ဂျော်ဒန်ဘုရင်၏ Interfaith Harmony ဆုပေးပွဲအခမ်းအနား ကျင်းပ

မေ ၂၊ ၂၀၁၇
M-Media

– ကမ္ဘာ့ ဘာသာတရားများအကြား သဟဇာတဖြစ်ရေး ဆောင်ရွက်သူများကို ဂျော်ဒန်ဘုရင်က ချီးမြှင့်သည့် King Abdullah II of Jordan Prize for World Interfaith Harmony Week 2017 ဆုပေးပွဲအ ခမ်းအနားကို ယမန်နေ့တွင် ကျင်းပပြုလုပ်ခဲ့ပြီး ဂျော်ဒန်ဘုရင် အဘ်ဒူလာ တက်ရောက်ခဲ့သည်ဟု သိရသည်။

အလ်ဟူစိန်နီယာ နန်းတော်တွင် ကျင်းပခဲ့သည့် အဆိုပါ အခမ်းအနားတွင် ဘုရင် အဘ်ဒူလာ၏ ကိုယ်စားလှယ်၊ ဘာသာရေးနှင့် ယဉ်ကျေးမှုဆိုင်ရာ အကြံပေး မင်းသား ဂါဇီက မိန့်ခွန်းပြောကြားခဲ့ပြီး ၅ နှစ်တိုင်လာခဲ့ပြီဖြစ်သည့် ယခုဆုမှာ မတူညီသည့် ဘာသာဝင်များအကြား ငြိမ်းချမ်းစွာ အတူယှဉ်တွဲနေထိုင်ရေးကို အားပေးရန် ရည်ရွယ်ခြင်းဖြစ်သည်ဟု ပြောကြားခဲ့သည်။

ယခုနှစ်အတွက် ပထမဆုကို ကနေဒါမှ Calgary Interfaith Council၊ ဒုတိယဆုကို ဘော့စနီးယားနှင့် ဟာဇီဂိုဗီနာမှ International Forum Bosnia’s Centre for Interfaith Dialogue အဖွဲ့၊ တတိယဆုကို ဗြိတိန်မှ PL84U AL-SUFFA အဖွဲ့တို့က ရရှိခဲ့သည်။

ဘုရင် အဘ်ဒူလာ၏ အဆိုပါ Interfaith Harmony ဆုကို ၂၀၁၀ ခုနှစ် ကုလသမဂ္ဂ ၆၅ ကြိမ်မြောက် အထွေထွေညီလာခံ၌ အဆိုပြုခဲ့ကာ အောက်တိုဘာလတွင် တစ်ညီတစ်ညွတ်တည်း အတည်ပြုခဲ့ခြင်းဖြစ်သည်။

Ref : Jordan Times