်တော့မည်ဟု သိရသည်။

မန်ချက်စတာတက္ကသိုလ်မှ ကျောင်းသားများဖြစ်ပြီး ကြာသာပတေးနေ့မှစတင်မည့် အဆိုပါဆန္ဒပြမှုမှာ အနည်းဆုံး တစ်ပတ်တာ ကြာမြင့်မည်ဟု ဆိုသည်။

ဖာတာအဖွဲ့ခေါင်းဆောင် မရ်ဝမ် ဘာဂတီဦးဆောင်သည့် ပါလက်စတိုင်း နိုင်ငံရေးအကျဉ်းသား ၁၅၀၀ ကျော်မှာ အစ္စရေးအာဏာပိုင်များ၏ ညှင်းပမ်းမှုများကို လူအများ သိရှိစေရန် ရည်ရွယ်၍ အစာငတ်ခံ ဆန္ဒပြမှုကို ပြီးခဲ့သည့် သီတင်းပတ်အတွင်း စတင်ပြုလုပ်ခဲ့သည်။

“ပါလက်စတိုင်းက နိုင်ငံရေးအကျဉ်းသားတွေဟာ တရားစွဲဆိုတာ၊ ဒါမှမဟုတ် မျှတတဲ့ စီရင်မှုမျိုး မရှိဘဲနဲ့ ၆ လအထိ ဖမ်းဆီးထိန်းသိမ်းခံခဲ့ရပါတယ်။ ထောင်ထဲမှာ သူတို့ဟာ တော်တော် ဆိုးဆိုးရွားရွား အခြေအနေတွေကို ရင်ဆိုင်နေရပြီး ဆေးကုသခွင့်၊ ဧည်သည့်တွေ့ဆုံခွင့် အခွင့်အရေးတွေကို မရရှိပါဘူး” ဟု ယခု အစာငတ်ခံ ဆန္ဒပြမှုတွင် ပါဝင်ခဲ့သည့် ယူကေကျောင်းသားများထဲမှ မိုဟာမက် အက်ဇဲလ်ဒင်က ပြောကြားခဲ့သည်။

ပါလက်စတိုင်းထောက်ခံသူ ကျောင်သားများနှင့် မန်ချက်စတာတက္ကသိုလ်အကြား ဆက်ဆံရေး ဆိုးရွာလာသည့်အချိန်တွင် အစ္စရေးအစိုးရကို ပစ်မှတ်ထားသည့် ယခု အစာငတ်ခံဆန္ဒပြမှု ပေါ်ပေါက်လာခြင်းဖြစ်သည်။

အက်ဇဲလ်ဒင်ကမူ ယခုဆန္ဒပြမှုမှာ မတ်လက အစ္စရေးဆန့်ကျင်ရေး ဆန္ဒပြပွဲတွင် ပါဝင်ခဲ့သည့် ကျောင်းသားနှစ်ဦးအာ စည်းကမ်းပိုင်းဆိုင်ရာ အရေးယူထားမှုကို ပယ်ဖျက်ပေးရေး တက္ကသိုလ်ကို ဖိအားပေးနိုင်မည်ဟု မျှော်လင့်ကြောင်း ပြောကြားခဲ့သည်။

Ref: Aljazeera