ယူအီးအက်ဖ်အေက ပင်နယ်တီကန်သွင်းမှုစနစ် ပြောင်းလဲမည်

ဧပြီ ၄၊ ၂၀၁၇
M-Media

၂၀၀၈ ခုနှစ် ချန်ပီယံလိဂ် ဖိုင်နယ် မန်ယူနှင့် ချယ်ဆီးတို့ပွဲတွင် ချယ်ဆီးနောက်ခံလူ ဂျွန်တယ်ရီ ပင်နယ်တီ ကန်သွင်းယူနေစဉ်

– ဥရောပ ဘောလုံးအဖွဲ့ချုပ် (UEFA) က ၎င်းတို့လက်အောက်ရှိ ပြိုင်ပွဲများတွင် ပင်နယ်တီ ကန်သွင်းမှုစနစ်ကို ပြောင်းလဲရန် စီစဉ်နေသည်ဟု သိရသည်။

ပွဲချိန်အတွင်း အနိုင်အရှုံး အဖြေမထွက်သည့် ပွဲများတွင် ပင်နယ်တီအဆုံးဖြတ် ခံယူရာ၌ အသင်း A နှင့် အသင်း B တို့မှာ ပင်နယ်တီကို အလှည့်ကျ ကန်သွင်းရသည့် ABAB စနစ်ကို လက်ရှိတွင် ကျင့်သုံးနေသည်။

သို့သော်လည်း ယူအီးအက်ဖ်အေ၏ စနစ်သစ်မှာ အသင်း A နှင့် အသင်း B တို့ ပထမတစ်လုံးစီ ကန်သွင်းပြီးနောက် ဒုတိယအလုံးတွင် အသင်း B က စတင်ကန်သွင်းရသည့် ABBA စနစ်ဖြစ်သည်။ ထိုစနစ်အတွက် ပထမဆုံး ကန်သွင်းရမည့် အသင်းကို ခေါင်းပန်းလှန်၍ ဆုံးဖြတ်မည်ဖြစ်သည်။

စနစ်သစ်ကို ဗုဒ္ဓဟူးနေ့က ခရိုးအေးရှားနိုင်ငံတွင် စတင်ကျင်းပခဲ့သည့် ဥရောပ အမျိုးသား ယူ-၁၇ ချန်ပီယံရှစ်ပြိုင်ပွဲ၊ အင်္ဂါနေ့က ချက်နိုင်ငံတွင် စတင်ကျင်းပခဲ့သည့် ဥရောပ ယူ ၁၇ အမျိုးသမီး ချန်ပီယံရှစ် ပြိုင်ပွဲတို့တွင် စမ်းသပ်ကျင့်သုံးနေသည်။

လက်ရှိ ABAB စနစ်မှာ ပထမဆုံး ကန်သွင်းခွင့်ရသည့် အသင်းကို ၆၀ ရာခိုင်နှုန်း အသာရရှိစေပြီး ဒုတိယကန်သွင်းရသည့် အသင်းမှာ ဖိအားများ ပိုမိုခံစားရကြောင်း ယူအီးအက်ဖ်အေက ပြောကြားခဲ့သည်။

Ref : BBC