ဘိုကိုဟရမ်ဖမ်းထားသည့် ကျောင်းသူများမှ ၆၀ ကျော် ထပ်မံ လွတ်မြောက်

မေ ၇၊ ၂၀၁၇
M-Media

ကျောင်းသူများကို ဘိုကိုဟရမ်လက်မှ ကယ်တင်ရေး ဆန္ဒပြမှု မြင်ကွင်း

– ၂၀၁၄ ခုနှစ်က ဘိုကိုဟရမ်အကြမ်းဖက်အဖွဲ့၏ ပြန်ပေးဆွဲခြင်းကို ခံခဲ့ရသည့် အမျိုးသမီးငယ် ၂၀၀ နီးပါးမှ အနည်းဆုံး ၆၂ ဦးမှာ ပြန်လည် လွတ်မြောက်လာခဲ့ပြီးဟု နိုက်ဂျီးရီးယား တာဝန်ရှိသူတစ်ဦးက ပြောကြားလိုက်သည်။

ယမန်နေ့က လွတ်မြောက်လာခဲ့ခြင်းဖြစ်ပြီး နိုက်ဂျီးရီယား-ကင်မရွန်း နယ်စပ်အနီး ဘန်ဂီမြို့တွင် ရောက်ရှိနေသည်။ စောစောပိုင်းတွင် ဘိုကိုဟရမ်မှာ မိန်းကလေးငယ် ၈၂ ဦးကို လွှတ်ပေးလိုက်သည်ဟု သတင်းများ ဖော်ပြခဲ့ကြသည်။

ဘိုကိုဟရမ်အဖွဲ့မှာ ၂၀၁၄ ခုနှစ် ဧပြီလ ၁၄ ရက်နေ့ ညပိုင်းတွင် ချီဘွတ်မြို့ရှိ မိန်းကလေး အလယ်တန်းကျောင်းမှ ကျောင်းသူ ၂၇၆ ဦးကို ပြန်ပေးဆွဲသွားခြင်းဖြစ်ပြီး ၎င်းတို့ထဲမှ ၅၇ ဦးမှာ ချက်ခြင်းဆိုသလို ထွက်ပြေးလွတ်မြောက်လာခဲ့သည်။

ထိုအချိန်မှစ၍ အချို့ကို ဘိုကိုဟရမ်က လွှတ်ပေးခဲ့ပြီး အချို့မှာ ကိုယ်တိုင် ထွက်ပြေးလာခဲ့ကြသည်။

၂၀၁၆ ခုနှစ် အောက်တိုဘာလကလည်း အစိုးရနှင့် ညှိနှိုင်းမှုကြောင့် ဘိုကိုဟရမ်က ၂၁ ဦးကို လွှတ်ပေးခဲ့ပြီး ယမန်နေ့မတိုင်ခင် လွတ်မြောက်လာသူအရေအတွက်မှာ ၈၀ ကျော် ရှိခဲ့သည်။

ထိုမိန်းကလေးများ လွတ်မြောက်ရန်အတွက် နိုက်ဂျီးရီးယားအစိုးရမှာ ဘိုကိုဟရမ်အဖွဲ့နှင့် ဆွေးနွေးမှုများကို လုပ်ဆောင်ခဲ့သည်။

Ref: Aljazeera